使徒行傳 12章1節 到 12章11節   背景資料  上一筆  下一筆
使徒行傳ná親像一部teh描述早期教會ê受難史,tùi第四章開始,一再提起信徒受tio̍h迫害ê情形。M̄-koh過去ê迫害差不多lóng是來自猶太人宗教領袖,chit-má則來自羅馬當局ê迫害,tùi「希律王下手迫害教會ê一kóa會友」án-ne簡單ê一句話,所beh說明ê意義已經m̄是小khóa,因為這表示羅馬統治當局已經kā基督教信仰定tio̍h「非法ê組織」,看基督徒是擾亂社會治安ê主要分子à。

第1節講「希律王下手迫害教會ê一kóa會友」,這是teh指希律‧亞基帕一世(Herod Agripa I),一般稱伊為亞基帕王。伊是tī主後41年上任,主後44年往生,在世ê時,生活非常糜爛。

第2到5節,chia講希律kā「雅各」殺à。Chit位雅各是門徒之一,mā是耶穌門徒中第一位受難者。Á彼得mā被拘捕,而且準備tī Pôaⁿ過節過了後審問。信耶穌ê人lóng知影,tī苦難中siōng好ê方法就是祈禱。因為án-ne,當彼得被掠ê時chūn,「教會ê兄弟姊妹為tio̍h伊懇切地向上帝祈禱」,這mā是唯一ê方法。

第6到10節,彼得被嚴密ê看守,m̄-koh,無論人án怎嚴密看守,只要上帝出手,chiah-ê看守都無用,ná親像耶穌被埋葬tī墳墓中,mā有羅馬士兵teh看守,上帝iáu-koh ē-tàng tùi死亡中hō͘耶穌koh活。chit-má上帝差派「天使」到監獄中「叫醒」彼得,phah開鎖tiâu伊ê「鐵鍊」。然後天使ài彼得跟tòe伊行,就án-ne,彼得tùi警衛嚴密ê監牢中行了出來。連續過了兩個警衛關卡,一直到外面ê時,天使chiah離開彼得。這lóng說明tī上帝ê帶領下,無論甚麼人jōa-ni̍h-á有力量,mā無法度阻擋上帝beh拯救ê對象脫離苦難kah險境。就親像上帝帶領以色列人民行出埃及仝款。

第11節,彼得中真清楚講出現tī迫害基督徒ê氣力,是來自「希律ê手kah猶太人」,m̄-koh上帝ê天使teh保守彼得免受災害。

重新查詢 專卷研經 使徒行傳系列
錯誤回報,請聯繫