撒母耳記上 26章1節 到 26章12節   背景資料  上一筆  下一筆
Chit章kah第廿三章19到廿四章22節ê記事,是仝款ê內容,主要lóng是提起有關大衛確實有機會kah能力殺害掃羅,m̄-koh伊並無án-ne做。原因是大衛一再強調:bē-tàng殺害上帝所選立ê君王(參考廿四:6、10、廿六:11、23)。大衛強調一個中心思想:上帝選立ê君王,應該hō͘ in必要ê保護,若無,就是失職(參考廿六:16、24)。

其實,大衛chit種講法mā是teh提醒掃羅,既然伊是上帝所選立ê君王,掃羅就算家己是君王,mā bē-tàng對大衛下手殺害。因為謀刣上帝選立ê君王,等於是teh對抗上帝,chit種行為kan-taⁿ會為家己帶來上帝嚴重ê懲罰—死亡。

Chit章經文主要teh講述大衛m̄-nā無殺害掃羅,反tńg iáu阻止伊ê部下殺害掃羅。

掃羅並m̄是真心地悔悟認為家己確實犯錯。伊心中照常無法度釋懷大衛會取代伊ê家族繼承王位。Chit段經文koh一pái描述當伊接tio̍h情報知影大衛bih起來ê所在ê時,隨時koh派出精兵beh去殺害伊。當大衛kah 隨行者得tio̍h殺害掃羅ê機會ê時,大衛iáu是持守tio̍h chit-ê基本態度:bē-tàng傷害上帝所選立ê王。

第1到5節,ná親像第廿三章所提起ê,西弗人可能因為受tio̍h挪伯遭遇掃羅大屠殺ê影響,當in知影大衛藏匿ê所在,隨時向掃羅通報。Á掃羅聽tio̍h chit-ê消息了後,馬上率領「三千精兵」去搜chhōe,動作非常積極。Á大衛mā得tio̍h情報講掃羅派兵beh來緝拿伊ê時chūn,馬上派出探á去調查實況。這真有意思ê講出一件事:大衛m̄是聽tio̍h後就馬上行動,tú好kah掃羅ê反應相對。伊是先派出探á去調查是m̄是事實,經過證實chiah採取因應ê對策。這表示大衛絕對bē冤枉掃羅,m̄-koh掃羅卻一再冤屈伊ê忠chiâⁿ。伊mā phah聽tio̍h完整ê情報,知影掃羅ê營地,知影掃羅睏tī軍營裡。

第6節,「赫人亞希米勒」,這是聖經中唯一出現ê一pái。「赫人」chit-ê族群一直khiā起tī迦南ê南部,ē-sái講是迦南地siōng凶悍ê族群。大衛ê部隊中mā有「赫人」加入,親像拔示巴ê丈夫就是「赫人烏利亞」(參考撒母耳記下十一:3)。這mā teh表示大衛ê軍隊是非常善戰。亞比篩對大衛表示伊願意跟tòe大衛去掃羅營區,這是非常冒險ê行動,若是無小心被發見,in兩人lóng可能喪命。Á「洗璐雅」,是大衛ê姊妹,伊有三個kiáⁿ—亞比篩、約押、亞撒烏等(參考歷代志上二:16)。Chit三個kiáⁿ lóng是大衛部隊中ê勇kā(參考撒母耳記下二:17—18)。

第7到8節,當大衛kah亞比篩偷偷á進入掃羅ê營房內,發見伊iáu teh睏,he是一個siōng好ê機會ē-tàng真簡單to̍h殺害掃羅。

第9到12節,大衛阻止了beh殺害掃羅ê亞比篩,伊ê態度仝款,就是上帝所選立ê君王絕對bē-tàng殺害。伊深信上帝家己會懲罰違背祂旨意ê掃羅,而且上帝會用各種無仝ê機會,有可能是親像第廿五章36到38節所描述ê 拿八猝死,mā有可能會tī戰場上死去。Chit pái大衛決定the̍h走掃羅隨身ê矛,kah身上ê水罐做證據,ná親像頂pái大衛割落掃羅身上ê袍之一角做證據仝款。大衛kah亞比篩完成chit件偷襲事件後就離開,掃羅kah所有軍營ê人lóng iáu teh沉睡。

重新查詢 專卷研經 撒母耳記上系列
錯誤回報,請聯繫