撒母耳記上 7章2節 到 7章11節   背景資料  上一筆  下一筆
撒母耳記上第七到八chit兩章,lóng是記載先知撒母耳án怎帶領以色列人。然後,幫助以色列人建立君王制度。因為án-ne,真正講tio̍h先知撒母耳事跡ê,只有第七章。Tùi第八章一直到第十六章,lóng是記載先知撒母耳tī以色列人中所行ê事,伊雖然無親像君王般親自帶領以色列人民,m̄-koh卻擁有絕對ê權威,這mā說明所謂「先知運動」ê特色,就是即使是tī君王面前,先知iáu-koh遵照上帝所hō͘ in ê信息,講出上帝ê話語。

Chit段經文說明先知取代了祭司ê角色,koh khah重要ê,是描寫先知撒母耳án怎指揮以色列人民抵抗非利士人,伊扮演ê角色,並無只限tī傳達上帝ê話語,koh khah重要ê,伊mā扮演著有如君王ê角色。其實,先知撒母耳mā被看做是最後ê一個士師。雖然tī第八章1節有提起先知撒母耳親自立兩個kiáⁿ當士師,m̄-koh卻m̄是tùi上帝直接任命,因為án-ne,in不被看做是正式ê士師。

第2到4節,因為有約櫃,以色列人民ná親像過去仝款,不時到亞比拿達ê厝裡去詢問上帝ê旨意,並請求上帝伸手救助。第3節是濃縮了過去二十年先知撒母耳所做ê,就是beh改造以色列人偏差ê信仰,伊教導以色列人民一定tio̍h棄絕拜偶像ê行為,專心歸向上帝,以色列人民聽從了先知撒母耳ê勸勉。

第5到6節,chia講先知撒母耳召集以色列人民聚集到「米斯巴」,這是便雅憫境內ê村鎮(參考約書亞記十八:26),距離耶路撒冷約有十二公里。Tī chia bat發生以色列十一個支派ê人,聯合起來攻打便雅憫支派ê事件,並且差一點á就消滅了便雅憫ê族群。先知撒母耳召集以色列人tī chia集合,伊beh帶領in向上帝祈禱。Chia並無說明是甚麼原因,先知撒母耳會要求舉行隆重ê懺悔、認罪方式,向上帝祈求赦免赦免。使用ê方式是「phah水來澆tī上主面前」,加上用「禁食」ê方式(這mā是聖經中唯一記載chit種動作ê經文)來進行chit pái ê代禱儀式,chiah-ê lóng是teh表示一種洗滌清氣,mā說明心內敬虔、潔淨ê意思。

第7到11節,「米斯巴」iáu有另外一個意思,就是teh指「守望塔」。Tùi chit-ê名thang看出chit-ê所在有「制高點」ê軍事重要性。

非利士人為甚麼beh來攻打以色列人?一則,可能是in認為以色列人離開了約櫃所在地基列‧耶琳,到米斯巴ê所在。Koh講,in無想beh hō͘以色列人koh一pái出現新ê領導者,án-ne,in chiah ē-tàng繼續「轄制」以色列人。五個非利士首領就帶領軍隊beh來攻打以色列人民,這hō͘以色列人民非常驚惶,因為頂pái chiah phah敗仗死傷慘重。先知撒母耳向上帝祈禱,祈求上帝救in脫離非利士人ê手。伊同時扮演祭司ê角色。Án-ne,撒母耳除了是先知之外,mā同時是祭司,又koh是「士師」(領袖ê意思)。上帝垂聽先知撒母耳ê祈禱,chit對全體以色列人來講,是一個非常重大ê事。Á非利士人想beh利用先知撒母耳正teh獻祭ê時進行破壞。Tī in看起來,破壞宗教禮儀,tú好thang hō͘ in ê神-耶和華上帝無法度顯現威力。M̄-koh非利士人chit種動作,mā等於是teh「褻瀆」上帝ê神聖仝款。上帝tùi天頂雷擊非利士人,就是tī懲罰in褻瀆以色列人民敬拜上帝ê神聖典禮。Chit pái以色列人phah贏了非利士人。Mā是先知撒母耳第一pái hō͘以色列人民排除了非利士人ê挑釁。

重新查詢 專卷研經 撒母耳記上系列
錯誤回報,請聯繫