使徒行傳 8章5節 到 8章25節   背景資料  上一筆  下一筆
Chit段經文開始紹介早期教會推選出來七位充滿聖神ê幫助者之一ê腓利(參考六:5),伊就是逃離迫害ê時,到撒馬利亞去。因為有聖神充滿,因為án-ne,腓利mā有行神跡ê能力。M̄-nā ē-tàng醫疾病,mā有能力趕鬼。Mā因為án-ne,撒馬利亞人得tio̍h腓利ê福音事工,充滿了歡喜。

第9到13節,提起一位原本靠tio̍h行邪術過生活ê「西門」,真受撒馬利亞人ê歡迎,而伊mā真驕傲、自滿。M̄-koh後來因為腓利到chia城來傳福音了後,大家開始接納耶穌福音ê信息,連西門mā相信à。伊接受腓利ê行洗禮,看tio̍h腓利大有能力行神跡奇事,就感覺真驚奇。

第14節,福音廣傳ê消息傳tńg來了耶路撒冷教會,大家心中ê ài用腳頭u想mā知。因為án-ne,就差派彼得kah約翰到撒馬利亞去訪問kah鼓勵信徒。這mā表示耶路撒冷教會已經成做當時所有外地福音事工ê中心,另外一方面,mā teh表示耶路撒冷擁有「權威」ê樣式。

第15到17節,chit三節經文一再引起真chē議論。為甚麼撒馬利亞ê信徒lóng受洗了,iáu beh彼得kah約翰為in按手chiah會有聖神ê降臨tī信徒身上?而這mā是後來引起chit位原本行邪惡騙錢ê西門ê覬覦ê原因。比較可能ê一種講法是teh表示chiah-ê來自耶路撒冷ê使徒,確實是tī in身上有聖神充滿。因為án-ne,只要經過in按手,領受按手ê人就會充滿tio̍h聖神。
第18到19節,chit段經文講chit位接受洗禮了ê西門,伊雖然是信耶穌了,m̄-koh,並m̄是真正明白真理,竟然想用錢向彼得kah約翰「買」聖神,thang hō͘伊也ē-tàng親像in仝款,hōaⁿ手tī甚麼人身上,甚麼人就充滿tio̍h聖神。Tùi伊chit種舉止就thang看出,伊對信仰ê認知真有問題。英文有一個字"Simony",意思是「購買聖職」,就是tùi chit-ê典故來ê。

第20到23節,西門chit種舉動隨時遇tio̍h彼得kah約翰ê制止,並且嚴詞譴責,講伊「心術不正」,而且「當teh啃tio̍h嫉妒ê苦果,做罪ê囚徒」。
第24節,西門聽了後趕緊悔改,求彼得kah約翰為伊「向主祈求」,m̄ hō͘伊被罪所捆綁。聖神是自由ê,m̄是跟tòe人ê意思而定,因為聖神是上帝ê能力,上帝照祂ê旨意在做tāi-chì。M̄是人ài怎樣,就怎樣。

第25節,彼得kah約翰m̄-nā tī撒馬利亞傳福音,mā tī tńg來耶路撒冷ê途中繼續見證福音ê信息。換句話講,in並無因為有迫害出現,就噤若寒蟬。卻是用koh khah堅定ê信心傳福音。

重新查詢 專卷研經 使徒行傳系列
錯誤回報,請聯繫