阿摩司書 7章1節 到 7章17節   背景資料  上一筆  下一筆
Tùi第七章到九章,除了第七章10到17節有關祭司亞瑪謝ê事件外,其餘lóng是記載先知阿摩司所看tio̍h ê三個異象。第1到3節是看tio̍h一陣草蜢;第4到6節是看tio̍h火,第7到9節是看tio̍h主khiā tī一道tú砌好ê牆邊,手中the̍h鉛垂線。

    第1到2節,一提起「草蜢」ê災難,這真緊to̍h hō͘咱想起出埃及故事中,上帝bat使用草蜢ê災難懲罰埃及帝國。Chia講正當「王家土地第一期ê農作物已經收割,第二期ê幼苗tú開始puh芽」,chit時上帝差遣草蜢來襲,kā所有tú收成起來kah tú發芽出來ê農作物「全部食光」,這真清楚表示饑荒隨時來到。先知阿摩司隨時向上帝祈求,懇求上帝「饒恕」以色列人民,伊講以色列人民是「koh渺小koh脆弱,怎樣受得了」chiah-ni̍h大ê災難。

    第3節,「上主ê心軟化了」,表示上帝垂聽先知阿摩司ê代禱。先知阿摩司講出一個siōng重要,mā是聖經作者siōng常提起ê一件事:ē-tàng改變上帝發出受氣唯一ê方法,就是悔改,走chhōe上帝ê饒恕。只有án-ne,chiah ē-tàng hō͘上帝「心軟化」落來,而免除一切原本beh降落ê災難。

    第4到5節,這是上帝hō͘先知阿摩司看見ê第二個異象,就是上帝beh用「火」來「懲罰」以色列人民。Chit種懲罰就是連「地下ê水源lóng燒乾了,koh開始火燒地面上ê一切」,這真清楚就是上帝beh用火燒盡in所有ê一切,這會hō͘北國以色列人民過去眼中認為siōng安全、貴重ê榮華、財富、軍事、政治kah經濟能力等,上帝lóng teh-beh kā所有ê chiah-ê lóng燒光。

    Kah第一個異象共同ê所在,就是先知阿摩司koh一pái向上帝懇求「停止」chiah-ni̍h嚴重ê懲罰,因為以色列人民kā無法度承受得à。

    第6節,kah第3節所記載ê仝款,上帝ê心koh因為先知阿摩司ê懇切地祈求而「軟化了」,就決定chit件計畫tio̍h用火燒毀一切ê懲罰「免了」。

    第7到9節,這是第三個異象。Chia第7節chiah講「一道tú砌好ê牆」,續落來就是第8節就出現「一道傾斜ê牆」。「鉛垂線」,這是久長以來建造房屋者所用來做衡量ê工具。特別tio̍h注意ê,是chit pái上帝講這tńg來「絕對bē饒恕in了」。因為in是一而再、再而三犯罪,m̄聽勸勉。第9節chia用「以撒」來代表以色列,這mā是聖經中唯一ê一pái。Koh講,tī chiah-ê異象中,先知阿摩司無koh替以色列人民代求à。真可能是因為上帝the̍h鉛垂線量hō͘伊看見,發現以色列ná親像一道已經teh要倒落來ê圍牆,已經無法度挽回à。

    第10到11節,第10到17節chit段經文是提起有關伯特利大祭司亞瑪謝beh阻止先知阿摩司傳達上帝ê信息。

    「伯特利」城ê意思是:上帝ê厝。後來伯特利就成做以色列人民ê宗教聖地。Tī南北分裂ê時chūn,北國ê開國國王耶羅波安一世,為tio̍h beh hō͘北國以色列人民無koh懷念設tī南國ê耶路撒冷聖城,就kā設tī北國ê伯特利建造成政治、宗教中心,因為án-ne,chiah會被先知亞瑪謝kā它稱做「宮廷聖殿,是國家禮拜中心」。Á「伯特利ê祭司」,這意思是teh指大祭司,mā等於是北國以色列位階非常高ê官員,伊派人去kā國王講先知阿摩司「煽動人民」,ài人民「背叛國王」。Chit種罪名,是足以kā先知阿摩司判處死刑。因為伊講阿摩司ài人民「背叛」國王耶羅波安二世,這等於是teh進行叛亂ê行動。甚至iáu詛咒耶羅波安二世「會tī戰場上陣亡」,而「以色列人一定會tùi本土流亡到國外」,這清楚表示以色列會滅亡。

    第12到13節,另外一方面祭司亞瑪謝koh指責先知阿摩司,ài伊tńg來到家己ê故鄉南國「猶大去講教」。亞瑪謝甚至用譏笑ê口吻講先知阿摩司mā thang tńg來到南國猶大謀得一官半職,成做御用ê宗教師,hō͘猶大人民「供養」伊。亞瑪謝特別強調伯特利是「宮廷聖殿,是國家禮拜中心」,不允准先知阿摩司隨便講話。。

    第14到15節,先知阿摩司聽了後,真緊to̍h回應祭司亞瑪謝講,伊m̄是自願當先知,mā m̄是為tio̍h「金錢」chiah出來「講道」,伊原本是一個「看管桑樹ê作穡人」,mā是一個「顧羊人」。Chit種表白是非常重要ê,因為這至少講出:真正先知m̄是靠學習得來ê,是tī上帝呼召下,出來傳講上帝ê信息,而伊所傳講ê話,lóng是上帝親自傳授hō͘伊ê。

    第16到17節,是先知阿摩司回應祭司亞瑪謝ê結語,chit兩節講ê lóng是災禍kā降臨在祭司亞瑪謝ê家庭。先知阿摩司ài祭司亞瑪謝注意聽上帝ê話,伊ê家庭teh beh面臨嚴重ê災禍—bó͘ kā變成「娼妓」,伊ê kiáⁿ「lóng tio̍h tī戰場上死亡」,亞瑪謝家己mā會死tī異鄉。Á北國以色列會被滅亡,人民會「流亡國外」去做奴隸。

重新查詢 專卷研經 阿摩司書系列
錯誤回報,請聯繫