Chit段經文講述亞們繼位了後，繼續仿效in父親瑪拿西ê惡質ê行為。伊統治ê時間真短，大約只有兩年左右。

第19到22節，ná親像列王記作者所描述一個君王好kah pháiⁿ ê句型仝款；列王記作者認為好ê君王，就是仿效大衛王ê樣式，尊崇上帝為大；相對ê，無好ê君王，就是帶領人民去拜偶像。瑪拿西就是非常惡質ê君王，伊甚至kā偶像神明帶入聖殿內，誤導猶大人民認為敬拜至koân ê萬物之主上帝，kah拜偶像神明巴力kah亞舍拉仝款。Á繼位瑪拿西王位ê亞們mā是án-ne，學習in父親瑪拿西ê樣式，當然就bē去「遵從上主ê誡命」。

第23到26節，chia提起有關宮廷政變失敗ê事件，原因是亞們執政後，真緊就引起伊ê臣僕「反叛伊」，tī王宮內kā伊刺殺死。M̄-koh chiah-ê殺手並無因為án-ne而奪到王位，猶大人民反tńg kā chiah-ê謀害者刣死，然後立亞們ê kiáⁿ約西亞繼位為王。chit-ê約西亞ē-sái講是猶大末期siōng優秀ê一位君王。可惜ê是，伊ê改革mā無達tio̍h預期ê效果。