帖撒羅尼迦前書 1章1節 到 1章10節   背景資料  下一筆
Ná親像使徒保羅寫hō͘其他教會ê書信仝款,開始就是請安,koh來就是先o-ló受信ê教會á是對象,續落來就會提起伊寫chit張phoe ê原因。

第1節,使徒保羅講chit封書信是伊kah「西拉kah提摩太寫hō͘帖撒羅尼迦教會」ê。西拉,是使徒保羅第二pái傳福音ê時ê同工(參考使徒行傳十五:40)。伊是耶路撒冷教會所派出ê兩位代表之一,另外一位是巴撒巴ê猶大(參考使徒行傳十五:22),in兩人tī教會lóng受尊敬,甚至tī安提阿教會hông稱做是上帝ê先知(參考使徒行傳十五:32)。
另外一位是提摩太,伊mā是使徒保羅第二pái出去傳福音ê時,tī路司得tú-tio̍h ê一位難得ê好青年。Tī路司得kah以哥念ê眾信徒lóng真o-ló提摩太(參考使徒行傳十六:1—2)。

Chit節使徒保羅iáu提起一件非常重要ê信仰認知,he就是帖撒羅尼迦教會是「屬tī父上帝kah主耶穌基督」,chit句話真清楚說明一間真正教會,並m̄是屬tī某一個人ê教會,mā m̄是某一個人擁有ê私人財產,真正基督教會,乃是屬tī上帝kah耶穌基督ê。

第2到3節,使徒保羅一開始就提起beh為帖撒羅尼迦教會ê緣故感謝上帝。原因伊提起三點:一是in kā信仰實踐出來,chia ê「信」是teh指對上帝絕對忠實。二是用疼心辛勞工作,使徒保羅tī chia所用ê「疼心」,tī希臘文是用「Agape」chit-ê字。三是堅守主耶穌基督ê ǹg望,chia ê「ǹg望」,是teh指對koh活ê ǹg望。Tùi chit點mā看tio̍h帖撒羅尼迦chit本書信有一個非常重要ê主題,就是講tio̍h未來koh活ê信息。這thang看出帖撒羅尼迦教會tī使徒保羅眼中,是一間有達tio̍h「信、望、愛」這三項標準ê教會。

第4到7節,使徒保羅稱呼帖撒羅尼迦教會ê信徒「兄弟眾姊妹」,伊tī hō͘該教會這前後兩本書信中,mā不過是短短ê八章,m̄-koh「兄弟眾姊妹」卻用了共計21次,前書用了14次,後書用了7次。使徒保羅用chit-ê詞句ê意思,原本是teh指「被一般人看做愚笨、無能力、地位卑賤」ê,m̄-koh卻lóng是hō͘上帝揀選ê子民(參考哥林多前書一:26—27)。使徒保羅tī chia則用「兄弟眾姊妹」chit-ê詞,強調大家lóng是上帝所意愛ê對象,是上帝特別「揀選」出來ê人民。Koh講,使徒保羅mā強調伊傳講福音信息除了用言語,mā「óa靠聖神ê大能」,這是teh指感動人心ê氣力。因為福音ê信息若無聖神ê感動,就算人用盡了所有súi ê詞藻,mā是枉然。

Tùi第6節就會發見帖撒羅尼迦教會mā受tio̍h迫害。受tio̍h迫害ē-sái講是早期教會共同ê經歷,當時羅馬帝國ê政府已經開始對基督徒有防備之心,而且開始對基督徒施壓力。使徒保羅o-ló帖撒羅尼迦教會信徒真有見證,即使tī chit種迫害之下,in學習使徒保羅ê模樣,mā學習耶穌基督tī十字架ê受難,寧可接受迫害,mā bē改變對上帝ê忠實,並且iáu用喜樂ê心接受,chit點thang真m̄是簡單ê事。這mā是為甚麼使徒保羅會講帖撒羅尼迦教會信徒是馬其頓kah亞該亞教會ê模範。

第8到10節,chit段話對帖撒羅尼迦教會ê信徒來講,確實是真大ê鼓勵。使徒保羅講帖撒羅尼迦教會美好ê見證已經傳開來,而且jú傳jú遠。使徒保羅提起tī外面地教會傳述有關帖撒羅尼迦教會信徒有美好見證ê事,包括三點:其一是in接受福音ê熱情;二是in tī信仰上有美好ê見證;三是in用信心teh ǹg望耶穌基督ê koh再臨。Á值得注意ê是有關第10節ê「ǹg望耶穌tùi天頂降臨」,使徒保羅tī chit本書信中提起真chē pái,有第二章19節;第三章13節;第四章16節;第五章2節。Mā thang án-ne講,帖撒羅尼迦前書ê主要內容mā是teh談論有關耶穌koh再臨ê主題。

重新查詢 專卷研經 帖撒羅尼迦前書系列
錯誤回報,請聯繫