撒母耳記上 28章3節 到 28章19節   背景資料  上一筆  下一筆
Chit段經文描述掃羅tī走投無路ê時,m̄知該怎樣辦chiah ē-tàng繼續維護家己ê王權。因為án-ne,去chhōe巫師來替伊求問已經死去ê先知撒母耳之亡魂,m̄-koh這是違背摩西律法規定ê事。做一個國王會去作違背律法ê規定,mā teh表示chit-ê王陷入危機中。

第3節,chit節特別強調掃羅「bat強迫所有占卜ê kah巫師lóng離開以色列」,m̄-koh這是過去伊跟tòe先知撒母耳ê時,聽從伊ê教導,chiah會做chit種事。作者用「bat」chit-ê詞,就是beh說明掃羅chit-má因為已經無先知thang幫助伊,就違背過去所學tio̍h而且做到ê事。因為án-ne,chit句話mā是為tio̍h beh說明後來掃羅會chhōe巫師來詢問上帝ê旨意ê原因。

第3到7節,chia koh一pái講tio̍h掃羅tú-tio̍h非利士人聚集挑釁ê壓力kah危機,想求問上帝,m̄-koh上帝卻無hō͘ in任何回應。原因是上帝已經棄sak掃羅,chit點tùi第十五章35節ê「上主後悔立掃羅作以色列ê王」chit句話開始,續落來是第十六章14節ê「上主ê靈離開掃羅」等等chiah-ê話,到落尾tī第廿二章描述掃羅殘刣祭司亞希米勒kah in家族所有ê人,chiah-ê lóng tī說明上帝已經棄sak了掃羅,無koh hō͘伊任何啟示。就tī chit時chūn,伊想tio̍h beh去chhōe巫師來詢問,臣僕提供tī「隱‧多珥」ê所在有一個巫婆thang替伊解惑,這是離非利士人紮營ê書念約有九公里遠ê西北邊。M̄-koh這mā teh表明掃羅已經像迦南人仝款,拜鬼神,聽從鬼神ê旨意。

第8到11節,掃羅因為驚別人認出伊來,原因是chit-ê巫婆ê所在,離非利士人ê營房真近,萬一被認出來就糟à。因為án-ne,伊「改裝易服」,tī侍衛ê隨從下,去chhōe chit-ê巫婆。Koh khah特別ê是掃羅指定chit-ê巫婆替伊招來先知撒母耳ê亡魂。Chit-ê巫婆因為掃羅已經「改裝易服」,hō͘伊認bē出來詢問ê就是掃羅本人。M̄-koh伊iáu是詢問講這是會hōng判處死刑ê事,原因是掃羅bat有過嚴厲ê禁止令。真諷刺ê事,掃羅已經m̄信上帝了,soah koh用上帝ê名chiù-chōa。這等於講,伊雖然是用上帝ê名chiù-chōa,m̄-koh chit種舉動是無任何意義thang講ê。Á koh khah諷刺ê是:掃羅用永遠活ê上帝ê名chiù-chōa,卻是beh詢問死人ê亡魂!然後koh進一步用永遠活ê上帝ê名,向巫婆保證做chit款tāi-chì,bē有任何性命ê危險。講穿了,掃羅ê chiah-ê舉動,其實lóng是teh利用宗教法術而已。真正有信仰ê人,絕對bē做chit種家己既m̄相信ê事,soah koh tio̍h chiù-chōa講確有其事。巫婆問掃羅beh招tó一個亡魂?伊回答講是先知撒母耳。

第12到14節,chit段經文ē-sái講是撒母耳記中siōng難處理ê一節經文;siōng常提出ê問題是:chit-má出現ê,是m̄是真是先知撒母耳死後ê亡魂?tio̍h注意ê是:chit時巫婆iáu未進行巫術,m̄-koh撒母耳亡魂已經先出現。因為án-ne,有kóa學者認為先知撒母耳並m̄是被巫婆用法術招來ê。因為上帝ê先知,無可能被巫婆用法術招來喚去。因為án-ne,已經往生ê先知撒母耳知影掃羅kah巫婆ê動作,伊提前親自顯chit-má巫婆kah掃羅面前。Mā因為án-ne,chiah hō͘ chit位巫婆大大大tio̍h驚而呼叫起來。就是因為先知撒母耳tī lóng無預警之下,忽然出現tī伊目睭前,chiah hō͘伊隨時發見來求助ê人,竟然是掃羅王。這有一個可能,就是tī chit位巫婆ê了解中,無人敢講beh招先知撒母耳出現,因為先知撒母耳就是以色列人ê領袖。除了國王以外,無人敢án-ne做。掃羅一知影先知撒母耳出現,就趕緊伏tī土腳表示尊敬ê意思。

第15節,直到chit-má,掃羅iáu-koh無看tio̍h先知撒母耳,只是聽tio̍h伊講話ê聲音。「你為甚麼煩擾我」,chit句話說明先知撒母耳已經「安息」à,chit-má卻hō͘人攪擾。掃羅向先知撒母耳表示希望先知撒母耳ē-tàng出來幫助伊知影該怎樣做,chiah ē-tàng避免被非利士人phah敗。M̄-koh真正ê問題是伊被「上帝棄sak了」,chit點chiah是kui個問題所在。

第16到19節,先知撒母耳ê回答真清楚,hō͘ 上帝棄sak ê人,mā等於是上帝ê敵人,chit種人,就算先知想幫助mā難(參考耶利米書十五:1)。因為先知是上帝ê奴僕,唯一ê使命,就是聽從上帝ê話,並且kā上帝ê話忠實地傳達hō͘祂ê子民(參考列王記上廿二:14)。因為án-ne,先知撒母耳真清楚kā掃羅講,上帝會kā以色列ê軍隊交hō͘非利士人,表示以色列軍隊一定phah敗仗。Á掃羅kah伊ê 眾kiáⁿ,會kah先知撒母耳tī陰間相會,這表示in lóng會戰死沙場。Chit句話後來確實應驗ā(參考三十一:2—3、4)。

重新查詢 專卷研經 撒母耳記上系列
錯誤回報,請聯繫