使徒行傳 22章30節 到 23章11節   背景資料  上一筆  下一筆
因為使徒保羅表明家己有羅馬公民身分,致使chit位羅馬指揮官心內開始操心起來。伊需要查明到底是發生甚麼重大ê事。因為án-ne,伊召「祭司長kah全議會做伙」開會,hō͘使徒保羅khiā tī in面前,án-ne thang聽雙方說明。

第廿三章1到3節,chit段是使徒保羅先發言表明家己ê做tāi-chì為人,lóng是「清白」。M̄-koh伊chiah講完,就被「大祭司亞拿尼亞吩咐侍從」phah伊ê嘴巴。Chit位大祭司亞拿尼亞是tī主後47年被設立ê,任職12年,tī主後66年被猶太人游擊隊暗刣死亡。理由是伊親羅馬政府,貪婪成性,為tio̍h錢出賣猶太人,只因為為tio̍h beh取悅羅馬統治當局。使徒保羅對遭遇chit種回應真無歡喜,伊指責亞拿尼亞是「粉飾ê牆」,意思是teh指伊虛假,外表好看而已。伊並且詛咒亞拿尼亞會hō͘上帝「phah」,因為當大祭司,卻無「根據律法審判」。

第4到5節,議員中有人替大祭司講話,認為使徒保羅無禮貌,使徒保羅mā承認家己咒罵大祭司m̄-tio̍h,隨時表示因為m̄-bat大祭司。

第6到10節,使徒保羅發見在chiah-ê議員中間,有ê是撒都該派ê人,mā有法利賽派ê代表。因為án-ne,伊先表明家己是「法利賽人」,而且老父mā是法利賽人。然後伊講hō͘人掠來見官,是因為伊teh傳「ǹg望死人koh活」ê信息。Chit種講法至少表明三點意義:
(1)使徒保羅相信耶穌koh活ê事實,而這mā是伊親身ê經歷。
(2)使徒保羅mā期待伊ē-tàng因耶穌ê koh活而koh活。
(3)伊一生ê傳道工作就是teh見證耶穌koh活ê信息。因為撒都該人mā是猶太人siōng koân議會三股主要力量之一(另外兩股代表是經學教師kah民間ê長老)對死人koh活ê事一向持m̄信ê態度,in mā m̄相信「有天使kah神靈」。因為án-ne,當in聽tio̍h使徒保羅講相信死人koh活ê事,就kah相信有死人koh活ê經學教師當場吵了起來。結果原本beh審問使徒保羅ê事m̄-nā無法度進行,反tńg是「爭吵jú來jú劇烈」。相信有koh活ê法利賽派之經學教師,就表示「查bē出」使徒保羅有任何錯,同時表示使徒保羅講ê話可能有「神靈á是天使」啟示,其實chiah-ê經學教師án-ne講,是利用使徒保羅teh對抗撒都該派ê人,並m̄是in chiâⁿ實查證過使徒保羅無「任何錯處」。因為羅馬指揮官mā聽m̄-bat chiah-ê,看in兩派ê人吵得chiah-ni̍h厲害,只好命令兵丁kā使徒保羅帶tńg來營房保護。

第11節,koh活ê主koh一pái顯chit-má使徒保羅身邊,鼓舞使徒保羅「ài有勇氣」,並且啟示使徒保羅「一定tio̍h tī羅馬」為主做見證。因為chit-ê啟示,使徒保羅決定上訴到羅馬法庭。



重新查詢 專卷研經 使徒行傳系列
錯誤回報,請聯繫