撒母耳記上 31章8節 到 31章13節   背景資料  上一筆
Chit段經文記載非利士人用真殘酷ê手段對待戰死沙場ê掃羅,m̄-koh有情義ê雅比城居民卻想辦法kā伊ê屍體取落來火化並且kā骨灰埋葬,表達對掃羅ê感恩。

第8到10節,非利士人到沙場上去剝被刣ê戰士ê戰袍,這是古代打仗勝利後一定有ê動作,特別是戰袍真重要。因為棉袍上有真chē ê護身設備,親像鐵片、刀劍、弓箭等,chiah-ê物件通常lóng是眾士兵ê 隨身ê物,tī當時lóng是屬tī真貴ê戰爭物資。結果chiah發見掃羅kah伊三個kiáⁿ ê屍體。In看見掃羅ê屍體就kā伊ê頭hō͘割了落來,這kah大衛割落代表非利士人ê歌利亞ê頭是仝款ê意思(參考十七:51、54)。M̄-koh chit節ê記載kah撒母耳記下第一章10到16節ê記載無仝;tī撒母耳記下是講kā掃羅ê頭割落來ê,是一位亞瑪力人ê少年人。伊割落掃羅ê頭,原本是為tio̍h beh去向大衛請功領賞ê。結果m̄-nā無the̍h-tio̍h獎賞,反tńg被大衛以刣死上主選立ê王下命令刣死。In he樣做,除了是派人去分報消息hō͘人民外,mā報hō͘ in ê神明知影,續落來koh kā掃羅ê武器khǹg tī女神廟中,kā掃羅ê屍體釘tī「伯‧珊」得城牆上。Chit種作法mā是古代侮辱戰敗對敵陣營者ê一種方法,mā是當時ê人siōng驚惶ê一種懲罰方式—曝屍。是hō͘屍體曝tī日光下,真容易就會發臭、生蛆,用chit種方式來侮辱敵人。其實,chit種方式mā是teh褻瀆敵人,hō͘ in ê心靈受tio̍h嚴厲ê創傷。古代ê人mā認為一個人死後,若是無法度安葬,會無法度hō͘後代得tio̍h幸福(參考列王記上十六:4)。

第11到13節,「基列境內雅比城」,這是tī約旦河東,屬tī瑪拿西支族境內ê一個市鎮。Chia ê以色列人抱tio̍h感恩ê心,想出所有ê辦法kā掃羅kah伊三個kiáⁿ ê屍體tùi「伯‧珊」ê城牆上「取落來,帶tńg來雅比」,並且kā它火化à。In會án-ne做,可能因為掃羅bat帶三十三萬以色列軍隊,去抵抗亞捫人對hit-ê城ê恐嚇kah侵犯(參考十一:8—12),雅比城ê人民以此表達in對掃羅救命ê感恩。

Chia有khah難瞭解ê所在,就是有關火化掃羅kah伊眾kiáⁿ ê屍體,根據以色列人ê傳統,kā屍體火化是一種懲罰(參考利未記二十:14、廿一:9,阿摩司書二:1)。M̄-koh,雅比城ê居民chit種火化方式處理掃羅kah三個kiáⁿ ê屍體,應該是用尊敬ê心chiah-tio̍h,in koh kā掃羅kah三個kiáⁿ ê骨灰埋葬tī「城裡ê柳樹下」。後來,大衛koh kā掃羅kah伊kiáⁿ約拿單ê骨骸,遷徙到故鄉便雅憫境內ê洗拉,kah掃羅老父基士ê墳墓葬做伙(參考撒母耳記下廿一:13—14)。大衛只遷徙掃羅kah約拿單ê,原因是伊kah約拿單有「生死之交」ê特殊關係。當然,掃羅是上帝揀選ê君王,即使掃羅過去bat一直想beh謀害大衛,m̄-koh大衛iáu是照常持守尊敬上帝揀選ê君王,hō͘ in siōng koân ê尊敬。雅比城ê人民甚至為掃羅ê死「禁食七工」,表示hit-ê城ê人對掃羅siōng koân ê懷念。大衛後來tī聽tio̍h掃羅ê消息ê時,mā仝款表現出以色列人siōng悲傷ê方式—拆裂衫褲、禁食(參考撒母耳記下一:11—12)。

結語:
Chit場非利士人kah以色列人tī基利波山ê戰役,tī以色列ê官方歷史mā有記載,而且內容差不多仝款(參考歷代志上十)。比較值得注意ê是:歷代志作者對掃羅kah伊kiáⁿ ê死,作了非常重要ê評語講:「Án-ne,掃羅死亡,因為伊tī 上主犯罪,為tio̍h 伊無守上主ê 命令,koh因為伊去 chhōe 鬼附身 ê cha-bó͘ 人來問她,顛倒無問上主,所以,上主kā伊刣死,kā伊ê國歸hō͘ 耶西ê kiáⁿ大衛。(全民版)」(歷代志上十:13—14)
重新查詢 專卷研經 撒母耳記上系列
錯誤回報,請聯繫