撒母耳記上 8章1節 到 8章9節   背景資料  上一筆  下一筆
Tùi第八章開始到第十二章,lóng是紹介以色列君王制度ê形成。作者用chit段君王制度ê形成過程,同時teh探討這歷史事件kah信仰上引發ê衝突;這衝突是一方面以色列人民要求設立君王(八:5、19—20),另外一方面則設立君王teh表明以色列人民無意愛上帝為in ê王(八:7;十:19;十二:17、19)。

其實,有關設立君王制度ê背景kah原因,tī撒母耳記就有兩種傳統;第一種,認為這是出tī上帝ê意思,上帝親自ài撒母耳設立君王來帶領以色列人。Chit種傳統觀點tùi第九章ê記事thang看出來。第二種,是以色列人tī君王制度設立了後,感覺非常失望。Chit種傳統tùi第八章、第十章17節到第十二章ê經文,真明顯講出以色列人認為chit種君王制度所帶來ê,只是koh khah chē ê貪污kah違背上帝旨意。因為án-ne,thang了解:撒母耳記是由無仝ê資料編撰而成ê,並m̄是出tī仝一個種資料。Á chit種交織做伙ê資料,有時看起來會hō͘ 讀者感覺kah-ná tī先知撒母耳身上有矛盾ê所在,親像tùi第八章ê描述,看tio̍h先知撒母耳是抱tio̍h無仝意設立君王ê觀點,這tī第十五章10到11節,伊對上帝後悔立掃羅為王ê事,表現出無仝意ê態度。先知撒母耳有chit種心結,tī一般以色列人中間mā是án-ne。特別是北國以色列人民,對所羅門王傳承王位hō͘家己ê kiáⁿ羅波安,就表現出m̄ kah苟同ê態度,這thang tùi歷代志下第十章12到19節看出。

Mā tùi以色列人民要求設立君王帶領in chit件事,看出迦南地人民tī政治制度上比以色列人民ê族長制度koh khah現代化真chē。In一再強調講「請替阮立一位王,治理阮,kah其他國家仝款」(八:3、20),這說明以色列人民tùi遊牧生活進入高度農業社會ê迦南地,m̄-nā學習tio̍h種作ê生活方式,mā tùi chia學習tio̍h新ê社會制度。雖然是人民要求設立君王,m̄-koh,膏立國王乃是由上帝ê奴僕撒母耳執行,這是一個特點表明膏立ê行動出tī上帝ê旨意,達成人民ê要求。

Kui本撒母耳記上,記載先知撒母耳ê記事並無chē,除了第三章記載伊hō͘ 上帝揀選成做先知,然後就是第七章記載伊án怎幫助以色列人民「lóng向上主求助」,除去所有ê偶像神明,專心事奉上帝(參考七:4),並且mā帶領以色列人民óa靠上帝。因為án-ne,以色列人民chiah ē-tàng tī上帝ê幫助下,kā前來攻擊ê非利士人擊退。Á chit段經文所描述ê ná親像祭司以利ê kiáⁿ不學好仝款,chit-má是先知撒母耳ê kiáⁿ並無學tio̍h老父ê模樣,只知影對錢財存貪婪ê心,結果被以色列人民拒絕。以色列人民為tio̍h án-ne要求先知撒母耳為in設立君王來帶領in。

第1到3節,chit三節講出年老ê先知撒母耳ê家庭問題。伊明知影家己ê kiáⁿ無好,卻iáu立家己ê kiáⁿ當「士師」。M̄-koh真正士師,並m̄是家己講ài做就當,ná親像先知並m̄是家己講了算數,卻是有上帝ê選立chiah會有上帝賜福hō͘ in ê氣力。因為án-ne,先知撒母耳家己立kiáⁿ當士師,並m̄是出tī上帝ê手。伊ê chit兩個kiáⁿ卻只知影貪婪,m̄知珍惜身分。

第4到6節,以色列人民ê代表(長老)為tio̍h án-ne chhōe先知撒母耳,向伊告狀伊kiáⁿ ê惡行,並提出希望ē-tàng親像迦南人仝款,有君王來治理以色列人民。為tio̍h án-ne,先知撒母耳真無歡喜ê向上帝傾訴。

第7到8節,chit段經文是上帝回答先知撒母耳ê問題。Ná親像頭前提起ê有兩種傳統看法,一種是支持ê另外一種是反對君王制度。Tī chia是反對君王制度ê傳統,認為反對先知撒母耳,就等於反對上帝仝款。因為先知是上帝ê奴僕,何況先知撒母耳是帶領以色列人民歸向上帝ê主要領導者。作者指出以色列人民真正ê問題是去拜別ê神,而這mā是kui本撒母耳記ê中心議題。士師ê出現,就是以色列人民棄sak上帝,受tio̍h外族攻擊而陷入苦難中ê時,in懇求上帝憐憫、帶領in,上帝chiah揀選奴僕來管理in。Chia特別提起出埃及ê事件,因為有上帝ê恩典,帶領以色列人出埃及,chiah ē-tàng hō͘ in會得thang進入流奶kah蜜之地ê迦南地。即使是án-ne,tī曠野流浪ê時,in mā bat因為等bē-tio̍h摩西tùi山頂落來,就背叛了上帝(參考出埃及記三十二:1)。

第9節,上帝同意in,chit種同意是一種「chhut-chāi」ê意思,因為in無koh聽從上帝ê話,bē記得上帝ê恩典。M̄-koh上帝ài先知撒母耳提醒in beh為設立君王制度付出代價。


重新查詢 專卷研經 撒母耳記上系列
錯誤回報,請聯繫