撒母耳記下 22章1節 到 22章31節   背景資料  上一筆  下一筆
Chit首詩歌差不多kah詩篇第十八篇仝款,只是tī詩篇第十八篇只有50節,tī撒母耳記則有51節,加出來ê chit節是撒母耳記下廿二章第1節,tī詩篇是用「說明」á是「簡介」方式編輯,並無算是經文本身。

Chit首詩篇有一個lóng受討論ê問題:到底是先有詩篇第十八篇,iáu是先有撒母耳記下第廿二章?toh一個是比較原始ê版本?這問題到chit-má都無明確ê定論。有bē少詩篇ê學者認為,chit首詩歌thang來確定是出tī大衛ê手筆,因為這是大衛teh歌頌上帝ê救恩而寫ê詩歌。Ná親像第1節所講,這是大衛teh頌讚上帝救伊脫離「仇敵kah掃羅之手」而寫ê。如果chit首詩歌確定是大衛所寫ê詩歌,án-ne,chit首詩特別是teh描述伊帶兵出征真chē族群,建立以色列帝國ê時期,四界出世入死ê征伐,若無上帝ê帶領kah庇護,伊ê性命無辦法得tio̍h安全。Á ná親像第1節所講ê,大衛ê仇敵mā包括了一再想出所有ê辦法beh追殺伊ê掃羅,因為掃羅認為只要有大衛tī teh,伊就無法度順利kā王位傳hō͘家己ê kiáⁿ約拿單。掃羅就bat因為約拿單替大衛講話,而怒罵約拿單無瞭解情況(參考撒母耳記上二十:31)。撒母耳記上tùi第十九到廿六章,清楚記載掃羅想beh盡一切辦法beh除掉大衛,都無成功。因為上帝tùi中庇護ê緣故,chiah致使大衛ē-tàng脫離掃羅ê迫害。

有一種講法認為會kā Chit篇詩歌編輯tī-chia,是因為chit首詩歌siōng ē-tàng代表大衛ê心境:伊是一個心胸開朗,有勇氣kah智慧ê君王。

這部分ē-sái講是對上帝ê感恩。詩人感謝上帝tī伊tú-tio̍h仇敵圍困ê時,伸手來拯救伊。

第1到4節,詩歌ê開始就講chit首詩歌是大衛寫ê,而且特別強調是tī大衛「脫離掃羅kah其他仇敵ê手ê時」寫ê。Chia講「其他仇敵」,是teh指所有kah大衛有過戰事ê外族人,m̄-koh並無包括伊ê kiáⁿ押沙龍。因為chit首詩歌應該是寫tī押沙龍叛亂chìn前,mā就是大衛統治kui個以色列民族了後ê時代。Tùi這幾節詩歌中thang看出大衛用kúi-nā種方式,包括有「巖石kah堡壘」、「避難所」、「盾牌」、「力量」、「要塞」等來形容上帝是伊性命中siōng好ê óa靠,hō͘伊脫離仇敵ê攻擊kah威脅。

第5到7節,tī chia大衛用「死亡ê水湧」、「毀滅ê急流」、「陰間ê絞索」、「墳墓ê網羅」等詞句,來形容伊tī性命ê旅途中,有kúi-nā-pái tú-tio̍h幾近「死亡」ê威脅,m̄-koh lóng因為上帝奇妙ê帶領chiah得適ê時地化解危險而ē-tàng存活落來。Á tī hiah-ê幾近死亡ê威脅中,大衛講伊siōng好ê óa靠對象,就是上帝;chit位上帝會垂聽苦難者祈求ê聲音。伊用「擬人化」ê筆法,寫出上帝有「耳á」,會垂聽人ê祈禱聲音。

第8到16節,是teh回應第7節所歌頌ê,大衛向上帝祈求,上帝便垂聽伊祈求ê聲音,隨時就有具體ê回應。Tùi chit段詩歌thang看tio̍h上帝顯現ê景象,是kui個天地lóng變了色,甚至連山kah地lóng搖動。Chiah-ê景象包括了出現烏雲、冰雹、sìh-nà,ná親像in出了埃及進入曠野後,行過紅海ê時,上帝用大風吹開了海水,kui個紅海ê海底就裸露出來,thang hō͘以色列人民順利而平安地行過去(參考出埃及記十四:19—29)。Á當以色列人民行到西奈山腳ê時,in雖然無親目看見上帝,m̄-koh tùi聽見轟轟ê雷聲響,看見山頂上有濃煙升起,以色列人民就清楚知影he是上帝「親自降臨」ê景象(參考出埃及記十九:16—19)。類似chit種描述ê詩歌,mā一再出現tī詩篇中,親像詩篇第五十篇3節、第七十七篇16到19節、第九十七篇2到5節、第九十九篇1節。聖經作者mā不時用天地變色ê景象來描述上帝顯現而且進行審判。其實大衛tī chia並m̄是beh講述以色列人出埃及ê故事,而是beh見證每pái以色列人民tú-tio̍h敵人ê侵犯,面臨亡國,甚至人民可能會hō͘敵人掠去ê時,上帝親自出來為chit-ê民族、國家解圍。因為án-ne,伊引用了祖先出埃及ê經歷,來描述上帝施行奇妙ê拯救,hō͘以色列民族會得thang脫離險境。

第17到19節,是大衛teh見證上帝tī伊siōng危急ê時刻,伸手拯救伊脫離仇敵殺害ê危險。Tī以色列人民ê觀念中,大水就是邪惡勢力ê聚集處,表達出來ê意義就是混亂、危害性命。詩人形容chiah-ê仇敵lóng ná親像大水一般ê強大,佳哉,有上帝庇護chiah倖免tī難。

第20到25節,tī chit段詩歌中,詩人m̄-nā用相對句型,親像第22節ê「遵行」kah「背叛」、「遵守」kah「棄sak」。Mā用對應句,親像第21節,伊講tio̍h家己ê「正直」,上帝ê回應就是「賜福」,hō͘伊ê「無辜」得tio̍h補償,koh親像「正直」kah「清白」是對應句。詩人表示伊知影上帝會為「無辜」者伸冤,mā會照人ê「正直」,用仝款ê恩典報償hō͘人。不過大衛講伊一直遵守tio̍h上帝ê律法,「m̄-bat棄sak伊ê命令」,tùi chit句thang看出chit首詩歌是寫tī大衛tī犯姦淫罪chìn前。當伊犯淫亂罪了後,chit句話就無法度成立。

第26到28節,第26節mā ē-sái講是非常重要ê一節詩歌,大衛tī chia特別提起上帝會「以信實待信實ê人」。「信實」,tī聖經中所表達ê意思是teh指上帝一定會「守約」。上帝kah人之間有約,不管人怎樣看待約,上帝一定會堅持守tiâu祂kah人所立ê約,chit-ê認bat是非常重要ê。「信實」mā有另外一個意思,是teh指上帝ê「慈愛」。甚麼人用慈愛來見證上帝ê慈愛,上帝mā會用仝款ê慈愛來賜福chit種人。大衛mā用chit-ê詞teh見證:上帝絕對bē虧待遵行祂ê旨意ê人。詩人mā講純潔ê人,上帝回應ê方式mā是「純潔」,m̄-koh若是邪惡者,上帝就會敵視chit種人。值得注意ê是上帝會伸手拯救「卑微ê人」,m̄-koh卻會「敵視並貶低高傲ê人」。

第29到31節,chia ê「明燈」kah「烏暗」是對應話句。「明燈」,表示性命ê希望(參考詩篇廿七:1),表明上帝拯救ê意思(參考以賽亞書九:2)。相對ê,「烏暗」就是teh表示性命陷入死亡ê威脅,性命ê希望幻滅。當大衛kā家己委身tī上帝手上ê時,每pái伊出征,上帝就會賞賜hō͘大衛夠額ê氣力抵抗強敵,甚至降服對敵者。

第31節,為第2到30節chit段詩歌做一個結語。主要teh表明:上帝ê話是可靠ê,ná親像一面盾牌,óa靠上帝ê人,一定會得tio̍h庇護。因為祂堅守任何民族、國家kah祂之間所立ê約。

重新查詢 專卷研經 撒母耳記下系列
錯誤回報,請聯繫