撒母耳記下 24章10節 到 24章25節   背景資料  上一筆
Chit段經文講述大衛後來發見因為chit項人口調查行動,引起上帝極大ê憤怒,致使以色列全國發生嚴重ê瘟疫,死亡慘重,為tio̍h án-ne,伊走chhōe上帝ê赦免憐憫,透過獻平安祭kah燒化祭,chiah挽回上帝ê憤怒,m̄-koh為ê時已晚。這mā說明一個重要ê教示:若m̄是出tī上帝ê旨意,á是符合上帝ê旨意,án-ne,執意堅持行家己ê路,其結果kan-taⁿ會帶來koh khah大ê災難而已。

Chit段記事thang對照歷代志上第廿一章7到30節來看,就會發見歷代志作者特別強調,瘟疫ê事件,m̄-nā是大衛主謀,連伊身邊ê參謀lóng連帶有份,因為án-ne,「大衛kah眾長老lóng穿tio̍h麻衣,面伏tī土腳叩拜」,表示in lóng一定tio̍h為tio̍h án-ne事件所帶來ê瘟疫災難負責。

第10到13節,後來災難發生,chiah喚醒大衛知影家己堅持ê chit項人口調查政策,確實是違背上帝ê旨意,hō͘上帝無歡喜,因為án-ne決定beh懲罰以色列。伊可能是因為看見瘟疫開始出現,趕緊透過祭司獻祭詢問上帝ê時(參考撒母耳記下廿一:1),chiah明白過來,知影家己做件愚戇ê事。上帝差遣先知「迦得」去見大衛,傳達上帝ê話hō͘大衛。伊向大衛提出上帝beh tùi三項懲罰ê方式中hō͘大衛家己選擇。

第一項是「國中有三年饑荒」。

第二項是大衛tī「敵人面前逃亡三個月」,意思是phah敗仗逃難。

第三項是「國中有三工ê瘟疫」。

這三項lóng有「三」ê數字,tùi「三年」到「三個月」,再到「三工」。

第14到16節,大衛表示寧可接受上帝親自對伊懲罰。大衛深知當上帝懲罰違背祂旨意ê子民ê時,痛苦ê哭號聲,上帝會垂聽。因為「上主有豐盛ê憐憫」,chit點是kui本聖經ê主題(參考出埃及記三十三:19、三十四:6,詩篇八十六:5、一0三:8、但以理書九:9)。因為án-ne,大衛做chit種選擇後,上帝就差派天使去執行chit項懲罰,方式是用降瘟疫tī以色列人民身上,直到上帝beh天使停止為止。雖然只有短短ê三工而已,死亡人數卻chē kah「七萬以色列人死亡」。

問題是:為何大衛犯罪,卻由人民承擔罪責?án-ne是m̄是公平?這是讀者歡喜問ê問題。其實,mā thang án-ne了解:當君王á是領袖做出錯誤 ê政策ê時,確實就是整體人民teh承擔苦難。古往今來lóng是án-ne。因為chiah-ê制訂政策,而且kā政策執行出來ê時,直接影響tio̍h ê就是普羅大眾。因為án-ne,人民若是對tī 錯誤 ê政策,無勇氣出來阻止、對抗,其結果是等於「參與執行、配合錯誤」之政策。

第17節,歷代志作者tī chia提供真重要ê資料,就是大衛看見天使「手中掠tiâu劍,teh beh毀滅耶路撒冷」,就tī chit時,「大衛kah眾長老lóng穿tio̍h麻衣,面伏tī土腳叩拜。」這mā表示眾長老知影,大衛進行戶口調查ê事所引起之「瘟疫」災難,in mā需要負起重大責任。因為án-ne,in同時kah大衛lóng用siōng真誠懺悔ê心意,祈求上帝ê憐憫kah赦免。Tī chia,大衛對執行chit項懲罰任務ê天使講,是伊犯錯應該懲罰伊kah伊ê全家,卻m̄是懲罰無辜ê人民。

第18到23節,先知迦得koh一pái傳達了上帝ê信息,hō͘大衛知影願意接受伊認罪。因為án-ne,ài大衛tī耶布斯人亞勞拿 ê phah麥場,建造一座祭壇敬拜上帝。大衛照天使ê指示去chhōe亞勞拿,希望買伊ê phah麥場建造一座祭壇,thang hō͘上帝懲罰ê瘟疫停落來。亞勞拿一聽大衛án-ne講,認為大衛是故意án-ne講,其實,若大衛真正ài伊ê土地,伊mā無可能抗拒。因為án-ne,伊表示ē-tàng全部lóng送hō͘大衛,包括tī phah麥場頂面ê牛mā thang刣之當做牲祭獻hō͘上帝,koh有phah麥板thang當之祭壇ê柴火。因為伊知影,掠準kah大衛討論價錢,贈送有可能iáu thang保全性命安全。

第24到25節,m̄-koh大衛堅持beh「按價錢」向亞勞拿購買伊ê phah麥場。原因是伊無想beh佔亞勞拿 ê sio̍k。因為若是佔別人sio̍k所得tio̍h來奉獻,等於是teh藐視上帝ê神聖。Koh講,大衛已經因為「瘟疫」ê事件惹起上帝憤怒,taⁿ,若tī奉獻ê事頂面無用真誠懺悔之心意來表明,恐驚chit pái ê「瘟疫」之災真oh消除。就án-ne伊用「五十塊銀á」向亞勞拿買phah麥場kah獻祭ê牛隻。這數目kah歷代志作者所提供ê「六百塊金幣」,相差實在siuⁿ大。有一種解釋,認為大衛m̄-nā買phah麥場,連附近kui片地lóng買了落來。因為伊準備以後用該片土地做建造聖殿ê路用。就án-ne,大衛買了土地,進行一場獻「燒化祭和平安祭」(參考利未記七:11—17、廿二:21—23)ê祭祀禮儀,chit種「祭」表示kah上帝之間ê關係和諧(參考出埃及記廿四:5、11)。因為上帝「垂聽」了大衛為以色列全國ê祈禱,這表示以色列人民kah上帝之間koh有和好關係,所以作者用「瘟疫就tī以色列停止了」做結束。Chit-ê結尾,ná親像第廿一章14節所講ê:「上帝垂聽in為國家ê祈禱。」

重新查詢 專卷研經 撒母耳記下系列
錯誤回報,請聯繫