但以理書 4章1節 到 4章18節   背景資料  上一筆  下一筆
Chit章提起巴比倫帝國ê皇帝尼布甲尼撒王,尊崇但以理所敬拜ê上帝是siōng偉大ê神,而且相信chit位上帝ê統治是「代代相承」,這實在是非常特別ê一件事。Koh加上chit章顯示出尼布甲尼撒王並無因為聽tio̍h但以理解析伊ê夢境內容就大大受氣,反卻是虛心接受,chiah-ê lóng是Tī聖經時代無法度想像ê事。

    其實,作者ê用意並m̄是teh呈現歷史ê史實,卻是teh暗喻tio̍h:任何一個偉大ê君王,lóng無法度逃過上帝對人類性命ê審判。想beh得tio̍h上帝ê赦免kah憐憫,唯一ê方式,就是悔改認罪,以及秉行公義,疼惜人民ê性命,án-ne chiah是正確ê途徑。即使偉大如尼布甲尼撒王,國勢堅強壯大如巴比倫帝國,如果無謙卑認罪ê心,無遵行公義統治社會,chit種君王á是國家,lóng會tú-tio̍h上帝嚴厲懲罰而破碎。Chit點mā是chit章經文所beh表達ê信息。

Koh講,chit章kah第三章有真大ê差別ê所在,就是chit章ê尼布甲尼撒王清楚會記得家己所做ê夢ê內容。可能因為但以理bat有過解夢ê美好記錄,hō͘尼布甲尼撒王真緊to̍h直接chhōe但以理來解夢,並且是先肯定但以理所信奉ê上帝乃是siōng偉大ê上帝。

    Chit段經文是描寫尼布甲尼撒王所做ê夢境,伊講這夢是「惡夢」,hō͘伊「看tio̍h恐怖ê異象」。伊請但以理koh名「伯提沙撒」為伊解夢,因為全巴比倫境內ê術士等lóng無法度為伊解開夢境。

第1到3節,chit三節提起國王ê「通諭」,就表示這是一個全國人民lóng需要遵守ê規則kah命令,bē-sái有任何人thang例外,而且是一經發佈,就無法度隨便修改(參考以斯帖記八:8)。Chit節特別強調chit份「通諭」ê範圍是包括所有巴比倫帝國統治區內,thang講範圍是擴kah所有統轄區之內ê人民。

事(tāi)先伊祝福全國人民「安康」外,伊mā tio̍h向人民講出上帝向伊「顯示」ê神跡。  

第3節是一首o-ló ê詩歌。Chit首詩歌mā thang講是尼布甲尼撒王ê信仰告白,伊確認上帝是一個偉大而且主權無窮盡ê上帝。

    第4到7節,尼布甲尼撒王講伊tī睏眠中做「一個惡夢,看tio̍h恐怖ê異象」ē-sái講是伊請巴比倫全國所有ê顧問來幫忙解夢,卻都無結果。因為in lóng無法度解開夢境。

第8到9節,尼布甲尼撒王知影但以理ē-tàng幫伊解夢,並且hō͘伊知影怎樣tùi這夢境中看tio̍h上帝ê旨意,因為án-ne,伊認為但以理是有「至聖神明ê靈」kah伊同在ê人。因為án-ne,伊請但以理幫伊解夢。

第10到12節,tùi第10節開始ê chit段經文,是有關尼布甲尼撒王所做ê夢ê內容。

Chit-ê夢是用一叢樹做基礎建構起來ê,伊講這棵樹高總是ē-tàng以「直到頂天」,而且是世界上「所有ê人lóng看會tio̍h」,而且它ê果子「夠額全世界ê人lóng食用」,所有生物lóng來食它ê果子。然後有野獸tī樹蔭下歇睏,飛鳥tī枝上「做巢」。

第13節,chit節koh講伊mā看見「天使」tùi天頂落來。「天使」,這是上帝ê使者,落來主要ê目的就是執行上帝所交帶ê命令。

第14到15節,chiah-ê tùi天頂落來ê「天使」teh執行上帝命令,包括beh趕走歇tī樹幹上ê鳥,kah tī樹下ê野獸,並且beh phut倒chit叢大樹。然後kā留落來ê殘幹用「銅條鐵條圍tòa」,kā它放在野外。Tī第15節ê下半句真特別,tùi樹ê異象中,忽然變成「一個人」,而chit-ê人tio̍h kah野獸生活做伙,生活ê樣式ná親像野獸一般,食草、露宿野外。

第16到17節,chia講chit-ê人ài有長到「七年之久」,無人ê「心智,無koh有人ê想法;伊只像野獸」。會有chit種結果是因為來自「守望ê天使所決定ê」,而chit種決定是上帝掌管ê結果。

第18節,尼布甲尼撒王koh一pái表明只有但以理ê智慧chiah ē-tàng解開夢境ê謎。原因是伊深信但以理有「至聖神明ê靈」kah但以理同在chiah有ê結果。

重新查詢 專卷研經 但以理書系列
錯誤回報,請聯繫