提摩太前書 3章1節 到 3章16節   背景資料  上一筆  下一筆
Chit章進一步講tio̍h ài做一個教會領袖,應該有ê基本要件。教會是一個信仰團體,教會幹部ê條件kah一般民間社團對領導者ê要求自然有無仝,若無,信仰團體就無法度凸顯出它ê信仰意義。Koh講,教會既然是一個信仰ê共同體,就m̄是用某一個人siōng大,á是某一個人siōng重要,卻是用信仰為基礎來治理、維持教會秩序。

第1節,《現代中文》用「教會領袖」,tī《中文和合本》用「監督」。希臘文chit-ê「領袖」ê字是用「episkopos」,並無一定kan-taⁿ用tī教會ê組織中,tī一般機構中mā用來形容有分擔重要責任ê工作者。親像tī歷代志上第廿四章19節,就是teh指hiah-ê參與協助以色列人ê公共事務者。Á tī教會中使用「領袖」是kah一般機構無仝,因為教會是用信仰做基礎ê團體,ài面對ê是上帝,並無親像一般社會機構有所講ê董事會、法院,á是koh khah高層ê機構來管轄。

約翰‧加爾文用「長老」而m̄免「監督」是有原因ê,因為這kah舊約時代以色列人ê長老比較接近其意,「長老」是tī族群中lóng受尊崇ê人,thang tī法庭上擔任審判官ê工作,mā是部落中有影響力ê人。Án-ne咱thang明白,長老ê由來背景,基本上就是beh有能力處理教會chit-ê信仰團契之間ê問題。Koh講,長老lóng是lóng受眾人尊敬ê人。長老教會ê「長老」則有兩層ê意義,其一是teh指「傳道」ê長老,另外一個是teh指「管理」ê長老。

第2到3節,chit兩節經文提起chiah-ê擔任所謂「教會領袖」ê人,一定tio̍h有ê基本生活行為。要件包括:

一是「只有ē-tàng有一個bó͘」。表面上是teh指男性,其實mā是適用tī女性。Koh講,chit句話主要ê意思,就是teh指bē-tàng發生婚外情。

二是生活tio̍h頂真,m̄-thang放蕩。

三是「真gâu教導」。Chit點有一個基本要件,就是所教導人ê tio̍h正確,卻m̄是隨家己ê意思á是認知。使徒保羅寫hō͘提多ê信中就án-ne講:「伊
一定tio̍h 堅守hit-ê 真實koh 符合教義ê信息,chiah ē-tàng 用端正ê 教示來勸勉人,mā ē-tàng 反駁hiah-ê 反對ê 人。(全民版)」(提多書一:9)

四是不貪愛錢財。因為貪慕錢財ê人,就是對上帝無夠額ê信心,mā是對上帝無夠忠實,伊講chit種人等於「拜偶像」(參考以弗所書五:5,歌羅西書三:5)。

第4到5節,使徒保羅提供了一個非常重要ê認bat:建造教會ê基礎,是tùi建造家庭生活開始做起。因為真正ē-tàng hō͘福音事工傳達出去ê,就是tùi美滿ê家庭生活見證開始。

第6節,chit節非常重要,因為tú進入教會ê人,tī信仰基礎上並無成熟,這是thang明白ê。使徒保羅án-ne講,並m̄是否定有kóa人確實真適合,雖然in ê信仰年齡真短,而真正有信仰根基ê人,並無認為一定會有甚麼職位chiah願意出來事奉教會ê工作,卻是只要有需要伊參與ê,伊就會認真投入事奉。

使徒保羅所擔心ê是,有kóa人tú接觸信仰無久,就被選做教會ê領袖,深驚因為án-ne而「心高氣傲」。一個人若tī信仰上án-ne,he會hō͘福音ê功效失去。Chia所講ê「心高氣傲」,原來ê意思是teh指「被濃濃ê煙罩tòa」。一個人若是進入濃煙密佈ê中間,一定會看bē清楚狀況。一個人若是「心高氣傲」,對tāi-chì ê認知就會分bē清楚,chit種人真oh正確來處理教會事務。

第7節,tī教會外「有好聲望」。Chia所提起ê「教會外」,意思就是teh指tī非基督徒中間。Mā就是講,基督徒tī無信耶穌ê人ê眼中,應該ài有好ê評價。

長老教會創會者約翰‧加爾文非常強調:基督徒應tùi工作職場中見證福音,原因mā是tī chia。因為工作本身就是siōng好傳福音ê機會,若是tī工作上無盡責,就是遮蓋了福音ê光芒。

第8節,tùi chit節到第13節ê chit段經文,是講tio̍h幫助教會領袖治理教會ê「助手」。「助手」chit-ê詞,tī《台語漢字本》、中文《和合本》、天主教《思高聖經學會曉版本》等聖經,lóng是用「執事」。所謂「助手」(á是執事),tī希臘文原來ê意思是teh指「奴僕、服務人員」(diakonos)。若以一般社會大眾teh用ê名詞來講,「執事」就是teh指hiah-ê服務人員ê意思。使徒保羅kā「執事」用來設置tī長老ê位階之下。這並m̄是講執事比較低階,卻是指「助手」,是幫助者ê意思(參考使徒行傳六:1—7)。Chit節講起「助手」應該有ê品格,包括講話誠實、不貪杯(指m̄-thang酒狂ê意思)、不貪財等。
第9節,chit節使徒保羅koh一pái提起「清白ê良知」,這是非常重要ê信仰功課。表示對信仰有明確ê認知,只有án-ne chiah ē-tàng tī信徒發生信仰問題ê時,知影怎樣協助信徒明白正確ê信仰。Chia所講「信仰ê奧秘」,指ê是有關聖經正確ê教導。

第10節,使徒保羅tī chia提出身為教會領袖ê助手,應該「先受考驗」,主要原因是執事ê工作所觸kah ê,lóng是kah信徒siōng直接ê教會事務,親像教會財物ê管理,以及關懷等事,lóng kah信徒有直接關係。因為án-ne,若是經過一段時間了後,感覺妥當chiah thang被選做長老á是監督。

第11節,chia提起「in ê bó͘」,有ê翻譯成「女執事」(參考中文《和合本》譯文),mā有ê翻譯做「cha-bó͘人」(參考《台語版》,kah天主教《思高聖經學會曉版本》ê譯文)。M̄-koh tùi希臘文「gunaikas」chit-ê字來看,是teh指助手á是執事ê bó͘,並無錯。使徒保羅tī chia主要用意是提醒教會領袖ê助手á是執事ê bó͘,tio̍h成做丈夫ê幫手,協助料理教會ê事務。因為bó͘會jōa-chē tùi丈夫嘴中知影教會發生ê事,因為án-ne,使徒保羅特別提醒做bó͘ ê,m̄-thang kā所聽tio̍h ê話á是tāi-chì,隨便傳播講出去,因為無正確ê傳言真容易造成koh khah chē ê傷害。

第12到13節,kah教會領袖長老仝款,chiah-ê助手á是執事對家己ê家庭應該有好ê生活見證。

Tùi chia thang看tio̍h使徒保羅非常重視家庭生活和諧ê重要性。如果一個家庭不時teh吵鬧,就真難得有好ê信仰見證。不時發生吵鬧ê家庭,真oh kah別人講述耶穌基督ê疼。任何一個美滿生活ê家庭,lóng是人人羨慕ê對象,只要是有美滿家庭生活,就是見證福音siōng有力ê基礎。

第14到15節,tùi chit兩節經文ē-tàng看出使徒保羅寫chit張phoe ê目的;伊對以弗所教會確實有一份真特殊ê感情,伊希望ē-tàng夠趕緊到以弗所教會去看māi,當然mā teh關心伊得意ê門生提摩太tī hia牧養工作ê情形án怎。使徒保羅tī chia講「教會」就是上帝ê殿。伊tī chia所用ê「家」一字,tī希臘文是用「oikos」,chit-ê字指ê是「大家庭」ê意思,是真chē人,而且in並m̄是來自仝款血緣,卻是根據共同信仰組成ê。Koh講,chit-ê「家」ê另外一個重要信仰認bat,是「永遠活ê上帝ê教會」。Á「永遠活ê上帝」,主要是teh表示chit位上帝是一切性命ê來源,mā是萬物ê創造主。

Chia使徒保羅提起第二個重要觀念,就是由基督徒組成起來ê「家」就是「教會」。Chia ê「教會」,希臘文是「ekklesia」。Chit-ê字ê意思,是講有一陣被揀選出來ê人。使徒保羅用chit-ê字,當然就是teh指基督徒就是hō͘揀選出來ê人。

Koh講,chit句「真理ê柱石kah基礎」,真清楚講出被揀選成做基督徒ê使命,就是beh為真理做見證。這同時mā說明教會存在ê主要目的,是為tio̍h beh傳揚上帝拯救ê真理,而這真理就是耶穌基督。

第16節,chit節是一首o-ló詩歌。Chit首詩歌mā為第9節所提起教會領袖ê助手á是執事應該持守「信仰ê奧秘」作了完美ê解釋。Chit節thang參考腓立比書第二章6到11節。使徒保羅Tī chit首詩歌中提起幾點重要ê認bat:

一、上帝是用人ê形體出現。這mā是基督教會接受三位一體上帝中所講ê「子上帝」,耶穌基督就是上帝以人ê形像出現tī人類世界上,為tio̍h beh hō͘咱透過耶穌chit位「子上帝」看見父上帝ê榮耀。

二、tī聖神裡稱義。Chit句話ê意思是teh指耶穌基督雖然hō͘人釘死tī十字架上,m̄-koh,上帝卻藉tio̍h伊死tī十字架上,hō͘信耶穌基督ê人,因為聖神ê氣力,接納耶穌基督為性命ê主,藉這會得thang kah上帝「和好」(稱義)。這就是三位一體ê第三要義所講ê「聖神上帝」。意思就是一個人ē-tàng明白耶穌基督ê救恩,並m̄是因為人有甚麼能力,á是人thang做甚麼好事,卻是因為上帝tī耶穌基督內面ê疼,透過聖神ê做工,感動人ê心,hō͘人願意接受耶穌基督為性命ê主。

三、「被眾天使看見」。Chit句話thang tùi耶穌基督降生,直到耶穌基督死去koh活ê時,lóng有天使做見證者來了解。

四、「被萬邦傳揚,被世人信仰」。這mā講出福音傳揚到世界各地,而且突破了族群中ê界線,無koh有猶太人kah外邦人ê分。只有án-ne,chiah ē-tàng kā它稱做「萬邦」。

五、「被接到天頂」。Chit句話看起來kah-ná無甚麼,m̄-koh卻為耶穌基督koh再臨提供了一個重要ê信仰告白。耶穌基督升天,這是使徒行傳第一章9節、11節記載ê實況。Mā因為án-ne,基督教會久長以來,一直深信tio̍h耶穌基督必定會koh來臨。

重新查詢 專卷研經 提摩太前書系列
錯誤回報,請聯繫