撒母耳記下 7章1節 到 7章17節   背景資料  上一筆  下一筆
Chit章有兩個重要ê主題:一是大衛王朝ê延續性(第1到17節)。二是大衛王向上帝祈禱,表白伊心內ê意念(第18到29節)。基本上,因為大衛政權已經穩定,特別是外患差不多無koh出現,因為án-ne,建造王宮了後,大衛隨時想tio̍h家己khiā起tīsúi ê王宮,上帝ê約櫃卻一直存在簡陋ê帳棚中。伊án-ne想並無錯,m̄-koh聖經ê教導是:聖殿屬tī敬拜上帝ê場所,特別是約櫃是teh代表上帝,因為án-ne,應該由上帝主導chit件事,chiah是正確之道。因為án-ne,上帝主動透過先知拿單傳達信息hō͘大衛,表示上帝並無希望伊建造聖殿。M̄-koh上帝卻應允beh hō͘伊ê kiáⁿ孫傳承王權。大衛因為án-ne而去聖幕裡向上帝獻上感恩ê祈禱,mā等於是表白伊對上帝ê忠實。

Chit段是有關大衛原本計劃beh為上帝建造聖殿,好安置約櫃。M̄-koh上帝差遣先知拿單去傳達信息,表示大衛並m̄是為上帝建造聖殿ê人,m̄-koh上帝賞賜特殊ê恩典hō͘大衛,beh hō͘伊ê kiáⁿ孫傳承治理以色列人民ê王權地位。因為án-ne,tùi chit段經文中thang看出上帝對大衛ê特別厚愛,teh應允beh hō͘伊ê後代永遠掌權落去。大衛mā ē-sái講是以色列諸王中,唯一有得tio̍h上帝chit種應允ê王。

Chit段經文mā同時記載tī歷代志上第十七章1到15節,對照chit兩段經文來看,會發見內容差不多lóng仝款。主要teh說明:上帝並無需要一間富麗堂皇ê聖殿,過去以色列人民tī曠野漂流ê時,in tòa tī帳棚內,上帝mā是kah in tòa做伙tī帳棚內,四界移動。

第1到2節,大衛執政ê時代,「上主hō͘伊享太平,無受仇敵ê侵擾」,chit句話thang tùi第八章1到14節描述大衛tī軍事頂面ê勝利之記事看出來。Án-ne,thang理解大衛想beh建造聖殿,並m̄是停止teh構思,卻是已經準備著手進行一段時間,親像勘查土地等等(參考歷代志上廿二:1)。Thang看tio̍h當伊kā約櫃引進耶路撒冷ê時,就已經開始有chit種想法,taⁿ伊向先知拿單說明這想法,這mā thang看出chit時ê先知,無koh是親像先知撒母耳時代是國家政事ê決定、制訂者,chit-má ê先知是參謀者。

第3節,chit節thang看出有kóa先知並無先詢問上帝,就直接回答à。先知拿單chia所講ê話就是一個好例。Á這mā說明這是關係敬拜上帝ê事,而且牽涉ê是teh代表上帝同在ê約櫃。因為án-ne,先知拿單所回答ê,tú好說明伊ê回答是屬tī家己ê意見。

第4到7節,chit段上帝啟示先知拿單ê話,thang講teh代表kui個耶和華宗教信仰ê精髓—上帝並無在意人ê手所建造敬拜祂ê殿宇,mā bē有chit種要求。因為真實、敬虔ê宗教心chiah是siōng重要ê信仰告白。因為án-ne,上帝ài先知拿單回應大衛想beh建造聖殿ê話,講伊「m̄是建造殿宇hō͘我(上帝)tòa ê人」,撒母耳記作者用chit句話真直接了當。Á歷代志作者則禁止ê語氣—「bē-tàng」。Koh講,上帝表示即使早年帶領以色列人出埃及入曠野了後,上帝就一直跟tòe in「四界移動」。因為án-ne,重點並不在有無殿堂,卻是在tī遵行上帝ê教示。Ná親像先知撒母耳teh責備掃羅擅做主張所講ê話仝款(參考撒母耳記上十五:22)。

第8到9節,chit兩節mā是hō͘大衛真大ê兩項應允,一是表明無論大衛gōa chē,上帝lóng tio̍h kah伊同在。二是上帝beh賞賜hō͘大衛能力,hō͘伊kah「世界上siōng偉大ê王」同列。第9節ê「我擊敗了你所有ê仇敵」chit句話,表示m̄是大衛有甚麼本領ē-tàng phah敗仇敵,卻是因為上帝ê協助、出手,chiah hō͘以色列人民ê仇敵,特別是非利士人,lóng因為án-ne而驚惶大衛。

第10到11節,chit兩節mā是teh回應chit章第1節。除了表示beh hō͘以色列人tī迦南地khiā起bē koh再發生有外族侵犯ê事發生。Koh講,是beh賞賜hō͘大衛有「後嗣」,chit-ê詞ê意思,就是大衛ê kiáⁿ孫kā繼承伊ê王位(參考第16節),chit點mā說明大衛kah以掃完全無相仝。

第12到13節,上帝hō͘大衛ê應允,是beh hō͘伊「立一個kiáⁿ做王」,這mā說明以色列人民ê王,是上帝親自揀選。Chit種國王、領導者所治理ê國度chiah會「強盛」,卻m̄是用人ê計謀來得tio̍h。可惜,後來大衛並無詢問上帝tī一大陣kiáⁿ中間,該揀選甚麼人出來繼任伊做王,卻是家己聽拔示巴ê話而選了所羅門。Á tī chia真清楚表示繼任伊做王ê人,chiah是建造聖殿ê人。M̄-koh伊iáu是真用心地為所羅門準備建造聖殿所一定tio̍h有ê土地、建材(參考歷代志上廿二:1、2—5)。Án-ne,tī某一個方面來講,大衛mā是參與了聖殿建築ê工作。

第14到16節,「我beh做伊ê老父;伊beh做我ê kiáⁿ。」這是立約ê語句。表明上帝beh kah大衛ê kiáⁿ同在,而且會親自管教。Koh講,上帝koh一pái表明beh賞賜hō͘大衛kiáⁿ孫hō͘ in永遠做領導者。

第17節,chit節講出一個忠實ê上帝奴僕—先知,應該有ê基本態度,就是kā上帝所交帶ê話,照實講出來(參考列王記上廿二:14)。

重新查詢 專卷研經 撒母耳記下系列
錯誤回報,請聯繫