提摩太後書 2章1節 到 2章13節   背景資料  上一筆  下一筆
Chit章thang分做兩個段落來看,一是第1到13節,這是伊對提摩太ê勉勵。二是第14到26節,伊提醒提摩太教導以弗所教會信徒該注意ê事。

Chit段經文使徒保羅勉勵提摩太,tio̍h親像一個「忠勇戰士」,mā像一個「賽跑ê人」。Chit兩項lóng是傳福音ê人一定有ê認bat,只有ē-tàng勇往直前,無法度有後退ê想法á是念頭。這ná親像tī第四章2節所提起ê,無論ê時機是m̄是理想,lóng tio̍h傳福音ê意思。

第1到2節,chia一開始,使徒保羅就beh提摩太藉tio̍h「耶穌基督所賜ê恩典剛強起來」,這是因為使徒保羅chit時是hō͘關tī監獄裡,伊希望提摩太bē因為án-ne受tio̍h影響。並且ài伊學習領受自使徒保羅ê樣式,mā會栽培出ē-tàng信任「交付」福音使命ê人,繼續承接傳福音ê工作。

第3到4節,使徒保羅siōng歡喜使用ê材料之一,就是kā羅馬軍隊hit種雄壯威武ê樣式帶入信仰起來看。Tī伊ê觀念中,一個人若是信耶穌基督,就beh跟tòe耶穌基督ê腳步,chit種人一定會親像一個「忠勇戰士」。因為這是一場屬靈ê戰爭,m̄是一般ê戰爭,若稍有疏忽,信仰ê基礎真緊to̍h會瓦解。

第5節,chit節thang看tio̍h使徒保羅常提起競技場上ê賽跑者,tī chia尤其強調守規矩,這是競技場上siōng重要認知,只有遵守競賽規定而得勝ê人,chiah有真正榮譽thang講。若是有人作假,就ē-sái chit種競賽失去公平ê基礎,án-ne,即使是得tio̍h勝利,mā無法度得獎賞。

第6節,chit節用作穡人種作做譬喻,講作穡人tāi先享受家己辛苦掖種、種作所得tio̍h ê果子。使徒保羅是講「辛勤種作」chit句話,已經講出一個siōng基本ê認bat:天下無白食ê午餐。用tī農事頂面koh khah清楚,因為想beh有好ê收成,就一定tio̍h有辛勞ê種作。

第7節,使徒保羅提醒提摩太,beh好好á「思想」伊chìn前所講ê話,便ē-tàng領悟出一個基本ê認bat:傳福音,bē-tàng pîn-tōaⁿ、懦弱,只有ē-tàng拚命,全力以赴。

第8節,chit節ē-sái講是使徒保羅傳福音ê中心:耶穌基督koh活ê信息。其實,伊tùi一個正港ê法利賽人,變成一個福音工作者,就是kah遇tio̍h koh活ê耶穌基督有bē-tàng分開ê關係。

第9到10節,使徒保羅說明為tio̍h傳福音,伊受苦難是值得ê。因為這苦難,是為tio̍h hō͘所有得tio̍h福音信息ê人,thang藉tio̍h信耶穌基督kah上帝重建合宜ê關係,thang hō͘所有信徒因為án-ne而得tio̍h「拯救kah永恆ê榮耀」。

第11到13節,這是一首簡短ê詩歌,卻是使徒保羅寫hō͘提摩太書信中siōng重要ê一段經文,因為chit首詩歌thang講就是使徒保羅ê信仰告白仝款。使徒保羅tī chia提起幾個重要ê信仰內涵:

一是:耶穌基督koh活,這就是福音。信chit-ê福音ê人,就是kah耶穌基督連結做伙,kah伊同齊「同死」,mā會kah伊「同活」(參考羅馬書六:8)。

二是:為福音tio̍h忍受所有ê苦難到最後,án-ne chiah是真正認bat耶穌基督ê人(參考馬太福音十:32—33)。

三是:上帝乃是個信實可靠ê神,chit點mā是kui本聖經ê中心信息之一。(參考申命記七:9,以賽亞書四十九:7,馬太福音廿三:23,哥林多前書一:9、哥林多後書一:18,帖撒羅尼迦前書五:24、3)。

當聖經講上帝是「信實」ê上帝ê時,chit句話有三種意義:
第一是teh指上帝永遠遵守祂kah人所訂立ê約。無論人是m̄是繼續遵守chit-ê約,上帝永bē改變chit-ê約(參考哥林多前書十:13,帖撒羅尼迦後書三:3,希伯來書十:2)。

第二是teh指上帝ê疼永bē改變。Chit種觀念tī詩篇中一再出現(參考詩篇三十六:5、八十九:1、2、5、24、九十二:15、九十八:3、一○○:5)。

第三是teh指上帝ê審判是公義ê,而這公義有含憐憫ê意義tī內面(參考詩篇九十六:16、一四三:11,以賽亞書十一:5,約翰一書一:9)。

重新查詢 專卷研經 提摩太後書系列
錯誤回報,請聯繫