申命記 1章34節 到 1章45節   背景資料  上一筆  下一筆
Chit段經文thang參考民數記第十四章20到45節。

第34到38節,chit段經文是in離開哈洗錄,來到巴蘭ê曠野紮營ê時,摩西派人去窺探迦南地ê tāi-chì件(參考民數記第十三、十四章)。

第37節tī記事頂面kah民數記ê記載有kóa差別;chia講摩西kā上帝遷怒tī伊ê事件,kah以色列人民對進入迦南地ê懍neh、懷疑牽連做伙。若是照民數記第二十章1到13節ê記載,摩西kah亞倫後來hō͘ 上帝譴責,是kah in tī加低斯ê曠野tú-tio̍h缺水發怒、埋怨上帝ê事件有關。

第39到40節,chia講只有當時iáu是gín-á ê人,tī in長大了後,chiah會進入迦南地去佔領hit片土地。原因是上帝決定懲罰年滿二十歲以上ê以色列人民,不准in進入迦南地。M̄-nā án-ne,in一定tio̍h行回頭路,koh來一pái。原因是對上帝無信心ê人,就無資格進入上帝應允賞賜ê土地。這mā就是民數記第廿六章第二pái戶口調查ê背景,因為hit-pái ê調查kah第一、二章ê頭一pái戶口調查之對象已經完全無仝à。

第41到45節,chit段經文是teh說明前段經文ê延續,就是當hiah-ê探子散佈無法度進入迦南去khiā起,甚至連戰爭lóng無法度戰勝ê謠言ê時,上帝真受氣,kā in譴責,hō͘ in年滿二十歲以上ê人無法度進入迦南地。Chit時有人改變心意,決定馬上tio̍h進攻迦南地,m̄-koh,上帝已發出警告表示bē kah in同在。Ē-sái講是chiah-ê人卻無聽摩西ê勸導,in認為óa靠家己ê兵力就ē-tàng進入迦南地,其實,這是錯誤 ê想法kah認知。結果in phah一pái大敗仗,被亞摩利人追擊、phah敗,死傷慘重á哀求上帝救助。M̄-koh上帝lóng m̄-chhap in。聖經作者真清楚說明一點:若無上帝ê帶領,以色列人民想beh靠家己ê氣力生存落去是真困難ê。

第46節,chia講為tio̍h án-ne以色列人民tī「加低斯tòa一段漫長ê時間」,chia並無清楚說明是jōa久,m̄-koh thang對照第二章1節所提起ê,以色列人民是「tī以東山區繞了一段真長ê時間」。

重新查詢 專卷研經 申命記系列
錯誤回報,請聯繫