提摩太前書 5章1節 到 5章25節   背景資料  上一筆  下一筆
第五、六兩章,使徒保羅講tio̍h眾信徒應該用怎樣ê態度,關心hit-ê些守寡ê婦人,以及正確ê教會生活態度。這thang看出使徒保羅對牧養教會ê事真有條理地指出本身是一個牧養者,tio̍h清楚教會ê問題所在,mā需要知影選舉適當ê信徒成做教會幹部,kah怎樣hō͘ hiah-ê專門欺騙信徒ê假教師tī教會中無寄生ê空間。M̄-koh chiah-ê lóng一定tio̍h有一個基本要件,就是傳道者知影進步,hō͘家己teh教導ê事頂面有美好見證,若無,就算無假教師tī教會傳達錯誤ê信息,信徒ê信仰品質mā是bē提升。Á所有教導ê基礎就是tī聖經。

第1節,使徒保羅講過教會就是一個家庭,是屬tī「上帝ê殿」(參考三:17),因為án-ne,家庭應該注重長幼有序。Chia ê「責備」,意思是teh指用嚴厲ê言語來譴責ê意思,這tī教會生活中並m̄是應該有ê態度。Á第二句ê「待少年人」是kah前一句ê「老年人」相對照。對少年人tio̍h ná親像對待家己ê兄弟仝款,chit種講法,基本上lóng是立足tī「家庭」ê環境中看待別人。因為教會ná親像一個大家庭般,所有ê信徒lóng ná親像兄弟姊妹仝款。

第2節,是kah第一節相對照;chit節講tio̍h對待女性ê態度,特別是tī chia提醒提摩太tio̍h注意對待hiah-ê少年婦人,ài有「純潔ê心」,這是teh指m̄-thang有「邪惡」ê念頭,mā就是m̄-thang因為看tio̍h少年ê婦女,就想tio̍h姦淫ê事,這是真危險ê事,因為án-ne,用「純潔ê心」對待少年婦女,是一門真重要ê功課。

第3節,tùi chit節直到第16節,lóng是提起有關寡婦ê問題。Chit節經文隱約thang看tio̍h初代教會信徒中間,已經有bē少寡婦tī其中,原因真可能kah初代教會中,大家以有物共享ê生活方式相聚會,而chiah-ê寡婦真可能是來自sàn-chhiah ê家庭。使徒保羅提起siōng重要ê一點,就是beh「尊敬真正teh守寡ê婦女」。「尊敬」chit-ê詞,指ê m̄-nā是對寡婦tio̍h真心實意ê敬疼in,而且是beh用真實際ê行動幫助in ê生活需要。Koh講,「真正teh守寡」,kah第6節提起ê「專想享樂ê寡婦」相對照;tī chia是teh指真正有規律生活ê寡婦。

第4節,身為兒孫ê,應該知影盡孝道。Thang理解寡婦若是無子女,生活會陷入困境,因為無法度繼承財產。M̄-koh若是有子女,就ē-tàng kā丈夫留落來ê產業繼承過來,án-ne,即使是守寡mā thang減少生活上ê困難。Chia提起身為寡婦ê kiáⁿ孫,應該對家己守寡ê祖母á是老母盡孝道。Chit種教示kah十誡中ê第五誡仝款,lóng是beh對父母盡孝道(參考出埃及記二十:12),這是基督教信仰siōng基本ê要求。

第5節,chia提起「真正teh守寡ê婦女無依無靠」,這表示chit種寡婦是無子女thang幫助,chit時,教會應該設法hō͘ in協助。

第6到7節,chit節所提起ê「專想享樂ê寡婦」,意思是表面上守寡,其實是過淫蕩ê生活。使徒保羅講對chit種寡婦,tio̍h無客氣ê教導in,免得連帶hō͘教會受tio̍h「指責」,對福音事工就會造成傷害。

第8節,教導信徒tio̍h照顧親戚中chiah-ê貧困而且真守寡ê寡婦,á是已經年老無法度工作ê年長者。Thang án-ne了解:如果信徒連家己厝裡ê親人lóng m̄肯伸手幫助,卻tio̍h教會來代勞,這並m̄是好見證(參考約翰一書四:20—21)。

第9到10節,chia提起教會tio̍h關心ê對象,就是已經年滿「六十歲以上」,而且守寡了後,就m̄-bat koh再出嫁過ê。而且有好ê「聲譽」,chit種寡婦tio̍h kā in全力看顧。其實,tī聖經時代,一個人beh活到六十歲以上並無容易。Á需要登記ê原因,是為tio̍h方便tī關懷ê事頂面,免得有遺漏ê tāi-chì發生。Koh講,真可能是kah當時教會選舉幹部有關係,chit點thang tùi第10節ê「真gâu養育kiáⁿ」chit句話看出來,in不是beh hō͘人賑濟,而是beh in來幫助別人,因為in過去就bat「扶難濟急」過別人。造名冊,mā是一種分工管理ê好方式,thang koh khah清楚信徒ê資料動態。Tī chia提起列名造冊ê資格。

第11到12節,chit段經文是進一步teh解釋為甚麼需要年滿六十歲chiah thang登錄tī名冊中,原因就是希望真正守寡ê婦女,受tio̍h尊敬,hō͘ in tī參與教會事工上,有美好ê見證。M̄-koh chit段經文mā hō͘咱看tio̍h二千年前時代ê婚姻觀念。使徒保羅受過猶太經學教師訓練,自然tek帶有chiok厚ê猶太社會思想ê觀念,chit種觀念kah「約」ê認bat有密切關係。另外一方面,咱thang了解古代ê社會,cha-bó͘人外出工作ê機會真少,因為án-ne,sàn-chhiah寡婦若是想beh靠能力生活,確實真困難。Mā因為án-ne,不時有少年寡婦會為tio̍h生存而淪落為妓女,á是會想出所有ê辦法趕緊koh再嫁別人。這mā是第11到12節所提起ê背景,講chiah-ê少年ê寡婦想beh koh再嫁ê原因,其實並無一定是因為性慾衝動,á是違背當時ê誓約,卻是當時ê社會確實hō͘少年ê寡婦生存無容易。

	第13節,chia所講ê「浪費光陰」,指ê就是pîn-tōaⁿ,m̄做工ê意思。因為m̄做工,所以有真chē閒暇ê時間,chiah會四界去串門子講別別人ê閒話。

	第14節,使徒保羅提出伊對少年寡婦koh再嫁ê看法。其實,伊並無反對少年寡婦koh再嫁,至少án-ne thang解決少年寡婦tī生活上tú-tio̍h ê問題。Koh講,因為若ē-tàng生育子女,婦女就會無閒照顧養育子女,自然就無時間去串門子講閒話à。

	第15節,chia講tio̍h「有kóa寡婦改變初衷,跟tòe撒旦去了」,chia所講ê「跟tòe撒旦」,意思是teh指有kóa寡婦犯第11 kah第13節所提起ê事,甚至可能暗地裡kah cha-po͘人有偷情ê行為,hō͘人掠tio̍h把柄藉機褻瀆教會信仰團契ê聖潔。

	第16節,chit節thang反應第4 kah第8節所講ê,身為耶穌基督ê信徒,應該知影盡孝道ê重要,ná親像咱tī頭前已經討論過ê,如果連家己ê親人lóng無想hō͘ in幫助,就真oh進一步見證信仰團契tī耶穌基督ê疼裡ê意義。

第17節,tùi chit節ē-tàng看出教會「領導ê長老」所承擔工作ê內容,包括「講道kah教導」。Mā tùi chia thang清楚看tio̍h chit種長總是專職ê,並m̄是兼差á是義務ê。因為就是專職ê,所以chiah需要教會照顧伊生活上ê需要。Chia使徒保羅所講ê「酬報」,有一種看法認為這是teh指「物質上ê報酬」之外,iáu包含「尊敬」ê意思,因為án-ne,chiah講是為「加倍ê酬報」。

Chit種看法就kah咱台灣長老教會對tī傳道者領受ê薪資kā它稱做「謝禮」仝款,卻m̄是講「薪資」á是「薪水」,原因是認為chit種傳福音ê事工無仝tī一般工作。這是為tio̍h beh hō͘信徒對專心而且認真tī福音事工上ê傳道者,hō͘ in siōng koân ê敬意。所謂「加倍」,這是有含希伯來語ê風味,意思是teh指「豐富」、「夠額而且有chhun」。

第18節,「牛teh踏五穀ê時chūn,bē-tàng籠tòa牠ê嘴」chit句話,是引用申命記第廿五章4節摩西律法ê規定。使徒保羅寫phoe hō͘哥林多教會ê時,mā提起chit方面ê問題(參考哥林多前書九:3—18)。

第19節,「兩個á是三個證人」,是引用申命記第十九章15節摩西律法ê規定:「一個證人無夠額來定人ê罪;至少ài有兩個以上ê證人才thang定人ê罪。」使徒保羅引用chit-ê律法規定,主要是維持教會秩序之需要,伊無希望教會chit種信仰團體輕易引起糾紛。

第20節,chit節是延續第19節,意思是用不實ê罪狀指控傳道者ê,應該被公開譴責,án-ne就ē-tàng減少不必要ê糾紛kah誤會,致使教會ê秩序會失去根據。M̄-koh另外一方面,mā是teh指如果有傳道者犯罪,就應該公開譴責,hō͘其他傳道者知所警惕。

第21節,使徒保羅tī chia會提起了「天使」。猶太人一向有一個觀念,認為天使是替上帝執行命令ê使者,像創世記第十九章ê天使,奉上帝差遣到所多瑪城去執行毀滅ê工作。Koh親像路加福音第一章提起天使奉上帝差遣,去向撒迦利亞傳達行洗禮約翰teh beh出世ê信息,以及kā馬利亞講會因為聖神而有娠生落來耶穌基督。天使tī天頂mā是列位tī上帝審判ê邊á,協助上帝執行審判ê工作(參考帖撒羅尼迦後書一:7)。因為án-ne,使徒保羅tī chia用「天使」,主要意思就是teh指控告傳道者是一件真嚴肅ê事,而傳道者犯罪mā是仝款,tī上帝國ê信息看起來,he是非常嚴重ê,因為傳道者若犯罪,會比一般信徒犯罪hō͘福音信息受tio̍h褻瀆ê情況koh khah嚴重。使徒保羅ài提摩太小心,m̄-thang有任何「成見á是偏私ê心」。因為提摩太尚且少年(參考四:12),有時會hō͘人認為伊少年m̄-bat事。

第22節,這是真重要ê一節,使徒保羅ài提摩太小心,m̄-thang「隨便kā人行按手禮」。所謂「按手禮」,這是真嚴肅ê一個動作。Tī猶太人傳統中,只有長輩對晚輩ê按手,表示祝福,而這祝福是用上帝ê名。如果隨便hō͘人祝福,mā等於違反十誡ê第三誡所講ê,亂使用上帝ê名仝款(參考出埃及記二十:7),真可能會陷入浮濫、不實ê結果,這等於是teh踐踏上帝ê恩典仝款。

第23節,chit句話kah-ná kah前後文lóng對不起來。為甚麼使徒保羅忽然對提摩太提出chit句話來?真oh理解。有可能是因為提摩太身軀狀況欠佳,使徒保羅ê關心m̄-nā tī教會事工,mā tī伊ê生活需要。

第24到25節,chit兩節是相對經文,犯罪kah善行是相對ê,m̄-koh lóng有一個共通點,就是無法度隱藏。無thang隱藏ê事,chit種勸世箴言tī各地lóng有。台灣俗語:「鴨蛋卡密,mā有縫。」中國俗語mā án-ne講:「若beh人m̄知,除非己莫為。」這lóng仝款ê意思。使徒保羅ê這兩句話,其實就是teh kā提摩太講,m̄-thang急beh替一個人行「按手禮」,因為若有人講某某人無好,除非所犯ê過錯是非常明顯ê,若無,有kóa事確實是tī現行時間內無法度查證出來,m̄-koh過一段時間,chiah-ê敗壞ê行踏lóng會顯露出來。仝款ê,mā可能有kóa人被o-ló講真好,ē-sái講是卻看bē-tio̍h實際ê善行,m̄-koh經過一段時間,chiah會發見chit-ê人真正做真chē無為人知ê善事。

重新查詢 專卷研經 提摩太前書系列
錯誤回報,請聯繫