Chit段經文是使徒保羅對提摩太ê勸勉，充滿tio̍h鼓勵kah期待。伊kā提摩太講一定tio̍h謹記家己ê角色—上帝所重用ê奴僕。

第11節，使徒保羅提醒提摩太tio̍h積極追求「正義、敬虔、信心、疼心、忍耐，kah溫柔」等這六件事。Tī使徒保羅看起來，chiah-ê lóng是做一個上帝忠心ê奴僕一定tio̍h認真學習ê功課。

正義，是teh指無偏私ê態度，表示這是處理教會事務應該持守ê態度。
敬虔，是不隨便ê意思。

信心kah疼心，這兩項thang講無法度分開。因為無信心，疼心bē持久；仝款ê，無疼心ê信心，hit種ê信心siōng容易陷入貪婪ê中間，甚至對人缺乏憐憫ê疼。

忍耐kah溫柔，這是基督徒面對苦難ê時一定tio̍h有ê要件，只有án-ne chiah ē-tàng hō͘家己承受各種壓力kah迫害臨身mā不驚惶。

第12節，ē-sái講是提摩太前書siōng中心ê一節經文。Thang參考腓立比書第三章12到14節。Kā信仰看做像tī競技場上賽走hit種子，這一直是使徒保羅慣用ê方式（參考哥林多前書九：24—27）。好ê信仰一定tio̍h繼續往前行，無法度回頭á是停留，若無，就會失去原本thang得tio̍h ê榮耀甚至koh khah嚴重ê，會失迷正確ê方向。

第13到14節，chit兩節thang參考約翰福音第十八章33到37節。早期教會beh公開宣認耶穌基督是性命ê主，會有性命ê危險，因為羅馬皇帝當teh推動「皇民化」，ài屬下所有人民lóng kā皇帝看做是神。使徒保羅ài提摩太教導信徒，一定tio̍h tī信仰ê事頂面忠實，無法度因為迫害來臨而改變信仰，mā bē-tàng因為受迫害就軟弱。

第15節，使徒保羅指出上帝ê特性，就是「獨一無二ê全能者」。這真清楚說明：全能ê上帝，chiah是真正上帝。因為án-ne，chit位獨一無二ê全能上帝，是應該被歌頌、o-ló ê。使徒保羅tī chia用「萬王ê王，萬主ê主」，真清楚講出創造ê上帝，是高高贏過所有君王ê上帝。

第16節，chit節thang參考出埃及記第三十三章17節到23節。上帝是絕對聖潔，m̄是有罪ê人ē-tàng kah上帝面對面相見。

第17到19節，chit段話是使徒保羅對提摩太另外一項ê勸勉，tī提醒伊牧會ê工作中，對tī hiah-ê有錢有勢ê信徒，á是hiah-ê雖然已經信了耶穌基督，ē-sái講是tī信仰上表現出來ê，卻kah真實信仰有差別ê信徒，應該盡傳道者ê職責hō͘ in糾正。Ná親像耶穌基督教導門徒所講ê，一定tio̍h tī上帝kah錢財之間清楚選擇，看是beh óa靠ê是甚麼人（參考馬太福音六：24）。

第20到21節，這二節是結尾語，mā是使徒保羅對提摩太ê祝福。「Tio̍h持守所接受ê託付」，chit句話若是用今á日ê話來講，就是teh勸勉提摩太一定tio̍h持守獻身ê使命感。提摩太所接受ê託付，就是beh去禁止以弗所教會內部有人「傳無正確ê教義」。傳福音ê基本根據就是聖經，因為聖經就是上帝ê話，mā只有上帝ê話chiah是正確ê。「不敬虔ê空談」kah「荒謬爭論」，chiah-ê就是teh指hiah-ê不切實際ê空談話題。所謂「不切實際」，就是kā信仰kah生活ê實務分開，這就會hō͘人感覺信仰是一種kah現實生活距離真遙遠ê事。