提摩太後書 2章14節 到 2章26節   背景資料  上一筆  下一筆
Tùi第14節開始,使徒保羅koh開始kā提摩太講怎樣教導信徒,特別提醒伊注意tī教會中有kóa人傳達錯誤ê信仰觀念,應該tio̍h禁止chit種錯誤ê信仰認知tī教會內散佈出來,這是伊寫phoe hō͘提摩太ê時,開始就說明寫此書信kah伊要求提摩太繼續留tī以弗所教會ê主要原因(參考提摩太前書一:3—4)。Tī chit段經文中間,使徒保羅特別提起兩個tī以弗所教會內傳播錯誤信仰認知ê人,in ê名就是舒米乃(許米乃Hu-mé-nái) kah腓理徒。

第14節,使徒保羅kā提摩太講,m̄-thang想beh tī信仰上用辯論取勝,因為想beh用辯論hō͘人來信耶穌基督,he是真荒謬ê想法。真正thang hō͘人相信耶穌基督ê,是用真實行動付出ê疼,chiah會感動人ê心(參考哥林多前書第十三章)。

第15節,使徒保羅特別勸勉提摩太三件事:

一是: tio̍h擋會tiâu考驗。意思是teh指m̄-thang受tio̍h誘惑,m̄-nā tio̍h真清楚福音信息,mā tio̍h注意m̄-thang hō͘怪誕ê現象迷惑,致使離開聖經ê教導。

二是:ài做個無愧ê福音工人。這「無愧」意思是無kā家己ê工作看做是一件見笑ê事。

三是:tio̍h正確地講解真理ê信息。注意chia「正確地講解」之詞,是由「直ê」(horthos)kah「切割」(temno)chit兩個希臘字合併起來ê。意思是開拓一條道路,beh kā阻礙ê所在hō͘ in切開,親像穿越山嶺、磅空等,hō͘伊成做一條直ê道路。另外一方面,古早時ê石匠,為tio̍h beh取石材作桌面,就一定tio̍h正確地切開石頭ê面,hō͘伊有筆直而且平滑ê切割面。使徒保羅kā提摩太講teh解釋聖經上mā tio̍h án-ne真適合,主要目的就是hō͘信徒ē-tàng明白聖經ê教示,並進一步koh歡喜閱讀聖經。

第16到18節,tùichit三節經文thang看tio̍h以弗所教會內部ê問題所在,就是hiah-ê專門teh傳講錯誤信息ê人,對當時以弗所教會所造成真大ê影響。使徒保羅m̄-nā講出舒米乃(許米乃Hu-mé-nái) kah腓理徒是當時ê信徒中傳播錯誤信息ê人,而且講出in所傳講ê,就是當時影響早期教會長到三個世紀之久ê「重智派」觀念:耶穌基督無死,mā無koh活。此教派主張肉體是無好ê,因為án-ne,耶穌ê koh活只有靈魂,m̄是肉體ê koh活。這mā就是「使徒信經」chit份影響後來基督教會發展非常大ê信仰告白會出現ê主要原因。

第19節,使徒保羅tī chia強調真正屬tī基督ê教會,其根基是tùi上帝來建造ê,是無可能會搖動ê。使徒保羅bat講耶穌基督就是教會「惟一ê根基」,所有ê基督徒ná親像tī chit根基上建造厝仝款(參考哥林多前書三:9b—15)。伊mā講耶穌基督就是信仰大家庭ê「基石」,所有ê信徒就是連結tī chiah-ê大「基石」之上(參考以弗所書二:20—22),有án-ne穩固ê「基石」,就bē搖動。

第20節,koh一pái hō͘咱看tio̍h使徒保羅言論ê特色,就是kā教會形容成做一間厝、大家庭、身軀等,然後伊說明厝ê基礎,就是耶穌基督,信徒就是kā厝建造tī耶穌基督ê基礎上(參考以弗所書二:20)。使徒保羅努力beh提供一個信仰概念:tī耶穌基督內面,無koh分彼此,所有ê信徒lóng是為tio̍h耶穌基督而來到教會ê中間。

第21節,講tio̍h tī教會服事ê工作中,m̄是teh分「特別」á是「普通」,卻是在tī有潔淨ê心thang為主所用。使徒保羅chit種觀念取自以色列人傳承落來ê一個重要觀念:上帝是聖潔ê,所以上帝ê子民mā一定tio̍h是聖潔ê(參考利未記十九:1—2)。

第22節,chia使徒保羅koh一pái提起提摩太是一個「少年人」,tī前書第四章12節,使徒保羅就bat提醒提摩太別hō͘人看輕伊「少年」。chit-má則是beh伊m̄-thang「意氣用事」,這是teh指hiah-ê少年人所比較容易呈現出來ê「輕浮、虛榮、易怒、好辯論」等毛病,lóng一定tio̍h盡可能避免。Á相對tī chiah-ê輕浮等事,則是beh追求正義、信心、疼心、和平。Chia使徒保羅用ê「追求」chit-ê詞真特別,這原本是teh指如仝一個人出去狩獵,看準了獵物,就盡所有力量一定會kā獵物追到,恐驚小khóa有疏忽而會失去獵物仝款。

第23到24節,thang參考第14節,mā是teh強化第22節所提起ê「少年人意氣用事」。Chia提起「bē-tàng爭吵」,並無表示為tio̍h息事寧人而妥協,卻是有所堅持,不輕易退hō͘。

第25到26節,chia講對信徒tio̍h用「溫柔苦勸對敵ê人」,是teh指像「老母養飼kiáⁿ一般」(參考帖撒羅尼迦前書二:7),是用疼hō͘ in開導,希望對方明白真正要理是甚麼。Ná親像tī第26節所講ê,期待有án-ne ê一工,即使chiah-ê離開教會ê信徒因為行m̄-tio̍h去路,mā會「醒悟」而迴轉過來,án-ne,就bē因感覺見笑m̄敢回頭。使徒保羅並無希望有人因為誤入「歧途」,致使大家ná親像仇敵一般,伊lóng是留hō͘對方有一個回頭ê空間。

重新查詢 專卷研經 提摩太後書系列
錯誤回報,請聯繫