撒母耳記下 15章13節 到 15章37節   背景資料  上一筆  下一筆
Tùi chit段經文直到第十六章,是teh描述大衛帶身邊重臣、隨從、tòe扈等人逃離王宮,mā tùi chia thang看出並m̄是所有ê人lóng討厭大衛,因為伊tī以色列民間iáu享受極大ê榮譽,所謂「患難見真情」,thang tùi大衛落難ê時ê處境看會出來。值得注意ê是:大衛逃難出城ê時,連「約櫃」mā同齊扛行。Á約櫃是以色列人信仰ê中心,teh表示上帝ê同在。因為án-ne,這mā說明大衛雖然逃離耶路撒冷,m̄-koh上帝並無離開伊。

第13到16節,大衛一直tòa tī深宮中,因為án-ne並m̄知外面ê情況,mā無聽tio̍h奇異ê號角聲響,因為án-ne,當有「使者」知影chit件事,特別來向伊報信,講人民ê心lóng向押沙龍à。這應該是件非常嚴重ê訊號,必定hō͘大衛大tio̍h驚,甚至措手不及。當大衛知影押沙龍既然膽敢設計殺害兄哥暗嫩,mā bē對其他ê小弟手軟,á是會存有任何親情之心。因為án-ne,伊ài所有ê臣僕隨時kah伊離開王宮,免得遇tio̍h無故殺害。伊「只有留落來十個妃嬪看守王宮」,其餘ê臣僕、厝內人lóng kah跟tòe大衛,這mā表示宮中ê臣僕對大衛iáu-koh忠實,無跟tòe押沙龍叛亂起舞。Tùi chia mā thang看出宮廷內臣對tī押沙龍ê所做所為並m̄是完全認同,若無,chiah-ê大臣一定會倒戈,拒絕跟tòe大衛出宮。

第17到18節,chia提起「城郊最後一座厝」,這可能是防守耶路撒冷邊防ê軍營要寨,tùi án-ne大衛chiah會tī出城chìn前,利用chit所在進行一pái校閱。Chit對大衛來講真重要,伊thang掌握身邊忠實tī伊ê部隊數量,特別是伊身邊ê chiah-ê侍衛lóng是外籍傭兵,因侍衛長就是「耶何耶大ê kiáⁿ比拿雅」(參考八:18),伊負責大衛身邊ê侍衛工作。有「六百個tùi迦特城來」ê非利士人跟tòe tī大衛身邊,chiah-ê人就是大衛身邊ê侍衛。大衛會用外籍兵團ê當貼身侍衛,mā算是一種創舉,因為in無容易受tio̍h當地政治局勢轉變ê影響,chit時tú好派上用場。大衛hō͘ chiah-ê身邊ê侍衛tùi伊面前過去,像進行一場「閱兵」儀式,ē-sái講是非常重要,thang強化chiah-ê人對伊ê忠chiâⁿ。

第19到20節,chiah-ê非利士人侍衛隊領袖是「以太」,大衛伊帶部下tńg去留tī新王hia,其實,大衛chit句話就是teh試看in是m̄是iáu忠心tī伊。若是忠實,即使人數無chē,mā足以成做一股強大勢力。若m̄是,就算擁有萬計兵馬mā是枉然。原因是傭兵kan-taⁿ會致意糧餉、待遇chē少?因為傭兵相刣,並m̄是為tio̍h家己ê國家,卻是kā它當做生活kah工作ê一部分。chit-má大衛kā以太講,伊連家己beh「gōa chē」lóng m̄知。原因是押沙龍ê叛變是tī lóng無預警之下發生,hō͘伊措手不及。大衛chit種講詞,mā teh表示家己ê無奈,同時mā teh暗示伊可能有財力上ê困境,跟tòe伊ê侍衛兵團可能會有the̍h bē-tio̍h佣金ê結果。

第21到23節,m̄-koh以太kah其他六百名迦特侍衛兵用chiù-chōa ê方式,來表示堅持beh跟tòe大衛。「是生是死」in lóng願意「跟tòe」,這是非常難得ê態度。大衛tī知影chiah-ê侍衛兵團ê決心了後,就無koh懷疑in,帶in kah in ê「眷屬」遠離耶路撒冷城。當人民看見大衛離開ê時,已經知影發生政變,chit時「人民lóng放聲大哭」,可見iáu是有真chē民眾支抱大衛。

「汲淪溪」,這是設tī耶路撒冷城ê東面,除了雨季外,其餘時間lóng是乾涸ê狀況。因為án-ne,大衛in ē-tàng順利行過chit條溪,過了chit條溪,就是橄欖山。而且koh khah重要ê,即使押沙龍beh追殺過來,tú好佳哉耶路撒冷kah橄欖山之間,有一個汲淪溪chit-ê山谷隔閡tio̍h,無論toh方tio̍h用兵,lóng需要花一kóa時間。對大衛來講,伊需要重整軍伍,計劃攻擊ê用兵策略,因為án-ne,來到橄欖山,thang hō͘家己有一個緩衝時間kah空間。然後,tùi chia行往耶利哥大道,朝向東北方ê巴戶琳(參考十六:5),就ē-tàng直通約旦河谷。

第24到29節,chit段經文非常重要,因為連「撒督祭司」,kah「扛約櫃ê利未人mā kah伊」,in是kā約櫃扛出來跟tòe大衛行,這說明大衛並無bē記得需要上帝ê帶領。因為約櫃表明上帝ê同在。只要有上帝同在,即使tī苦難中mā會得tio̍h氣力支支持落去。Á約櫃mā是凝聚以色列人民心靈ê siōng大力量。約櫃kah大衛做伙,mā說明大衛有上帝ê同在。Án-ne,即使押沙龍得tio̍h了政權,卻會失去人民心靈力量ê支撐,得tio̍h了政權,mā bē有安定ê心靈生活。

M̄-koh另外一方面,mā看tio̍h大衛ê看法kah眾祭司真無仝款,mā顯示出大衛tī信仰上有真明確ê認bat—有約櫃,並無表示有上帝同在。若m̄是上帝所歡喜,即使有約櫃,mā無任何意義thang講。因為án-ne,伊下令tio̍h kā約櫃扛tńg來耶路撒冷去。大衛講願意跟tòe上帝ê旨意做tāi-chì,卻m̄是用約櫃當做工具,作「挾持」上帝旨意之利器。其實,大衛ài眾祭司tńg去,顯然是有特別ê用意,m̄-nā是ài in繼續扮演祭司ê角色,甚至iáu有ài in當「線民」ê用意。因為án-ne,chia講「你m̄是先見mah」,chit句話並m̄是講in是「先知」,卻是講chiah-ê祭司teh執行祭司職務ê時,會koh khah清楚kui個耶路撒冷ê實況。Án-ne,in thang kā所得tio̍h ê消息傳去hō͘大衛。因為án-ne,伊hō͘眾祭司一個會合見面ê地點—曠野ê渡口,這是tī吉甲附近約旦河邊ê渡口。就án-ne,撒督kah亞比亞他chit兩位大祭司接受大衛ê命令,就帶利未人kā約櫃扛tńg來耶路撒冷城。

第30到31節,「橄欖山」,這是過了汲淪溪了後,thang遙望耶路撒冷城ê一座山丘,大約海拔八百公尺ê小山。Chit-ê山會號名「橄欖山」,顧名思義就是該山是kui片山丘lóng種植橄欖樹,內面有一個園子稱做「客西馬尼園」(參考馬可福音十四:32)。chit-má大衛來到chia山,可能想beh先隱藏,躲過chit pái ê叛亂風波。伊用「蒙tio̍h頭」chit種方式表達心中ê見笑、艱苦心ê意思(參考耶利米書十四:3—4),mā用「光tio̍h腳」,表示卑微、悲傷、悽慘ê意思(參考以賽亞書二十:2、4,以西結書廿四:17),而所有跟隨者mā kah伊仝款ê光tio̍h腳,蒙頭啼哭行上山。當伊知影身邊ê顧問「亞希多弗」mā加入押沙龍ê叛變陣營後,必定是非常悲傷,因為亞希多弗確實是一個真棒ê謀士(參考十六:23),因為án-ne只有ē-tàng祈求上帝mài hō͘亞希多弗ê計謀成功來歡喜。

第32到37節,chia講亞基人「戶篩」,是大衛忠實ê朋友,伊mā是大衛朝廷中ê重要官員(參考十五:37)。Tī歷代志上第廿七章33節講伊是大衛ê「親信」,是大衛身邊重要ê參謀。伊用拆裂衫褲,頭蒙塵埃,chit種非常悲傷ê樣式來迎接大衛。大衛確實是一個真聰明ê領導者,伊ài戶篩tńg去耶路撒冷宮廷內,kah兩位大祭司撒督kah亞比亞他合作,提供情報,án-ne大衛就ē-tàng清楚掌握押沙龍ê動態,mā thang kā亞希多弗可能會造成ê傷害化解掉,並且hō͘押沙龍掠做是大衛身邊ê忠臣lóng歸向伊、效忠伊。Án-ne,大衛差遣tńg去ê除了大祭司撒督kah亞比亞他,chit-má koh有要臣戶篩,真容易造成押沙龍ê錯覺。Án-ne,軍事領袖約押,以及大衛身邊ê侍衛兵團願意跟tòe大衛,而宗教領袖撒督kah亞比亞他mā支持大衛,koh加上優秀ê參謀戶篩mā是全力ê支持者,就ē-tàng看出押沙龍kah-ná已經成功地奪取政權,其實,真正有影響人民力量ê chiah-ê代表者,卻lóng tī大衛身邊,這是大衛成功ê所在。

重新查詢 專卷研經 撒母耳記下系列
錯誤回報,請聯繫