撒母耳記下 21章15節 到 21章22節   背景資料  上一筆  下一筆
有關大衛帶領以色列人民kah非利士人之間ê戰事,tī撒母耳記中ê記錄非常chē,tùi伊年少時chūn phah倒歌利亞(參考撒母耳記上十七:41—54)開始,續落來tī第十八章30節大衛每pái帶兵對抗非利士人,lóng有「輝煌ê戰果」。Á當大衛繼位為以色列ê王了後,非利士人隨時來挑釁,m̄-koh mā是hō͘大衛phah敗(參考五:17—25),後來撒母耳記下第八章1節,雖然是真簡單ê一節,m̄-koh用了「大衛koh再攻擊非利士人,phah敗in,結束loh in tī chit塊地上ê統治」chit句話,說明非利士人tī大衛統治期間,已經m̄是以色列人ê主要外患tio̍h。因為án-ne,chit段資料真可能就是第五章25節ê延續。

第15到17節,chit段經文是大衛攻打非利士人戰役ê總論。作者用「大衛疲乏了」chit句話,說明大衛已經無koh少年力壯,尤其是面對高大強猛ê非利士人,需要少年ê一代來接棒。Chia講有一個「巨人」名叫「以實‧比諾」,伊真親像歌利亞,伊「想刣死大衛」,佳哉有「洗璐雅ê kiáⁿ亞比篩過來協助」,真無簡單chiah地chiah kā「以實‧比諾」刣死。後來大衛身邊ê輔佐大臣要求大衛以後mài koh再kah in出征,「免會得thang色列ê燈火被熄滅」。Chit句「免會得thang色列燈火熄滅」,意思是無希望大衛王朝因為án-ne瓦解、毀滅。「燈」,表明家庭、家族,á是種族ê意思。

第18到19節,這是第二場戰役,地點是tī「歌伯」,chit-ê所在真靠近基色。這是另外一個非利士巨人名叫「撒弗」,這巨人名tī歷代志上第二十章4節所記載ê名是叫「細派」。Á第三場戰役ê地點mā是tī歌伯,chit pái ê主kā是「伯利恆人睚珥ê kiáⁿ伊勒哈難」,伊刣死了一個「迦特人歌利亞」。Tī歷代志上第二十章5節soah講,被刣ê是「迦特人歌利亞ê兄弟拉哈米」。

第20到21節,這是第四場戰役。地點是tī「迦特」,chit-ê城是非利士人五個城市中ê一個。Chia並無講出「巨人」ê名,歷代志上第二十章6節只有講伊是「古早時巨人ê後代」。Chit-ê巨人來「向以色列人挑戰」,án-ne ná親像當時歌利亞向以色列人挑釁ê行動仝款(參考撒母耳記上十七:4、16、23)。Á chit pái出來應戰ê,是「大衛ê兄哥示米亞ê kiáⁿ約拿單」,伊kā chit-ê巨人刣死。

第22節,chit節為chiah-ê戰役做一個總結,認為chiah-ê非利士人,lóng是屬tī「迦特人」,in lóng是「巨人ê後代」。若是「巨人」所表示ê是強猛壯碩,án-ne,大衛身邊有迦特人做侍衛軍(參考十五:18),mā thang想像會tio̍h,in是大衛siōng好ê侍衛,戰力並無輸hō͘掃羅時代ê便雅憫人。

重新查詢 專卷研經 撒母耳記下系列
錯誤回報,請聯繫