但以理書 5章13節 到 5章30節   背景資料  上一筆  下一筆
Chit段經文描述但以理成(chiâⁿ)實án-ne被召進宮去解釋出現tī宮廷牆壁頂ê異象。

第13到16節,當但以理進入王宮了後,國王伯沙撒隨時問伊是m̄是就是in父親所擄來ê「猶太人但以理」?chit句話有輕視但以理ê意思,主要目的是beh但以理明白伊本來ê身分乃是奴隸,taⁿ面對統治者,一定tio̍h遵照指示去行。伯沙撒王á是仝款表示,若是但以理ē-tàng解釋出現tī王宮牆壁頂ê異象,伊就會賞賜hō͘伊siōng尊貴ê禮物kah地位。

第17節,但以理tī chit節ê回答ē-sái講是kui章經文ê中心。作者所beh表達ê就是tī chia:上帝ê僕人對tī來自人間ê獎賞並無重視,甚至會拒絕,因為chiah-ê來自人間ê獎賞真緊to̍h會過去,甚至變質。

第18到19節,但以理先講述尼布甲尼撒王ê歷史hō͘伯沙撒知影,興旺kah衰敗lóng是出tī上帝ê旨意。這已經teh暗示m̄是in父親有甚麼特別能力。
第20到21節,chit兩節thang對照第四章31到33節、第36節等等經文。但以理希望用chit種話來警告、提醒伯沙撒,hō͘伊知影發生tī尼布甲尼撒王身上ê事是前車之鑑。
	
第22到24節,chit兩節但以理清楚指出伯沙撒ê問題所在。伊雖然無像尼布甲尼撒是hō͘上帝揀選用來懲罰以色列人民ê僕人(參考耶利米書廿五:9),m̄-koh伊卻是擁有實權ê一位統治者,應該tio̍h知影怎樣謙卑帶領人民。但以理真清楚指出伯沙撒ê問題,就是驕傲、m̄知謙卑。Koh khah嚴重ê,乃是伊kā聖殿敬拜上帝用ê器皿當做玩具般,the̍h出來hō͘伊ê臣僕、眾bó͘ kah細姨觀賞、lim酒作樂ê路用。M̄-nā án-ne,連尼布甲尼撒王lóng會知影o-ló創造萬物ê上帝ê偉大,而伯沙撒卻無án-ne,反tńg利用酒宴ê機會,歌頌hiah-ê偶像神明。這是上帝「打發一隻手來寫chiah-ê字」ê原因。

	第25到28節,chit段經文說明了牆壁頂所寫ê toh一kóa字,以及hiah-ê字ê意思。Chia提起壁頂ê文字雖然有四字,m̄-koh其實第一字kah第二字lóng是仝款ê字—「數算」。Chit-ê字tī亞蘭古文字kā它稱做「Mene」。第三字是「稱一稱」,亞蘭古文是字「tekel」。第四字是「分裂」,亞蘭古文字是「uparisin」。照第一章4節ê記載,但以理kah其他三位猶太青年菁英被選入巴比倫王宮ê主要功課,就是學習巴比倫文字kah語言,為tio̍h是beh利用in ê聰明智慧協助料理巴比倫帝國ê國政事務,因為án-ne,chiah-ê古亞蘭文應該是所有巴比倫帝國境內所講ê飽學之士、有學問ê、會看星象、占卜ê人等等lóng會認bat chiah-tio̍h。就án-ne tī chia,咱看tio̍h可能是認bat chiah-ê字並m̄是問題,問題是chiah-ê字beh代表ê意義是甚麼?án-ne chiah是真正ê問題所在。

    但以理ê智慧就是表現在chia;伊看會bat,koh khah重要ê,伊知影chiah-ê文字所表達ê意思kah信息。伊真坦白kah伯沙撒講,tī伊統治之下ê巴比倫帝國會滅亡、分裂,「歸hō͘米底亞人kah波斯人」統治。

第29節,伯沙撒按照chìn前所講ê,kā三樣siōng美好ê禮物贈送hō͘但以理,這三項禮物包括「王室ê紫色袍」、「榮譽ê phōa鍊」、「國內位居第三高位」ê官職。

第30到31節,乃是真chē聖經學者比較khah歡喜討論ê問題,一者是無資料chhōe-tio̍h波斯帝國有一位國王名叫「米底亞人大流士」ê。另外一方面,mā無資料thang證明伯沙撒是怎樣往生ê。而且tī歷史年表中mā無「米底亞」chit-ê介tī巴比倫kah波斯之間ê王朝。其實作者只是想用某段歷史來寫伊想beh暗示讀者知影伊hit時代ê現況,並m̄是beh寫史實。但以理ê作者就是án-ne,因為伊主要目的是beh說明tī伊ê時代,希臘帝國ê統治者安提阿哥四世會被刣死,而且伊ê國家必定會分裂。

重新查詢 專卷研經 但以理書系列
錯誤回報,請聯繫