使徒行傳 11章19節 到 11章30節   背景資料  上一筆  下一筆
Chit段經文是真重要ê教會史文獻。

第19到21節,koh一pái提起司提反受難殉教ê事件,有kóa學者認為是第七章54節到第八章3節ê重複記事。若是,chia ê記載顯然是比較清楚。作者講信徒teh迫害之下,遠行到「腓尼基、塞浦路斯,kah安提阿」等地方。除了向猶太人傳福音外,in「mā向希臘人傳講有關主耶穌ê福音」。這mā說明福音ê信息是teh迫害之下擴散到koh khah遠、koh khah闊ê地區。因為án-ne,tú-tio̍h迫害ê時,反tńg ē-sái福音事工增長koh khah快。

第22到26節,koh一pái看見耶路撒冷教會已經成做siōng早期教會時代ê中心,kah-ná有「母教會」ê樣式。當in聽tio̍h福音廣傳Tī頂面所講chiah-ê地區,是「有真chē人信了,歸向主」,原因是有「主ê能力kah in同在」。因為án-ne,in差派巴拿巴去安提阿訪視福音事工發展ê概況。

第23到24節,chia講巴拿巴到安提阿教會,「看見上帝賜福hō͘ hit-pêng ê人,就真歡喜」,伊mā鼓勵眾信徒tio̍h「專心一意信靠主」,連伊tī安提阿ê見證,mā bat幫助真chē人。可見大家對福音信息ê渴慕。

Tī第四章36節作者路加就已經紹介過巴拿巴是塞浦路斯ê利未人,名叫約,眾使徒叫伊巴拿巴,意思是「鼓勵者」。伊賣掉了家己ê一塊田地,kā錢the̍h來, 交hō͘使徒。Á tī chia,作者講伊「是一個好人,被聖神充滿,有堅強ê信心」,mā因為伊ê緣故,hō͘真chē人信了主。

第25到26節,chit兩節真重要,講巴拿巴chhōe掃羅當伙伴,同齊tī安提阿投入福音事工。巴拿巴就是紹介掃羅,而且為掃羅作保hō͘耶路撒冷教會(參考九:27)。Chia講「基督徒」chit-ê名稱是tùi安提阿chia開始ê。其實,原本「基督徒」ê名稱是帶有藐視、戲謔ê含意,m̄-koh mā可能是beh區隔出猶太教徒kah基督徒ê差別。因為羅馬政府承認猶太教,並無承認其他宗教信仰,原因是羅馬政府當teh推動其統治區ê人民,只有ē-tàng信奉羅馬皇帝是in ê神。因為án-ne,當chit-ê「基督徒」名稱被定義出來了後,mā是羅馬政府加入迫害ê開始。

第27到30節,chia講有「幾個先知tùi耶路撒冷下安提阿去」,表示tī早期教會中mā有先知。這mā teh隱喻早期基督教會就是傳承舊約時代,因為án-ne,teh代表舊約傳承落來ê,m̄-nā是tī猶太人中間,mā擴散到外邦人地區à。原因是tùi耶穌ê救恩開始,phah破了族群ê界線。Tī幾位先知中,只有記落來「亞迦布」chit-ê先知ê名。伊得tio̍h聖神啟示,講「天下kā有嚴重ê饑荒」,後來chit件事果然發生,就是tī主後「克勞第」當羅馬皇帝年間,而伊是tī主後41到54年期間執政,發生過糧食欠缺ê災難。因為án-ne,安提阿教會ê信徒lóng踴躍捐輸,然後kā所捐出來ê款項託掃羅kah巴拿巴帶去耶路撒冷。後來,使徒保羅(就是掃羅)無論gōa chē傳福音,lóng會鼓勵當地ê信徒同齊關心耶路撒冷教會貧困信徒ê需要(參考哥林多前書十六:1—3,哥林多後書八:1—4、九:1—2)。伊希望藉tio̍h chit種ê疼,ē-tàng hō͘耶路撒冷教會ê信徒感受tio̍h外邦教會信徒ê疼,而認同in、接納in,hō͘以猶太人做中心ê耶路撒冷教會,kah以外邦人做中心ê安提阿教會,有一個美好ê連結。

重新查詢 專卷研經 使徒行傳系列
錯誤回報,請聯繫