撒母耳記上 4章12節 到 4章18節   背景資料  上一筆  下一筆
Chit段經文描述tī戰場上以色列軍隊失利ê消息傳tńg來示羅後,以色列人民ê驚惶,以及祭司以利ê喪命,chiah-ê結果lóng是上帝早就預言有講過ê。聖經作者有意用chit種方式teh表明,若是當時上帝ê先知kā信息傳hō͘祭司以利了後,伊ē-tàng用嚴厲ê方式制止家己ê kiáⁿ褻瀆上帝,並帶領全體以色列人民悔改認罪,有可能以色列人民iáu bē致使失敗到án-ne慘痛。

第12到14節,有一個便雅憫支族ê戰場報信者,用「撕破家己ê衫褲,掖灰tī頭殼頂」ê方式表示悲痛地走到示羅報信。全城ê人lóng因為聽tio̍h chit-ê消息而驚惶號哭。因為知影會失去約櫃,等於會失去上帝ê同在。Koh khah大ê災難必定會續接teh來。

第15到18節,祭司以利當時已經九十八歲,年老眼花,只有ē-tàng透過聽tio̍h ê聲音辨別事物。因為án-ne,伊聽tio̍h有極大ê號哭聲音而詢問,chiah知影伊ê兩個kiáⁿ何弗尼kah非尼哈lóng tī戰場上被刣死,而且上帝ê約櫃mā被非利士人搶去。就án-ne,祭司以利聽tio̍h chia就mā暴斃死去,伊當以色列領袖共計四十年。Án-ne,先知ê預言全部lóng應驗ā。

這是第一pái記載約櫃被非利士人擄行,m̄-nā約櫃受掠去,而且兵敗如山倒,傷亡慘重,chē kah三萬四千人被刣(第2節、第10節)。這kah當年約書亞chhōa以色列人民扛約櫃進攻耶利哥城ê時,不發一兵一卒,只扛約櫃繞hit-ê城七工,然後tī第七工ê hit一工,繞城七kho͘-á,結果耶利哥城就倒塌了,被以色列人民佔領(參考約書亞記六:1—21),形成極大ê對比。約櫃原本表示ê意思是「上帝同在」,因為án-ne,以色列人民認為扛約櫃出來相刣,就ná親像扛tio̍h上帝出征一般,m̄-koh結果iáu是輸à。會扛出約櫃,kah in過去ê傳統認知有關,就是上帝會為tio̍h祂ê名譽而戰,bē hō͘家己ê子民以色列人民因戰敗失去上帝ê榮耀。因為án-ne,當年摩西tī曠野chhōa以色列人民往迦南地前進ê時,每pái約櫃往向前行,摩西就會講:「上主ah,求祢起來!願祢ê 對敵四散,願怨恨祢ê 人tī 祢ê 面前逃走!(全民版)」(民數記十:35)無想tio̍h chit pái,上帝約櫃卻被非利士人擄行了,這豈m̄是teh說明上帝已經lán-si得驅行敵人,反tńg hō͘敵人來掠家己ê子民。

Koh講,約櫃ê名聲早已經tī迦南地享受一定ê尊崇kah地位,因為án-ne,當非利士人聽tio̍h以色列軍隊扛約櫃來到戰場ê時,in lóng非常驚惶。M̄-koh神聖ê約櫃卻是由一再褻瀆神聖上帝ê以利ê兩個kiáⁿ何弗尼kah非尼哈扛tio̍h,he kám m̄是teh藐視約櫃ê神聖?莫怪約櫃會hō͘搶去,因為上帝已經離開約櫃à。M̄-nā何弗尼kah非尼哈因為án-ne死tī戰場,連以利後來聽tio̍h約櫃被搶去ê消息mā因為án-ne而暴斃死亡。Chiah-ê lóng應驗ā第二章27節hit位「神ê人」kah撒母耳tùi上帝hia傳出ê消息。

以利ê死,mā結束loh以色列人民「士師」ê時代。續落來koh一pái重頭tńg來「無士師」ê時代,表示以色列社會koh teh beh進入混亂ê世代,直到撒母耳接棒koh進入另外一新ê紀元。

重新查詢 專卷研經 撒母耳記上系列
錯誤回報,請聯繫