Tùi第十九章18節開始記載大衛為tio̍h beh逃避掃羅ê追刣，四界逃亡並走chhōe別人幫助。大衛事(tāi)先chhōe先知撒母耳（參考十九：18—24節），然後koh繼續走去chhōe kah伊結有「生死之交」ê掃羅kiáⁿ約拿單（參考二十）。chit-má第廿一章則記載大衛chhōe了挪伯ê祭司亞希米勒幫忙（參考廿一：1—9），續落來koh tùi挪伯到非利士人迦特城hia去bih起來（參考廿一：10—15）。頂面所講chiah-ê並無一定是照前後秩序，chiah-ê資料有ê是出tī無仝來源，親像第二十章chhōe約拿單幫助，ná親像頭前提過ê，hit時大衛iáu tī掃羅王宮中，koh tī固定時間kah掃羅kah其他官員同齊聚餐。M̄-koh tī第十九章10節就已經記載kah真清楚，大衛已經逃離家己ê居所，並離開了王宮，開始伊一連串ê逃亡生活。

Koh講，有關大衛到挪伯chhōe亞希米勒幫忙ê故事，tī第廿一章只記載亞希米勒協助ê經過，續後ê事件則祭司亞希米勒家族慘遭掃羅報復chit件事，tī第廿二章9到23節，非常詳細地敘述掃羅大屠殺亞希米勒家族ê kui個經過。聖經作者有意表達一件事：掃羅殘刣上帝ê奴僕祭司，而且以大屠殺殘酷手段之方式，tú好講出掃羅已經無上帝ê靈同在，chiah會用chit種極端鄙視（siùⁿ）kah褻瀆上帝ê方式，對待上帝ê奴僕。敬拜上帝ê所在，mā應該是一個提供庇護性命ê場所。當祭司teh敬拜上帝ê場所慘遭殺害ê時，mā表示殺害者心中已經無koh敬畏上帝à。

值得注意ê是chit段經文故事bat被耶穌引用回應法利賽人指責祂ê門徒安息日摘麥穗來食ê問題（參考馬可福音二：25—26）。

Chit段經文記載大衛逃到挪伯，伊tī chia chhōe-tio̍h祭司亞希米勒，請求hō͘ in伊食物ê協助。

第1節，「挪伯」是設tī耶路撒冷東北部大約五公里處，tī基比亞南部ê一座城市。是國王敬拜上帝ê場所。「亞希米勒」，伊是亞希突ê kiáⁿ，非尼哈ê孫á，以利ê曾孫。當伊看見大衛來到ê時，以「戰戰兢兢」地出來迎接大衛，伊是掃羅朝廷ê宗教師。Á chit句「戰戰兢兢」mā thang講為第廿二ê大屠殺事件，預留了一個伏筆。伊問大衛為甚麼獨自到chia來chhōe伊，chit句話說明亞希米勒kah大衛真熟識。

第2到3節，非常清楚，大衛對祭司亞希米勒講白賊，而且chit-ê謊講得非常周密。伊以「特殊任務」（參考第5節）來說明chit pái單獨行動ê原因。Koh講，伊希望ē-tàng得tio̍h食物支援。M̄-koh有另外一種看法，認為大衛無kā亞希米勒講實情，是為tio̍h beh保護伊，到時若是掃羅追問，伊thang因為全然m̄知，來免遭遇牽連，m̄-koh chit種講法證明是錯誤。因為後來掃羅iáu是大屠殺死亞希米勒kah伊ê家族。大衛向亞希米勒希望有「五個餅」thang食。有另外一種講法，認為這是大衛想beh the̍h chit五塊餅 tī繼續逃亡ê路上食用。

第4到6節，亞希米勒表示只有「聖餅」，而這是teh指陳設餅。照出埃及記第廿五章30節ê記載，聖幕內面ài有桌á tī約櫃頭前，tī chit-ê桌á頂面beh khǹg獻hō͘上帝ê「供餅」。亞希米勒願意分享chit種只有祭司chiah thang食ê餅（參考利未記廿四：9）。因為án-ne，伊問大衛是m̄是「最近無親近過cha-bó͘人」，因為chit種餅是獻祭hō͘上帝ê，屬tī聖潔之祭物。Tī當時ê看法，有「親近cha-bó͘人」就屬tī一種「屬世」、「世俗ê喜樂」，又koh是kah「性慾」有關，因為án-ne無法度kah神聖ê物件有任何接觸。若無，會玷污了聖物ê潔淨。大衛強調伊kah伊ê部下lóng因為有「特殊任務」在身，所以根本無可能發生chit種「親近過cha-bó͘人」ê事。Chia所用ê「潔淨」，意思是teh指性器官無進行任何性行為ê意思。可能是大衛ê解釋hō͘祭司亞希米勒感覺thang信，因為án-ne，伊kā規定只有伊á是其他祭司chiah thang食用ê聖餅hō͘大衛。Chit種餅是每tú-tio̍h安息日，就beh更換新ê上去。因為án-ne，chia講祭司亞希米勒kā「tú tùi聖桌頂換落來」ê陳設餅hō͘大衛。

Koh講，為甚麼祭司亞希米勒會詢問大衛「最近有無親近過cha-bó͘人」chit種問題？原來當大衛kā亞希米勒講是為tio̍h「特別任務」，因為大衛是成功ê軍事領袖，因為án-ne，tī亞希米勒ê瞭解裡，「特殊任務」可能kah軍事行動有關，根據摩西律法，軍人tī營中á是tī軍事行動ê時，bē-tàng親近cha-bó͘人（參考申命記廿三：9—11），chit點tùi撒母耳記下第十一章thang看tio̍h大衛為tio̍h想beh奪取烏利亞ê bó͘拔示芭，kā烏利亞以前線調tńg來，並一再想出所有ê辦法ài烏利亞tńg去kah bó͘同房，ē-sái講是lóng被烏利亞拒絕，原因是看戰爭是神聖ê事，如果違背來致使戰敗，m̄-nā家己性命不保，連帶ê是kui個民族lóng可能毀滅。因為án-ne，任何軍事出發chìn前，lóng一定tio̍h有宗教儀式。Tī以色列人民，軍人出征chìn前則一定tio̍h先舉行潔淨ê禮儀。

第7節，chit節是編者為tio̍h解釋第廿二章9到10節、18節等等經文有ê解釋。「以東人多益」，以東是以掃ê kiáⁿ孫，mā是替國王á是宮廷管理所屬ê cheng-seⁿ，負責管理、放牧等工作ê主要官員「畜牧長」。伊tú好去挪伯「履行一件宗教上ê義務」，這是teh指多益可能tī某一kóa宗教行為上ê問題，去會幕進行一項宗教上ê「贖罪」禮儀。二是mā可能利用宗教上ê禮儀，掩蓋(khàm)伊當掃羅線民ê角色，為tio̍h是beh查訪大衛ê行蹤。因為án-ne chiah會有chit句「hit工tú好在場」。Á chit句mā為後來多益檢舉祭司亞希米勒協助大衛逃走，以及後來掃羅命令由多益執行屠刣祭司亞希米勒kah其家族ê工作，作了伏筆。

第8到9節，chia講大衛向祭司亞希米勒索取矛á是刀ê理由，是因為行動太匆促，致使無時間準備武器就上路。其實，chit種理由真薄弱。真正原因是：大衛真可能是看tio̍h多益tī祭司亞希米勒ê所在，因為án-ne，感覺不妙，chiah向祭司亞希米勒索取武器，為tio̍h是beh做為安全上ê防範ê路用。Á祭司亞希米勒the̍h被大衛刣死ê非利士人歌利亞ê hit支大刀hō͘大衛。