但以理書 8章1節 到 8章14節   背景資料  上一筆  下一筆
Tùi第八章開始,koh恢復到像頭前第二章4節以前,用希伯來文寫。原本tùi第二章4節直到第七章28節chit段lóng是用亞蘭文寫做ê。會用chit種文字寫ê原因,真有可能是作者引用ê資料來源chē為亞蘭文ê作品有關係。Mā有另外一種可能性,就是會分別用亞蘭文kah希伯來文寫chit本經冊,是因為這兩部分ê作者並無相仝,然後編者kā它編撰做伙,主要是kah主前第二世紀中葉安提阿哥四世統治之下ê猶太人所受之苦oh得有密切關係。特別是tùi第七章以後,直到第十二章,lóng是kah chit種背景有關連。第八章koh khah清楚thang看出當時歷史ê脈絡,因為chit章寫出猶太人被欺壓ê景況。因為án-ne,第七到八chit兩章lóng是teh寫同仝款ê事件,只是所用文字kah筆調大無相仝。

    Chit段經文是但以理第二pái看見異象,而這異象內容真親像第七章所提起ê仝款,只是chia是用公綿羊kah公山羊當做異象ê內容,說明公山羊欺負公綿羊,而且是jú來jú驕傲,力量mā jú來jú大,大到ē-tàng攻擊天軍kah星辰,m̄-nā án-ne,iáu敢公然地對抗天軍統帥,mā毀壞了聖殿。Á chit種情形卻會繼續長到一千一百五十工之久,chit段時間內,聖殿因為無人去獻祭而荒廢à。

第1到2節,chia講時間是tī「伯沙撒在位ê第三年」,he就是tī主前550年到549年之間。M̄-koh頭前有提過,作者注重ê並m̄是teh述說史實,卻是teh取歷史背景講述伊hit時代發生ê事。雖然chia講是第二個異象,而第七章1節提起ê異象是第一個,真容易掠做是第八章ê異象是接連tī第七章了後發生ê。不過,頭前已經提起過,這是仝一個件異象,只是以無仝ê方式描述而已,因為án-ne,thang講這並m̄是第二個異象。Tī第七章講但以理看tio̍h ê異象是發生tī巴比倫,現在soah講異象出現ê地點是tī「以攔省ê書珊城」ê「烏萊河邊」。以攔,這是波斯帝國ê首府,書珊城則以攔ê省會。烏萊河則tī城ê東邊。

第3到4節,這是但以理所看tio̍h異象ê描述。Chia提起有隻公綿羊,牠ê氣力真大,無任何足以抵擋chit隻公綿羊ê氣力,牠力大到ē-tàng向三個無仝ê方向撞去,無任何動物ē-tàng逃脫牠ê勢力範圍,「牠歡喜怎樣就怎樣,jú來jú猖狂。」chit句話ē-sái講是對這公綿羊siōng重要ê描述。

第5到7節,chit段經文講但以理看tio̍h ê異象是:tú-teh想所看見chìn前hit隻公綿羊猛力撞向四方ê時chūn,卻忽然出現另外一隻公山羊出現,牠ê速度非常緊,是快到「腳bē-tio̍h地」,牠朝向hit隻公綿羊「猛衝過去」,牠有真大ê氣力,比chìn前ê hit隻公綿羊koh khah大,kā公綿羊撞倒tī土腳,「無人ē-tàng救牠」。照第21節ê解釋,chit隻忽然出現ê公山羊是teh指希臘帝國。

波斯帝國是tī主前538年取代了巴比倫帝國,而巴比倫帝國則tī經過兩百年統治了後,mā就是tī主前336年被亞歷山大大帝所滅,希臘帝國因為án-ne建立。

    第8節:chit段經文提起chit隻兇猛ê公山羊也kah頭前hit隻公綿羊仝款,當家己有能力了後就開始狂傲起來,而且是「jú來jú狂傲」。M̄-koh牠怎樣想mā想bē到牠ê「角」會斷à。Chia是teh指希臘亞力山大大帝忽然tī主前323年破病過身,因為無kiáⁿthang繼承伊ê王位,因為án-ne伊死後帝國分裂做做四個區域,就是馬其頓kah希臘由迦掖得(Cassander)統治;埃及chit-ê地區由多利買將軍(Ptolemy)統治;敘利亞由西流古將軍統治(Seleucus);小亞細亞地區則由利新馬可(Lysimachus)統治。這mā就是chit節所講ê,chit四個角發出來了後,「各指向無仝ê方向」,因為in lóng各據一方,發展家己ê版圖kah勢力範圍。

    角,這Tī聖經中不時用來表示能力、權威ê意思。

    第9到12節所提起ê tī chiah-ê角中間ê一角koh長出一個小角」,chit種講法ná親像第七章8節所提起ê,Tī十個角中間「長出另外一個小角」仝款。Chia特別指出chit-ê新長出來ê小角真有能力,m̄-nā向南方、東方伸展,koh khah重要ê是牠伸向了「美好之地」,擴張了牠ê勢力,而且強大到夠額第十節所講ê「Kā一kóa天軍kah星辰摔倒tī土腳,並踐踏in。」chia所講ê「美好之地」,是teh指巴勒斯坦ê以色列人民khiā起之地(參考耶利米書三:19)。Chia講這長出來ê小角mā是真狂傲,力量強大到「攻擊天軍kah星辰」,chit句話已經teh暗示這新ê王安提阿哥四世出現,伊用殘酷手段對待以色列人民;伊禁止以色列人民tī聖殿獻祭,mā為tio̍h beh阻止tī聖殿獻祭,伊進行了嚴厲ê「宗教淨化」政策,下令禁止以色列人民守割禮,若被發現,m̄-nā gín-á會hō͘刣死,而且會kā被刣死ê gín-á用索á掛tī母親ê頷頸上遊街示眾。M̄-nā án-ne,伊甚至故意kā以色列人民認為無清氣ê動物—豬ê血潑灑tī聖殿ê祭壇頂,並kā刣死ê豬tī祭壇上燒化獻祭hō͘希臘ê神明「宙斯」。伊同時強迫以色列人民一定tio̍h kah伊仝款,到聖殿去祭拜希臘人ê神明「宙斯」。就án-ne,伊毀壞了聖殿,hō͘人民無法度繼續tī聖殿獻祭hō͘上帝。有kóa以色列人民為tio̍h求生存,只好順從安提阿哥四世ê規定,去做無應該做ê事。

第13到14,但以理聽見m̄是只有一位天使,卻是有幾位天使同時出現,而且in之間有對話。In提問第11到12節所提起ê耶路撒冷城kā tú-tio̍h ê景況,甚麼時chūn chiah會過去。有一位回答講「會繼續一千一百五十工」。

重新查詢 專卷研經 但以理書系列
錯誤回報,請聯繫