撒母耳記下 8章1節 到 8章8節   背景資料  上一筆  下一筆
Chit章記載有關大衛王軍事爭戰記錄,並m̄是tī伊建造王宮了後chiah有ê,ná親像第五章17到25節大衛被北部以色列支派代表膏立為王了後,非利士人就趁機會出兵攻打,想beh阻止大衛統治以色列全國,m̄-koh非利士人失敗à。因為án-ne,若是kā第八章ê經文編輯tī第五章了後,讀起來會koh khah通順。

M̄-koh mā有另外一種看法,認為大衛統治以色列全國了後,真想擴張國家領土,有kóa人tòa tī kah非利士人附近ê邊界,不時受tio̍h非利士人ê干涉攪擾,mā有部分邊界城市iáu被非利士人侵佔tio̍h,就án-ne,伊tī整頓以色列國政了後,就積極beh安定chiah-ê邊界城市,因為án-ne,大衛m̄-nā是派兵出征非利士人,連來侵入騷擾ê摩押人,大衛lóng一併征討。Á chit段有關大衛征討附近國家、族群ê戰績,mā同時記載tī歷代志上第十八章1到17節。

Chit段經文講述了大衛王討伐ê對象,包括有非利士人、摩押人、瑣巴、敘利亞,並且得tio̍h真chē戰利品。

第1節,tī大衛開始服侍掃羅王了後,直到伊統治以色列國,只要伊出兵征戰,非利士人lóng會敗tī伊ê手下,這mā是非利士人一直想beh chhōe機會擊垮大衛威名ê原因,就tī伊被膏立為北部以色列人ê王ê時,非利士人隨時就出兵,m̄-koh,無成功。chit-má是大衛主動繼續進攻,主要原因是頭前所提過ê beh安定邊界。根據歷代志上第十八章1節ê記載,此役大衛佔領了「迦特城kah附近庄頭」。

第2節,摩押人是羅得kah cha-bó͘-kiáⁿ亂倫所生ê kiáⁿ孫(參考創世記十九:37)。In khiā起tī死海ê東邊,掃羅bat kah in交戰(參考撒母耳記上十四:47)。大衛逃亡期間,mā bat請求摩押人協助庇護伊ê父母(參考撒母耳記上廿二:3—4)。Tùi路得記第四章17節ê記載,咱thang知大衛ê祖先kah摩押人有密切關係。照常理來講,大衛kah摩押人之間應該有真好ê互動關係chiah-tio̍h,m̄-koh卻m̄知何因,二者之間kah-ná有深仇大恨,chiah hō͘大衛用「量二繩長ê刣死,hō͘量一繩長ê存活」殘酷作法惡待摩押人。Mā因為án-ne殘酷ê手段,hō͘摩押人tī大衛時代,差不多m̄敢輕舉妄動,只有ē-tàng歸順伊ê統治,並且得年年向伊進貢。

第3到4節,瑣巴國是tī以色列ê北部地區ê國家。大衛趁瑣巴王哈大底謝想beh奪tńg來in原本ê土地ê時phah敗in,in原本tòa tī幼發拉底河地區,是中東地區siōng肥土地之一,創世記甚至kā該處描寫ná親像「伊甸園」súi(參考創世記二:14)。大衛佔領chit塊土地,對tī伊統治之下ê國度,一定有非常重要ê意義,因為了後以色列人民就無缺水ê顧慮。大衛下命令只有留落來可拉一百輛戰車ê馬匹,其餘ê馬匹lóng kā腳筋砍斷而殘廢。伊會án-ne做,就以現代ê語言來講,等於是「解除武裝」仝款,為tio̍h是beh hō͘瑣巴國完全無抵抗ê武力。Chit種作法kah當年約書亞攻打當時迦南地ê聯軍,採取ê態度是仝款ê(參考約書亞記十一:6)。

第5到8節,原本大衛並無teh想beh攻打敘利亞人,因為敘利亞來支援哈大底謝,chiah hō͘大衛一定tio̍h趁勢打擊。敘利亞會來支援,真可能當時幼發拉底河沿岸ê真chē族群tī政治、軍事頂面ê聯盟有關。Á對大衛來講,chit場勝利,mā確實對kui個幼發拉底河地區ê其他族群產生警惕作用。特別是tī chit pái戰爭中,大衛ê軍隊刣死兩萬三千敘利亞軍隊,chit場戰爭勝利了後,大衛直接派軍進駐這流域,hō͘「in lóng歸順大衛」,這意義非常特殊,因為chit地區差不多就是迦南地ê「糧倉」。M̄-nā án-ne,大衛mā tùi瑣巴人ê城市—「比伊」、「比羅伊」這兩城市得tio̍h大量ê銅,後來chiah-ê lóng成做建造聖殿siōng好ê建材。

重新查詢 專卷研經 撒母耳記下系列
錯誤回報,請聯繫