提摩太前書 2章1節 到 2章15節   背景資料  上一筆  下一筆
第二到三章,使徒保羅講tio̍h有關教會生活ê規律,特別是tī第二章伊提起應該有ê信仰態度之外,就是對教會團契生活中,應該有ê基本行為。教會就是一個信仰團契á是大家庭,因為án-ne,教會有mài-koh tī一般社會團體。Tùi chia thang看tio̍h使徒保羅所努力ê,就是beh建立一個以信仰為基礎ê團契。

	第1到2節,使徒保羅beh為所有ê人向上帝「祈禱」,這就是所講ê「代禱」,而代禱ê對象包括「君王kah所有在位ê人」。因為教會ê存在是為tio̍h所有ê人,並m̄是為tio̍h某一個人,mā m̄是為tio̍h某一kóa特定對象。另外,教會若是屬tī耶穌基督ê身軀,是為tio̍h所有自認有罪ê人而存在。因為án-ne,只要是屬tī基督ê教會,就是beh關心所有ê人,並且beh為所有ê人向上帝祈求,這是基督教會應該有ê信仰責任。祈禱,是teh表明教會是用上帝做中心,上帝做敬拜ê對象,祂是教會ê主,mā是性命ê主宰。因為án-ne,有真誠之心teh祈禱ê教會,bē kā某一個人當做siōng重要,卻是會以上帝為siōng重要。

第3到4節,使徒保羅認為ē-tàng為所有人向上帝代禱,這是一件好事,是上帝所歡喜ê事。因為上帝並無希望有人沉淪。上帝是疼,祂希望所有ê人lóng ē-tàng「得救,lóng認bat真理」。

第5節,chit節thang參考哥林多前書第八章6節。使徒保羅特別解釋了「真理」ê意義,就是:「只有一位上帝,tī上帝kah人之間有一位中間人,就是成做人ê基督耶穌。」chit-ê句話mā ē-sái講是基督教會ê基礎,mā是使徒保羅提醒提摩太治理教會一定tio̍h謹記在心ê一件事。這mā提醒提摩太知影,tī以弗所教會中必定有人kā耶穌基督拯救ê恩典hō͘疏忽à。

當使徒保羅講出「只有一位上帝」,並且強調講這就是「真理」ê時,chit種講法tī當時ê環境下,差不多就是teh拚命仝款,因為tī當時若否定羅馬皇帝是神,等於否定皇帝ê權威,這會帶來性命ê危險。M̄-koh使徒保羅對提摩太勸勉,tī牧養教會ê工作上,一定教導信徒知影「只有一位上帝」,chit-ê真理是無thang取代ê。

二是耶穌基督就是上帝kah人之間ê中間人。這是新約聖經ê主題,ná親像希伯來書ê作者一再強調ê,耶穌基督「成做新約ê中間人,為tio̍h beh hō͘上帝所呼召ê人ē-tàng領受伊所應允永恆ê福澤」(參考希伯來書九:15a)。

第6節,chit節是進一步teh解釋第5節所提起ê「中間人」chit-ê名詞ê意義。使徒保羅講這「中間人」是用犧牲家己ê性命,就是為tio̍h beh hō͘人tùi罪ê中間tháu放出來,因為罪ê代價就是「死亡」(參考羅馬書六:23),耶穌基督成做「中間人」,就是用伊ê死為代價hō͘所有世人ê罪得tio̍h赦免,因為上帝「ài人人得救」。

第7節,使徒保羅hō͘提摩太知影伊ê使命,就是beh幫助「外邦人」知影耶穌基督ê救恩。Chit點kah伊tī傳福音ê經歷有特別關係(參考使徒行傳十八:5—7),其實,伊心內非常期待所有猶太人lóng ē-tàng聽信福音,伊甚至講若猶太同胞ē-tàng聽信福音,而伊為tio̍h án-ne而受詛咒mā願意(參考羅馬書九:3)。Tī這節使徒保羅自認擔任三個角色:一是傳道者、二是使徒、三是教師。其實,三者名稱無仝,實質ê意思是仝款ê。

	Tùi第8節開始,直到第15節,lóng是講tio̍h針對信徒tī教會信仰生活中應該有ê規律。伊事(tāi)先提起對「cha-po͘人」ê期待。事(tāi)先伊講起「cha-po͘人」tī教會ê時祈禱應該「虔誠地舉起手來祈禱」,chit種方式大概就是早期猶太人siōng普遍祈禱ê姿態—khiā立、舉手、掌心朝上,而且tio̍h仰望天空。Chit-ê意思就是用無犯罪ê手。如果人ê手一面犯罪,一面祈禱,這是對上帝極大ê污辱,等於是teh褻瀆上帝ê神聖仝款。Koh講,祈禱iáu koh khah「bē受氣」,就是無記tiâu別人ê錯誤。換句話講,祈禱不是beh控告別人ê狀。Á「不爭論」,意思是teh指「giâu疑」。Án-ne就真清楚了,當beh向上帝祈禱ê時chūn,m̄-thang心存懷疑。如果對上帝有懷疑ê心,祈禱就無意義à。

第9到15節,chit段經文是關係教會婦女ê期待。類似ê經文mā出現tī哥林多前書第十四章33節到35節。

Thang理解使徒保羅是一個觀念真傳統ê猶太人,至少伊是屬tī法利賽派教育長大ê猶太人。使徒保羅mā會hō͘家己傳統ê文化思想所左右,m̄-koh真正teh beh了解使徒保羅對當時基督徒之社會生活ê用心,thang理解是非常認真,而且要求比一般社會ê倫理道德之標準iáu koh khah koân。Á tùi第五章就會發見當時以弗所教會內部,必定發生真chē kah婦女相關ê問題,包括有婦女打扮得「花枝招展」,看起來ná親像以弗所城女神亞底米(參考使徒行傳十九:24)廟內ê廟妓仝款;有ê婦女真愛「串門子」,四界亂講話,「in講長道短,專管閒事,講kóa無應該講ê話」(參考提摩太前書五:13);可能有kóa寡婦tī日常行為上,hō͘人認為伊歡喜chhōe cha-po͘人同房,因為án-ne hō͘人議論等等,因為án-ne,使徒保羅chiah會講出chit段經文所記載ê教示。Án-ne,咱thang看tio̍h一件重要ê事,就是使徒保羅每寫一封書信,lóng有伊特定ê對象kah目的,伊寫hō͘提摩太ê chit封書信,就是beh伊去教導以弗所教會信徒,一定tio̍h遵守ê教會生活規矩,免得因為m̄知節制,致使耶穌基督ê名聲受tio̍h影響,chit點chiah是伊所關心ê。

伊強調基督徒應該ài有「好行為」thang kah信仰告白來相稱。所謂「好行為」thang參考提摩太前書第一章5節所提起ê三項內涵。伊koh提起cha-bó͘人需要「恬恬學習,事事謙卑」。Tī早期社會,婦女真少有機會受正規教育,koh khah少有機會參與家庭以外ê社交活動。M̄-koh因為信耶穌基督了後,大家thang tī聚會ê所在彼此分享tùi聖經中學習tio̍h ê信息kah生活經驗。因為án-ne,這是一個真難得ê機會,hō͘婦女thang tī教會中得tio̍h新ê知識,開啟被掩蓋ê心智。

第12節是一再被真chē人提出質疑地ê,有可能當時以弗所教會內已經有類似今á日教會ê「姊妹團契」(á是婦女團契)之類ê組織,m̄-koh卻m̄是用心在學習認bat聖經ê教示,反tńg是teh講長道短,致使教會內部是非真chē,影響tio̍h教會規矩。Chia所提起ê「管轄」,原本ê意思是teh指「僭jú」,意思是講超過了家己ê職權範圍。這是teh指tī教會內有婦女想beh kah cha-po͘人爭奪權位。Tio̍h注意:福音ê事工是彼此同工,卻m̄是爭地位高低。信徒彼此相爭,就會造成教會ê分裂。

第13到15節,tī chit三節經文內底,使徒保羅採用創世記第二到三章經文ê背景,說明男女之間互動ê關係。Ná親像我tī頭前已經提過ê,使徒保羅是生活tī猶太文化之下,而且tī兩千年前時代ê希臘文化思想教育下成長ê人,當伊teh處理人ê問題ê時,mā是仝款脫離不了當時環境ê限制。因為án-ne,看chit段經文ê時,thang了解使徒保羅寫chit張phoe,是為tio̍h beh應付發生tī以弗所教會ê問題,並m̄是一封thang用tī每一個地方ê書信。

Tī使徒保羅ê觀念中,伊所強調ê是tī耶穌基督內面,大家lóng是仝款ê,lóng是屬tī耶穌基督身軀中ê一個小肢體(參考哥林多前書十二:12—13)。伊teh寫hō͘加拉太教會ê書信中mā提起chit種話講:「無分猶太人á 是外邦人,奴隸á 是自由ê 人,cha-po͘ 人 á 是 cha-bó͘ 人,tī 基督耶穌內面lóng 成做一體。(全民版)」(加拉太書三:28)Án-ne chiah是使徒保羅真正想beh表達ê通則觀念。

重新查詢 專卷研經 提摩太前書系列
錯誤回報,請聯繫