阿摩司書 8章1節 到 8章14節   背景資料  上一筆  下一筆
Chit章除了提起另外一個新ê異象外,koh khah重要ê是談起上帝對北國以色列ài beh進行ê審判。Tī chit段審判中,先知阿摩司提起北國以色列真正ê問題,並m̄是因為經濟發生困難,á是受tio̍h外敵入侵,因為tī耶羅波安二世執政時代,北國以色列ē-sái講是siōng強猛ê時代,ná親像列王記作者所講ê,tī伊治理之下ê北國以色列「收復了所有屬tī以色列ê領土,tùi北方ê哈馬隘口直到南方ê死海」(參考列王記下十四:25)。M̄-koh án-ne強有力ê軍事kah經濟力量,卻因為對上帝ê話毫無在意,結果棄sak了上帝,然後tùi國王到人民犯奸作科ê處處可見,tùi án-ne引起上帝極大ê憤怒,hō͘亞述帝國來懲罰in。

第1到3節,這是上帝hō͘先知阿摩司看見一個異象。這異象是hō͘伊看見「一簍熟了ê果子」,這tī中文《和合本》譯文用「熱天ê果子」,chit-ê字tī希伯來文ê發音類似,mā是雙關語,mā thang講是teh指「結局」。果子若是熟了,摘就會lak落來。因為án-ne,chia上帝就kā先知阿摩司講北國以色列ê「結局已經來到à」。

注意第3節ê「hit一工」,這是先知阿摩司siōng特別ê信息,因為伊改變了本來以色列人民所傳承ê觀念,認為「hit一工」就是「耶和華日子」來臨ê時,是一個大喜ê日子,m̄-koh現tī先知阿摩司傳講出來ê「hit日」kā是一個不堪入目的慘狀,「宮廷ê唱歌會變做悲傷ê哀歌」,因為「四界lóng是屍體,一片死寂」,指敵人入侵造成ê慘狀。

第4到7節,chit段經文koh一pái指控以色列人民ê罪狀,除了是有權勢者對貧困者欺壓ê罪狀,koh khah嚴重ê是in對上帝ê藐視,m̄-nā不在乎「神聖ê節期」,甚至是用輕視ê態度teh看待安息日。

Chia所謂「神聖ê節日」,是teh指「月朔」,是teh指每月ê第一工。照民數記ê規定,「每月ê初一tio̍h獻燒化祭hō͘上主」,獻祭ê內容有清楚ê規定,而且是「一年中月月án-ne」(參考民數記廿八:11—14)。Á安息日ê規定則koh khah清楚了,he是神聖ê日子,無法度工作,遵守安息日是表明in kah上帝之間有「約」。M̄-koh taⁿ in是希望chiah-ê宗教節期趕快過去,為tio̍h beh無閒做seng-lí thàn錢,而且是用欺騙手段,做法有「假法碼kah小升斗欺騙顧客」,以高價出售「劣等ê麥á」,並且kā hiah-ê無法度「iáu債ê sàn-chhiah人用一雙涼鞋ê價錢kā伊買落來做奴隸」,chìn前先知阿摩司就bat指責in做過chit款tāi-chì,用一雙連鞋ê價錢賣sàn-chhiah人去做奴隸,不憐憫sàn-chhiah人卻是the̍h錢去買酒lim、嫖妓(參考阿摩司書二:6—8)。這是上帝siōng無法度容忍ê行為。

第8到9節,chit兩節真清楚講tio̍h上帝ê懲罰時刻來到,天地lóng會變色,chit時,人無論過去tùi欺騙thàn取jōa-chē財富lóng teh-beh失去。因為天地若變色,連人ê性命mā無法度保存落來。Án-ne,即使thàn得了全世界mā是枉然。

第10節,chit節講出了北國以色列ê哀歌。「佳節變做葬禮,歡樂變做悲傷ê哀號」,chia所講ê「佳節」是teh指豐收節期,原本是teh慶祝歡樂,現在卻beh變成悲痛ê葬禮;「歡樂」,原來是teh指青年男女彼此傳達愛情ê時唱出ê情歌,現在,chiah-ê情歌kā變成哀歌。痛苦哀號ê聲音,就ná親像厝裡有獨生kiáⁿ往生一般ê艱苦心。

第11到12節,chit兩節是阿摩司書ê中心信息。Chia講人會乾渴,並m̄是無食物、水,卻是因為聽bē-tio̍h、mā chhōe bē-tio̍h上帝ê話。申命記ê作者以色列人民出埃及進入曠野漂流ê四十年經驗,tī hit四十年間,欠缺水、食物,卻因為上帝ê話幫助in度過hit段艱辛ê旅途(參考申命記八:3)。這真清楚teh說明若是無上帝,人即使有得食、lim、穿,性命mā bē感覺飽足,只有tńg來到上帝內面,人chiah會感覺性命豐富有chhun。

第13到14節,災難接踵而來,即使是少年力壯ê少年人mā無法度佳哉免得,因為災難實在是太嚴重à。注意第13節koh提起「tī hit一工」,這屬tī上帝審判ê日子。Hit日子來臨ê時,只要是向偶像神明祭拜過、許過願ê人,lóng會受到嚴厲ê審判。

重新查詢 專卷研經 阿摩司書系列
錯誤回報,請聯繫