撒母耳記下 10章1節 到 10章19節   背景資料  上一筆  下一筆
Tùi第十章到第十二章,thang看tio̍h當大衛phah亞捫人ê chit場戰役,mā是伊tī統治以色列siōng顛峰ê時期。當人tī siōng顛峰ê時chūn,mā siōng容易受tio̍h撒旦誘惑力ê時刻,就tī chit時chūn,大衛bē記得上帝ê話語kah教示,伊為後代立落來了siōng pháiⁿ ê模樣,王朝mā因為án-ne行向了衰敗ê第一步。

第十章koh一pái記載chiah-ê bat被phah敗ê族群、國家koh一pái ê聚集軍隊,想beh重新koh再戰,m̄-nā是亞捫人,mā包括了瑣巴、敘利亞等國、族群。Tùi chiah-ê lóng ē-tàng看出chiah-ê族群,久長以來kah非利士人仝款,不時騷擾以色列人。Chit章mā提供了一個真好ê教材:誤解會造成人kah人之間ê衝突,mā會造成族群kah族群之間ê紛爭,以及國家kah國家間ê戰爭。

Chit場對抗亞捫人ê戰役,是發生tī甚麼時chūn?mā無法度清楚知影。Tī掃羅ê時代,亞捫人ê王拿轄bat有過beh攻擊以色列人ê城市雅比城,m̄-koh被掃羅phah敗。M̄-koh tī大衛時代,拿轄王kah大衛ê外交關係甚佳。因為án-ne,當大衛聽tio̍h 拿轄王往生ê消息後,為表示哀悼而派特使去致意,結果卻遇tio̍h極大ê侮辱,tùi án-ne引發了chit場戰爭。這是以色列國正式對外宣戰,因為án-ne,tī歷代志上第十九章1到19節mā有官方資料出現。Tī歷代志ê資料中,作者提供了非常珍貴ê資料,就是亞捫王哈嫩用「三萬四千公斤銀á」之金錢僱來ê外籍傭兵。M̄-koh一定tio̍h注意ê是:chit種用金錢僱用ê軍隊,若tú-tio̍h戰況不佳,往往會tī陣前棄械逃走,以求保命。

Tio̍h注意ê是,tī撒母耳記下ê記錄中,第二pái戰役之結果kah歷代志上所記載ê有真大差別;tī撒母耳記下記載以色列殲滅敘利亞軍隊有「七百個趕戰車ê人」,而歷代志上是記載遇tio̍h殲滅ê敘利亞ê戰車士兵則有「七千名」,án-ne tú好相差十倍之多。

第1到3節,tī掃羅時代,bat出兵攻打亞捫王拿轄,m̄-koh tī大衛時代顯然kah 拿轄王之間有真好ê外交關係。chit-má拿轄王往生,大衛認為tio̍h beh繼續維護兩國ê外交友好關係,決定差派特使前往弔喪。這原本是一件國際外交上基本ê禮儀。大衛tī chia描講述兩國關係「友好」,這用詞teh表示彼此之間互相尊重,而且簽訂有平等條約。Mā tùi chia,thang理解當大衛帶兵攻打摩押人ê時chūn,亞捫人並無出兵援助摩押,可能kah此有關。Chiah-ê特使來到亞捫ê京城—拉巴,chit-ê城就是今á日約旦王國首都安曼(Amman,參考十一:1、十二:26)。M̄-koh tī拿轄王ê kiáⁿ「哈嫩王」身邊ê參謀,顯然對tī大衛派出特使團去弔慰ê舉動,表示存疑。In認為大衛派特使來,是為tio̍h beh「偵察chit-ê城ê虛實,好征服」亞捫。

第4到5節,哈嫩聽從幕僚ê話,就án-ne下令掠了chiah-ê特使。伊並且用當時中東社會siōng-kài侮辱人ê一種方式—剃去一半鬍鬚,並且kā尻川斗衫褲割斷。因為當時ê人只有tú-tio̍h siōng悲傷ê事ê時,chiah會kā鬍鬚割掉一半(參考以賽亞書十五:2,耶利米書四十一:5,以西結書五:1)。剃去chiah-ê特使 ê一半鬍鬚,除了是一種侮辱之外,mā同時是teh表達大衛ê勢力會因為án-ne削減一大部分ê意思。Á kā衫褲下半截割去,koh khah是teh侮辱戰犯ê一種方式(參考以賽亞書二十:4)。因為án-ne,就會露出下體,hō͘人蒙羞。M̄-koh古往今來lóng仝款,侮辱對方使節,等於是teh侮辱一個國家ê君王kah人民仝款,表示無惜kah對方開戰chiah敢án-ne做。大衛知影chit件事了後,伊ài chiah-ê特使團ê人先tī耶利哥thèng候到鬍鬚發出來了後chiah tńg來耶路撒冷。

第6到8節,當亞捫王哈嫩beh án-ne對待大衛ê特使ê時,伊已經有beh開戰ê準備。M̄-koh伊知影beh phah贏以色列並無容易,因為án-ne,伊就向瑣巴王國招募「敘利亞步兵」兩萬、陀伯一萬兩千人、tùi瑪迦王hia雇來一千人。根據歷代志上作者提供資料是:亞捫王哈嫩提供了「三萬四千公斤ê銀á」雇用外籍兵團準備加入此場戰局。大衛當然會了解亞捫必定是準備好beh開戰,chiah敢án-ne侮辱伊ê特使。Á伊mā一定tio̍h維護國家ê尊嚴,若是bē出兵攻擊亞捫,過去相刣勝利所統治ê國家,必定會紛紛走chhōe獨立伊去。因為án-ne,伊下令以色列元帥約押率兵全面開戰。

第9到12節,約押面對ê亞捫軍隊kah in雇用來協防ê盟軍,一點mā m̄敢輕忽。伊挑選出以色列siōng精銳ê部隊,kā它分做兩支,免得受tio̍h亞捫聯軍ê前後夾攻。伊家己率領ê軍隊準備直接進攻chiah-ê外籍兵團ê軍隊,然後kā其餘部隊交hō͘家己ê小弟亞比篩帶領,準備進攻亞捫ê首都「拉巴城」。伊kā小弟亞比篩講chit pái ê戰役,是beh為「上帝ê城奮力戰鬥」。因為若是phah敗仗,耶路撒冷城kā tùi án-ne落入伊族人手中,而耶路撒冷城內有上帝ê約櫃,因為án-ne,tī約押ê看法裡,phah敗仗,m̄-nā是人民性命不保,耶路撒冷城若失去,mā會帶來信仰ê瓦解,因為約櫃teh beh tī落入外族人手中。「願上主成全祂ê旨意」,chit句話非常重要。約押真清楚teh表明:chit pái戰役,並m̄是只靠家己ê能力,而一定tio̍h óa靠上帝ê協助。因為外籍兵團mā是強兵勇kā,若是無上帝ê協助,óa靠家己ê驍勇善戰,並無一定會得tio̍h戰爭。因為án-ne,伊表明chit pái戰役全靠上帝ê帶領。即使伊是一個名kā mā tio̍h謙卑。

第13到16節,約押成功地phah敗亞捫人所雇用ê敘利亞等聯軍。這ē-sái講是此役戰事siōng重要ê第一個捷報,因為án-ne,約押chiah ē-tàng kâⁿ-tio̍h戰勝餘威,迴轉過來支援攻打亞捫ê亞比篩所率領之以色列軍隊。當約押phah敗敘利亞等聯軍了後,亞捫人就驚惶起來,m̄敢koh再kah亞比篩ê軍隊正面衝突,退tńg來拉巴城內固守城池。Á約押則收兵tńg來耶路撒冷。為甚麼約押不乘勝追擊?這真可能kah冬季來臨,無適合軍事行動有密切關係(參考十一:1)。因為約押無繼續進攻,hō͘敘利亞聯軍有機會重整軍備而ē-tàng koh一pái phah敗以色列軍隊。Chit pái聯軍有瑣巴ê將軍「朔法」率領整軍備戰。

第17到19節,大衛koh一pái調度軍隊應戰,chit pái猶原是以色列軍隊大獲全勝。Chit pái戰役一開始,以色列ê軍隊就刣死「七百個趕戰車ê人kah四萬騎兵」,同時kā統帥「朔法」mā刣死。Tī歷代志上第十九章18節ê記載無jōa仝款,認為是刣死「七千名敘利亞戰車兵」,應該是歷代志上ê記載khah正確。因為根據歷代志上第十九章7節ê記載,亞捫用大量金錢單單僱來ê聯軍,就有「三萬兩千戰車」,chiah-ni̍h chē ê戰車軍兵,若是只有損失「七百個」,並m̄是甚麼大傷害。M̄-koh若是「七千名」,就m̄是一件小事。Koh講,chia講刣死了「四萬騎兵」,可能是誇大之詞,不過造成極大ê損傷是確實。M̄-koh siōng重要ê是敘利亞聯軍ê統帥朔法戰死,致使聯軍失去領導中心,軍隊一定會四界逃竄。Chit場戰役結束,ē-sái講是kui個敘利亞地區ê小國lóng歸順了以色列,連亞捫人lóng m̄敢koh再有任何侵犯以色列ê企圖。因為無敘利亞地區ê聯軍支援,單beh靠亞捫人ê軍力想對抗以色列軍隊,是無夠ê。Á taⁿ聯軍lóng戰敗了,亞捫人koh khah甭想beh kah以色列單phah獨鬥。

重新查詢 專卷研經 撒母耳記下系列
錯誤回報,請聯繫