但以理書 8章15節 到 8章27節   背景資料  上一筆  下一筆
Chit段經文提起天使加百列出現tī對但以理解釋伊所看見ê異象。這異象就是tī說明希臘帝國會發生ê事。

第15到16節,chia講有一個天使出現,伊就是加百列。這加百列ê天使mā bat出現tī新約路加福音第一章26節,伊受上帝差遣去通知tī拿撒勒ê馬利亞,hō͘伊知影聖神kā藉tio̍h伊有娠生落來耶穌基督。現在chit位加百列天使則被差遣beh說明但以理看tio̍h ê異象。

第17節,看見天使反tńg驚惶起來,天使加百列kā但以理講,伊所看tio̍h ê異象kah「歷史ê終局」有關,mā就是希臘帝國ê結局,而這tú好回應了第13節ê一位天使所問ê問題—這會繼續jōa久?

第18到19節,但以理真可能是驚惶過度而「會失去知覺」昏倒tī土腳。加百列扶起伊並kā伊講有關上帝ê憤怒beh懲罰這狂傲ê希臘帝國之結局,意思是希臘帝國會受tio̍h上帝嚴厲ê審判。

第20到22節,chia說明了第3節kah第5節之公綿羊kah公山羊所代表ê意義,乃是指米底亞kah波斯帝國,以及後來ê希臘帝國。Á第一個王就是亞歷山大。這帝國就tī亞力山大往生了後分裂做做為四個國家。

第23到26節,chit段經文lóng是teh描述安提阿哥四世ê面貌;伊是「凶惡」、「詭詐」、「奸巧」、「驕傲」ê君王,mā因為án-ne,伊策劃ê事往往順利成功。表面上看起來,安提阿哥四世kah-ná成功了,m̄-koh伊ê成功、興旺只不過是暫時性ê而已。作者希望透過chit種方式,hō͘ hiah-ê因為受tio̍h迫害而tī苦難中ê同胞有耐心等待希臘帝國「終局」ê來臨。作者tī chia提起安提阿哥四世「beh公然對敵萬王之王」,伊想beh扮演上帝,ài人民崇拜伊,認為伊是神。M̄-koh結果是自取滅亡。現在天使加百列特別強調講但以理所看見ê異象「一定實現」,並且ài伊得「保密」。原因是上帝有家己ê計劃,無希望但以理kā chit異象ê含意講出去。

第27節,chit節講雖然天使加百列已經說明了,ē-sái講是但以理á是bē了解,siōng主要原因是chiah-ê神跡奇事á是異象,不時lóng是超出了人性命ê經驗之外,而且大大超過人ê理性思考範圍所致。

重新查詢 專卷研經 但以理書系列
錯誤回報,請聯繫