短短幾節經文，講述大祭司耶何耶大án怎帶領猶大人民kah新ê王約阿施立約，並且開始推動潔淨宗教信仰ê工作。

第16節，chit節說明kui個改革運動中siōng重要ê一件事，就是kah上帝立約。耶何耶大siōng大ê貢獻就是親像約書亞仝款，帶領國王約阿施（當時伊iáu軟chiáⁿ）kah人民kah上帝立約，表明in願意做上帝ê子民，忠實tī上帝ê話。

第17到19節，這是大祭司耶何耶大大力推動改革工作，m̄-nā kā所有巴力神廟、祭壇、偶像lóng拆毀，mā kā巴力ê祭司馬坦處死。然後kā大衛王所定落來ê敬拜禮儀規章重新the̍h出來使用。Koh khah重要ê，就是派人嚴守聖殿ê潔淨。

第20到21節，續落來就是由大祭司耶何耶大用隆重而且正式ê方式，kā所有猶大官員、貴族，以及民間領袖lóng帶到王宮，表示擁護約阿施，hō͘伊正式登基。Á chit時chūn，約阿施chiah只有七歲，thang瞭解大祭司耶何耶大就是輔佐伊ê大臣。