撒母耳記下 12章1節 到 12章25節   背景資料  上一筆  下一筆
對kui個以色列民族來講,先知角色ê重要性是khah贏過君王ê。原因是先知是上帝直接揀選ê奴僕,傳達tio̍h上帝ê信息,親像摩西、約書亞等lóng是由上帝直接揀選出來帶領以色列人民。甚至早期先知是領受上帝ê命令去膏立君王,ná親像先知撒母耳仝款。因為án-ne,先知ê權威性tī以色列人民中間,有非常重要ê地位。

先知拿單是既勇敢koh忠實tī上帝ê先知,上帝beh伊去向大衛傳話,伊聽上帝ê話就去向大衛王傳講上帝受氣ê信息。這tī當時是一件非常危險ê舉動,原因是大衛擁有極大ê權柄,是以色列全國人民歌頌、o-ló ê君王,ná親像tī主前第八世紀ê先知米該雅,冒tio̍h性命危險去向北國以色列ê君王亞哈講出上帝ê信息仝款,結果米該雅被亞哈王下令關tī監獄裡(參考列王記上廿二:26—27)。chit-má先知拿單受命tio̍h kā上帝ê話語傳達hō͘大衛王,mā是仝款tio̍h冒性命ê危險。

Chit段經文是先知拿單領受上帝ê命令,beh去對大衛王傳達上帝憤怒ê信息。先知拿單ē-sái講是一位非常真gâu講譬喻(故事)ê專家,當伊講完譬喻了後,大衛王iáu m̄知先知拿單ê譬喻中間,所指ê就是伊,iáu tio̍h等到先知拿單直接指出「你就是hit-ê人」了後,大衛chiah猛然醒悟過來。

第1到4節,chit段經文記載先知所講ê譬喻內容。Tī第十一章27節真清楚記載上帝對tī大衛所犯ê刣人、姦淫罪,「十分不悅」,就án-ne差遣先知「拿單」去對大衛講話。當然,上帝已經有hō͘先知拿單知影ài伊去傳講ê是甚麼,因為án-ne伊到à大衛hia開始對伊講上帝beh帶hō͘伊ê信息。先知拿單所用ê是鮮明對比之譬喻方式,說明富有ê人擁有牛羊真chē,而sàn-chhiah ê厝邊只有一隻小羊,因為擁有真chē牛羊ê富者,竟然是欺負只靠tio̍h一隻羊過生活ê貧者。

第5到6節,這hō͘大衛聽了後非常火大,認為該富者做殘忍ê事,應該tio̍h處死,而且tio̍h賠償貧者損失ê羊四倍。

第7到12節,大衛顯然無聽出先知拿單用chit-ê譬喻是teh指責伊就是chit-ê比喻中ê富者,因為án-ne chiah會講出「做chit項事ê人該死」、「做出án-ne殘忍ê事」,以及做出應賠償窮厝邊「四倍」ê判決。就án-ne先知拿單就直接指出做chit種「該死」、「殘忍」ê事ê人,就是大衛家己。

先知拿單舉出上帝非常憤怒ê原因,包括有:上帝賞賜hō͘大衛ê實在siuⁿ chē,而伊卻是貪婪到喪失良知。大衛iáu借tio̍h亞捫人手上ê刀刣死烏利亞,然後搶去烏利亞ê bó͘。上帝就án-ne做出判決:大衛ê厝會永遠逃離不了刀劍,而且厝裡ê人會起來作亂攻擊大衛,伊搶奪烏利亞ê bó͘,伊ê kiáⁿ會搶奪伊ê妃嬪,而大衛tī暗中所做ê chit件事,會tī日光下暴露出來(參考路加福音十二:2)。上帝án-ne對大衛kah伊ê厝ê懲罰,ē-sái講是非常嚴重ê,原因是大衛是上帝揀選出來ê奴僕。上帝揀選ê奴僕故意犯chit種殺害無辜ê罪,上帝絕對bē輕輕放過。先知拿單Tī chit段經文中所講ê,後來tī大衛ê身上lóng一一應驗ā。

第13到15節a句,當先知拿單清楚指出大衛ê嚴重錯誤後,大衛終其尾承認家己所犯ê過錯,是「得罪上主」,原因是犯上帝ê誡命、規律。值得注意ê是,伊m̄是講得罪「烏利亞」á是伊ê全家,卻是講「得罪上主」,原因是伊知影會犯chit種罪,就是因為無尊崇上帝為大,卻是kā上帝ê教導lóng bē記得,甚至心內中根本就是m̄是認上帝,這是傲慢者藐視上帝ê態度(第14節)。chit-má伊知影上帝是為無辜ê烏利亞被殺害ê事懲罰伊。因為án-ne,當伊講「得罪上主」chit句話ê時,意思是teh向上帝表示懺悔,祈求上帝ê赦免、憐憫。M̄-koh tio̍h注意,上帝雖然「赦免」伊,m̄-koh這並無表示上帝不懲罰伊,上帝iáu是有懲罰,beh hō͘伊kah拔示芭所生落來ê gín-á往生。

問題是:gín-á是無辜ê,為甚麼beh hō͘大衛ê罪,由伊tú出世ê gín-á來承擔死ê懲罰?mā允准以án-ne了解:chit-ê gín-á一出世落來,就死去,可能kah某種病症有關,m̄-koh聖經作者認為是kah大衛kah拔示芭之間ê犯罪行為有密切關係,是上帝懲罰ê結果。Koh講,chit-ê gín-á若是留落來,會一直成做大衛khiap-sì ê記號,因為這是iáu未結婚前,而且犯姦淫罪所生ê gín-á。若是chit-ê gín-á繼續活着,會成做大衛犯罪ê證據,hō͘伊tī以色列人民中間有一個錯誤 ê樣版,甚至被模仿致使pháiⁿ了以色列人民ê社會規範,hō͘伊無法度繼續統治以色列帝國。拿單kā上帝ê信息傳達完成後,就隨時離開王宮。這表示先知拿單並m̄是王宮所「御養」ê先知。伊是真正先知,mā m̄是用靠國王供奉生活(參考阿摩司書七:14)。

Chit段經文記載當大衛kah拔示芭犯姦淫罪了後,in所生落來ê gín-á生重病ê時,大衛是真努力地想beh搶救gín-á,m̄-koh tī搶救失敗了後,大衛ê反應完全無仝ê經過。

第15節b句到17節,大衛kah拔示芭所生ê gín-á害重病,這真清楚是出tī上帝ê旨意。大衛為gín-á生重病「禁食」,這是以色列人民表示哀傷、懺悔,以及tī信仰上表明決志ê方式(參考撒母耳記上七:6、三十一:13,撒母耳記下一:12,歷代志下二十:3,以斯拉記八:21—23,以斯帖記四:15—16,詩篇三十五:13、六十九:10,但以理書九:3,約拿書三:5,使徒行傳十三:3、十四:23)。大衛希望用chit種方式來平息上帝ê憤怒。Koh講除了「禁食」之外,伊mā用「整夜躺tī土腳」這方式,來表明家己ê卑微。即使是宮廷裡ê「老侍從」,mā lóng無法度勸動大衛進食、tī床鋪上睏。

第18到21節,過了「一禮拜」久,chit-ê gín-á死去,宮中ê chiah-ê老臣反tńg m̄敢去kā大衛講,深恐伊會因為過度憂傷而自戕。M̄-koh大衛發覺宮廷內ê侍衛舉止有異,就án-ne察問了一下,就明白gín-á已經死去。就án-ne伊開始潔身沐浴,mā無koh禁食,然後koh到「上主ê殿宇敬拜」。這表示伊koh開始kah恢復以前仝款,看起來,大衛kah-ná已經得tio̍h上帝ê接納,原諒伊過去所犯ê罪。M̄-koh伊chit種做法反tńg hō͘大家lóng感覺非常ê gông-gia̍h,因為án-ne,chiah-ê老臣就問大衛原因。

第22到23節,chit兩節是大衛回答老臣所提ê問題。伊原本想beh用chit種方式換來上帝憐憫。M̄-koh顯然地,並無成功。這mā說明上帝beh審判一個人ê時,並m̄是人用各種「哀傷」、「鞭phah己身」ê方式thang改變。上帝自有祂一套法碼當做懲罰ê標準。大衛chit-má明白,這既然是上帝已經決定beh執行ê審判,因為án-ne,gín-á已經死去,就表示任何人ê能力mā無法度改變上帝ê旨意。「有一工我beh到伊hia去」,這是大衛ê期待。伊知影,家己有一工mā會死,因為án-ne,伊期待ē-tàng因為án-ne而見tio̍h chit-ê gín-á,mā tùi chia thang看出伊對chit-ê gín-á用情之深。

第24到25節,大衛轉而去安慰拔示芭,伊希望用繼續同房ê方式,hō͘拔示芭再生下gín-á,以減去因第一個gín-á往生ê憂傷。「所羅門」因為án-ne出世,chit-ê名kah希伯來文ê「shalom」仝款,是teh指「和平」、「平安」ê意思(參考歷代志上廿二:9)。Chit時chūn,先知拿單奉上帝ê命令,去探望大衛,並且去為大衛所生ê chit-ê gín-á所羅門號名叫「耶底底亞」,表示「上帝喜愛」所羅門。Chit-ê意思真清楚,表示上帝前對大衛ê應允,是繼續有效ê,並無會因為大衛犯罪就消失à。Mā就是大衛ê後代kā永遠保有王朝(參考撒母耳記下七:13—16),chit對大衛來講,ē-sái講是siōng大ê應允。

重新查詢 專卷研經 撒母耳記下系列
錯誤回報,請聯繫