帖撒羅尼迦前書 4章1節 到 4章18節   背景資料  上一筆  下一筆
Ná親像頭前已經提起過ê,chit章kah-ná是一個新ê段落,mā ē-sái講是另外一封書信。

	如果注意使徒保羅所寫ê書信,lóng會發見一個共同ê特點,就是會勸勉收phoe ê教會眾信徒,tī信仰kah生活之間一定tio̍h有親密ê連結。Tī chit段經文中,伊強調「努力工作」kah「火熱ê心事奉主」是同等ê。Mā就是講一個人如果認真工作,kah熱心事奉上帝lóng仝款重要。如果一個人tī工作職場上隨便、應付、偷工減料,chit種人無論怎樣熱心教會ê事工,lóng是無正確ê,mā無算有好見證。因為好ê信仰,並無只是tī教會,mā tio̍h tī工作場合中見證出來。

    第1到2節,類似tī第二章到6節所講ê,基督徒並m̄是tio̍h討人歡喜,卻是ài面對上帝。因為án-ne,tī生活上就一定tio̍h活出上帝所歡喜ê模樣。

第3到6節,chit段經文講出帖撒羅尼迦教會信徒ê信仰生活出了問題。Tùi第3節chit句「絕對無淫亂ê事」,就thang看出tī帖撒羅尼迦教會ê信徒出現淫亂ê行為,這就kah哥林多教會所發生ê狀況仝款了(參考哥林多前書五:1)。因為án-ne,使徒保羅ài in知影「控制家己ê身軀」,chit句話mā thang當做「kah家己ê bó͘相處」,chit句話真清楚,就是bē-tàng有「婚外情」ê行為。第6節所講ê「bē-tàng有失禮同道á是佔伊sio̍k ê行為」,意思是teh指有關性方面ê事,mā就是「通姦」ê行為。因為chit款tāi-chì m̄-nā傷害家己,同時mā傷害了別人,koh khah嚴重ê是,致使kui個信仰團契ê分裂、不和諧。

注意chia ê「身軀」一詞所用ê希臘文是「skeuos」,指ê是「器皿」ê意思。使徒保羅ê意思是,咱ê身軀乃是上帝ê「器皿」,一定tio̍h潔淨,bē-tàng有污穢,因為基督徒ná親像beh做為獻祭hō͘上帝ê「器皿」仝款。這ná親像伊寫hō͘羅馬教會提起ê,基督徒tio̍h親像一個「活活ê祭物獻hō͘上帝」(參考羅馬書十二:1)。

使徒保羅tī chia真清楚講tio̍h,上帝對犯淫亂行為ê人是bē原諒ê,一定會懲罰。使徒保羅會án-ne強調,主要是beh hō͘帖撒羅尼迦教會ê信徒知影,無論是甚麼理由,保持潔淨ê婚姻關係是非常重要ê信仰功課,因為婚姻是性命ê約ê記號,ná親像洗禮仝款,lóng有上帝kah咱性命立約ê記號,因為án-ne,一定tio̍h用純潔ê心來遵守。

第7到8節,chia所提起ê「選召」chit-ê字眼。Chit-ê字ê意思並m̄是隨便挑出來,卻是經過深思熟慮確定了後,所做ê決定。有含「願意付出」代價ê意思。這表示上帝揀選以色列民族做祂ê選民,是經過精挑細選ê結果,而上帝揀選in,並m̄是因為in有甚麼好條件,反tńg是因為上帝ê憐憫kah慈愛。因為án-ne,伊勸勉帖撒羅尼迦教會ê信徒應該就tio̍h tùi被揀選ê觀念來聖潔家己,hō͘家己感覺身為基督徒kah一般人有無仝ê所在, tio̍h比一般人對家己有koh khah高ê道德要求,有koh khah高ê生活規律準則,有koh khah頂真ê工作態度等。伊講拒絕chit份揀選,m̄是拒絕人,卻是拒絕上帝。請注意chia所講ê「拒絕」chit-ê詞,使徒保羅所用ê希臘文是「ah teteo」,chit-ê詞ê意思thang當做「遺棄」,mā有含「m̄看tī眼內」ê意思。Mā就是無願意tùi敗壞ê中間改變過來,m̄ kā chiah-ê敗壞ê道德行為遺棄掉,這就是拒絕上帝揀選ê恩典,等於是m̄ kā上帝ê揀選之愛當做一回事,m̄看tī眼內。

第9到12節,chia講beh「彼此相疼」,使徒保羅tī chia所用ê是「philadelphia」這字,chit-ê意思是teh指同為一個家庭ê親兄弟姊妹之愛。使徒保羅會用chit-ê「philadelphia」chit-ê字來形容帖撒羅尼迦教會,有意思beh hō͘該教會信徒知影:in ná親像一個大家庭中ê兄弟姊妹仝款,lóng有仝款ê天父、仝款ê救主。伊勉勵in tio̍h tī chiah-ê愛人如己ê功課上繼續進步。Á帖撒羅尼迦教會的確是一間真有疼心ê教會,in m̄-nā會親像一個大家庭中ê兄弟姊妹一般彼此相疼,而且iáu會關心所有馬其頓教會ê信徒,這確實m̄是一件簡單ê事。Chia伊勸勉信徒tio̍h「安份守己」,chit-ê詞tī《台語漢字本》聖經用「恬靜」(中文《和合本》仝款,用「安靜」),意思是teh指會冷靜思考,不隨便跟tòe別人ê意見起鬨。

另外一方面,使徒保羅mā勸勉該教會信徒tio̍h「親手做工來維持家己ê生活」,chit句話講出一個重要ê社會曉背景;當時希臘文化ê社會,因為國勢bat達tio̍h顛峰ê狀態,人民富裕,差不多每人厝內lóng有畜養奴隸做工。因為án-ne,靠勞力做工飼家計ê人一直被希臘文化ê社會鄙視(siùⁿ),認為he是卑賤ê人從事ê工作。帖撒羅尼迦教會中,有kóa人就是chit-ê態度,in認為既然教會是一個大家庭,就beh彼此分享,因為án-ne,只等待別人提供給in lim食用,卻m̄知家己mā tio̍h努力工作,以求自hō͘自足,並進一步幫助需要ê人,反tńg是遊手好閒,歡喜答嘴鼓論地,評論別人ê態度,m̄-nā對教會團契生活無幫助,mā m̄是一個信徒應該有ê生活態度。

第13到18節,每一個時代ê信徒lóng會對耶穌基督koh再臨ê時刻,á是景象提出問題,ná親像哥林多教會ê信徒mā是án-ne,因為án-ne,使徒保羅tī哥林多前書第十五章用kui章ê篇幅論到有關koh活ê事。chit-má chia伊kah帖撒羅尼迦教會ê信徒講起有關耶穌基督koh再臨ê景象。早期教會有一個共同ê觀點:主耶穌基督koh再臨ê時chūn,mā是審判ê時刻,m̄-nā beh審判已經往生ê,mā tio̍h審判iáu活teh ê每一個人,因為he是末日ê時刻。另外一個觀點是:信耶穌基督ê人,lóng會得tio̍h koh活ê耶穌基督ê拯救。真chē人因為等待耶穌基督ê koh再臨,結果等到往生ê時iáu未出現,因為án-ne帶憂傷離開世間。Á iáu活teh ê人卻一再祈求hit-ê末日趕緊來臨。因為án-ne,使徒保羅說明chit件事:即使已經往生,當耶穌基督koh再臨ê時chūn,伊會hō͘ hiah-ê已經往生ê人,koh活起來,並且chhōa in到伊為大家安排ê所在(參考約翰福音十四:1—4)。

第15節提供一個重要ê觀念:koh活,對所有信耶穌基督ê人來講,無論是已經死去ê人,á是iáu未死去ê人,恩典lóng仝款,無前後之別。 第17節ê「雲裡」,通常lóng是teh指上帝顯現ê時chūn(參考出埃及記十四:19、三十四:5、四十:34—38)。Á tī空中kah koh活ê主耶穌相會,乃是基督徒siōng大ê榮耀。

重新查詢 專卷研經 帖撒羅尼迦前書系列
錯誤回報,請聯繫