撒母耳記下 13章23節 到 13章39節   背景資料  上一筆  下一筆
Chit段經文記載她瑪ê兄哥押沙龍終其尾替小妹報仇,殺害暗嫩,m̄-koh卻因為án-ne驚惶老父大衛懲罰而逃離王宮,走tńg來老母ê娘家基述去避難。

第23到24節,chia一開始就講「兩年後」,表示chit件事大衛都無適當ê處置。Á這「兩年後」,mā teh表示chit件事已經tī宮廷內漸漸被bē記得。M̄-koh押沙龍會記得非常清楚,伊是一再teh計劃chhōe機會beh報仇。伊利用遊牧民族是重大ê「剪羊毛過節」活動,「邀請所有王子」,這表示押沙龍是策劃好beh為小妹被姦污ê報仇之機會來à。同時,伊mā邀請伊ê老父大衛kah臣僕參加,m̄-koh大衛堅持無參加。

第25到27節,押沙龍是一個思慮真深ê人;伊故意講邀請「王kah所有ê臣僕光臨」chit pái ê節期活動,這等於是舉辦了一pái宮廷盛宴仝款,伊有意用chit種動作,顯示家己ê能力。M̄-koh khah重要ê,伊是beh用chit種方式,避免大衛出席,m̄-koh卻thang得tio̍h大衛答應hō͘ in某種程度ê面子。大衛bē出席是有原因ê,因為伊若答應押沙龍chit pái ê請求,以後伊ê tó一個gín-á仝款請求,伊一定lóng tio̍h答應,而且勞動kui個宮廷百官,除非chit-ê gín-á是準備ài繼承王位者。Á hit時王位ê「準」繼承者,是暗嫩。因為án-ne,大衛一定tio̍h考慮tio̍h暗嫩ê角色。押沙龍應該知影chit種情形,伊會有chit種動作,其實,lóng是beh hō͘暗嫩注意tio̍h chit種問題。押沙龍利用老父大衛ê實力,邀伊「至少請hō͘我兄哥暗嫩kah我去」,chit句話已經露出押沙龍ê動機kah用意。大衛似有警覺tio̍h,因為án-ne伊回應講「何必要伊去neh」chit種話。因為tī第22節已經有說明押沙龍對暗嫩性侵伊小妹她瑪ê事耿耿tī懷,而且無koh kah暗嫩「講話」,chit件事大衛必定知影,因為伊ê眾kiáⁿ lóng是宮廷要員,tī國王面前隨時lóng會有宮廷「會報」。因為án-ne,大衛對押沙龍堅持beh暗嫩出席,感覺事有蹊蹺。因為án-ne,表示無chit種需要。M̄-koh因為押沙龍「koh再三懇求」,大衛終其尾答應,m̄-koh這是「hō͘暗嫩kah王其他ê kiáⁿ」同齊參加押沙龍ê邀宴。大衛後來同意暗嫩參加,可能是想藉這而ē-tàng消弭兄弟兩人間ê嫌隙,有可能mā是一件美事。M̄-koh為tio̍h beh預防意外,伊hō͘所有ê兄弟lóng同齊出席chit pái ê盛宴。Á押沙龍準備ê宴席,有ná國王teh宴請國賓一般ê豐盛,表明ê是押沙龍án-ne大手筆ê排設宴席,確實隱含beh殺害暗嫩ê訊息。

第28到29節,chia講出押沙龍排設此宴席真正目的,就是一場「鴻門宴」,準備ài殺害暗嫩,表面上是替小妹她瑪報仇,真正目的是排除伊繼承王位ê絆腳石。果然,伊下令隨從利用暗嫩lim醉ê時chūn,下手kā暗嫩殺害這mā是回應了大衛殺害烏利亞了後,先知拿單chìn前傳達上帝ê信息hō͘大衛ê時所講ê::「Taⁿ 刀劍會永遠無離開你ê 家,因為你看輕我,娶赫人烏利亞 ê bó͘ 做你 ê bó͘ 。(全民版)」(十二:10)大衛其餘ê kiáⁿ看tio̍h lóng騎tio̍h「騾子逃走」。暗嫩強姦家己ê小妹固然是錯誤而且bē-tàng原諒,m̄-koh,押沙龍謀刣家己ê兄哥koh khah是無法度原諒。
第30到33節,chit件慘案發生後,隨時有人傳報消息hō͘大衛,講押沙龍刣死大衛「所有ê kiáⁿ,一個mā無留落來」,這是混亂中ê 錯誤訊息,m̄-koh卻是thang理解。因為大衛ê眾kiáⁿ尚且teh逃命中,並m̄知押沙龍是m̄是會派出殺手繼續tī途中追殺其他ê人。Ná親像大衛kah拔示芭所生落來ê第一個kiáⁿ重病ê時仝款,大衛除了拆裂衫褲表示極大哀傷外,mā用「躺tī土腳」,表示家己甚麼lóng m̄是。國王ê chit-ê尊榮已經無意義。Á傳報正確ê消息hō͘大衛知影是「約拿達」chit-ê人,伊就是兩年前替暗嫩獻計ê惡棍(參考十三:3—5),暗嫩就是因聽從伊ê計謀,chiah會致使今á日ê結果。雖然伊所報告ê情景是明確,m̄-koh伊並無講出實情,反tńg是強化押沙龍tī大衛心中ê惡質形像。伊是hit種專門提供pháiⁿ計謀ê人,是心地奸巧、心術不正ê人,chit種人雖然知影可能會發生tāi-chì ê結果,m̄-koh並無會對所做錯誤 ê事感覺見笑。

第34到36節,chit件謀害家己兄哥ê事件引起大衛ê憤怒kah傷痛,因為án-ne押沙龍一定tio̍h逃走避難,因為in老父大衛必定會採取懲罰行動。M̄-koh這mā暗示了宮廷內部必定有真chē暗爭權位ê浪潮。大衛其他ê kiáⁿ mā陸續tùi「何羅念」山坡頂tńg來,in是一面行一面大哭,大衛kah所有宮廷內ê臣僕mā tòe啼哭,對大衛ê眾kiáⁿ來講,in tú經歷一場怵目驚心ê兄弟殘殺之現況,心內iáu有餘悸。

第37到39節,押沙龍是逃tńg來伊外公「達買」(參考三:3)ê厝去bih起來,時間長到「三年」。這ē-sái講是一段不短ê時間,mā表示伊已經喪失王位繼承權ê機會。Á相對ê是Tī chit段時間中,大衛一直teh為暗嫩被刣ê事「哀傷」。M̄-koh tī悲傷過了後,伊koh想起了押沙龍。這mā說明過去大衛為暗嫩哀傷ê事,已經得tio̍h安慰。

重新查詢 專卷研經 撒母耳記下系列
錯誤回報,請聯繫