先知撒母耳teh獻祭了後，邀請掃羅同桌共席，並且iáu有其他ê賓客作陪，參加chit-ê筵席ê人共計有三十位，等於是公開teh宣告掃羅tī以色列人中ê特殊地位kah角色。因為先知撒母耳是「士師」，就是統治者，伊用án-ne ê方式對待掃羅，tú好thang凸顯掃羅地位ê重要性。

第22到24節，值得注意ê是，掃羅被安排坐tī第一位，先知撒母耳用chit種方式向眾人顯示掃羅ê特殊身分。Chit pái ê餐會是經過安排ê。因為án-ne，先知撒母耳事先就交帶廚師tio̍h留落來特別ê肉來宴請掃羅。而且kā chit塊特選ê腿肉「khǹg tī掃羅ê面前」，這是teh接待國王ê時，chiah會有ê舉動。若無，就是款待上賓ê時，主人chiah會án-ne做。先知撒母耳故意在眾人面前án-ne做，就是beh公開宣告上帝beh揀選掃羅做以色列人ê王。這真可能kah掃羅出身ê背景有關；伊是便雅憫族ê人，可能驚會tú-tio̍h伊族ê人，特別是以色列十二支派中siōng大族ê猶大族人ê不滿，而發生杯葛ê舉動。透過chit種宴席，thang hō͘所有參與宴席ê人看tio̍h，連先知撒母耳lóng án-ne尊崇掃羅，其他ê人就甭想beh有反對ê意見à。

第25節，請注意chit節，《現代中文譯本》、《呂振中譯本》，以及《英文標準版》等等ê翻譯，lóng是：「有人為掃羅tī厝頂預備好床鋪」，chit-ê翻譯是根據《七十人譯本》。M̄-koh希伯來文ê聖經則譯做「撒母耳kah掃羅tī厝頂講話」（「Samuel talked with Saul on the roof.」），《中文和合本》mā是用chit-ê翻譯。Chit兩種翻譯lóng thang有適當ê解釋，這就ná親像接待貴賓ê時一定會準備siōng舒適ê所在。另外一點，為tio̍h beh認bat上帝所揀選ê第一位國王，先知撒母耳tio̍h先對伊有koh khah chē ê認bat kah了解，chiah ē-tàng向以色列人民紹介、公告。

第26到27節，為tio̍h beh kā上帝ê話傳hō͘掃羅，先知撒母耳先kā掃羅ê奴僕支開，一路送掃羅到城門邊ê時，伊chiah kā上帝ê信息單獨講hō͘掃羅聽。