撒母耳記上 2章1節 到 2章11節   背景資料  上一筆  下一筆
Chit章有一首詩歌,是哈娜用來感謝上帝所吟頌ê詩歌(第1到10節),續落來描述大祭司以利ê兩個kiáⁿ,並無遵守祭司應該有ê潔淨態度(第12到17節),後來上帝向撒母耳啟示teh beh發生tī大祭司以利ê厝災難之預言(第27到36節)。原因是以利ê kiáⁿ並無聽從老父ê勸勉(第22到26節)。

Tùi第1到10節是哈娜祈禱ê詩歌。Chit首詩歌kah新約路加福音第一章46到55節ê「馬利亞尊主頌」真類似,其中lóng提起上帝扶持弱者。因為án-ne,chit首詩歌mā會被稱做「舊約中ê馬利亞o-ló詩歌」。M̄-nā án-ne,撒母耳記下第廿二章ê大衛詩歌,mā出現哈娜chit首詩歌ê內容。Tùi哈娜ê chit首詩歌,thang清楚看出其中心主題,就是teh表達一個基本ê信念:性命ê主宰,就是上帝。Á chit-ê理念應該是普世性ê信仰認知,mā是kui本聖經beh表達出來ê中心信息:一切性命ê源頭,lóng是tùi上帝來創造ê恩典。因為án-ne,人活teh ê每一工,應該lóng是用來回應上帝賞賜性命ê疼chiah-tio̍h。

第1節,哈娜講上帝賞賜hō͘她喜樂ê心,原因是敵人(意指比尼娜)無法度koh再譏笑伊à。

第2到3節,「只有上主神聖;除伊以外,無聖者。」chit句話至少說明一個信仰認知:人lóng是有罪ê人。有罪ê人,就m̄是聖者。「上主是徹底了解一切ê上帝」,chit句表明上帝乃是「無所不知」ê上帝。因為án-ne,基督教信仰認為只有上帝「審斷人ê行為」chiah是公義、正確。

第4到8節,chit段詩歌有一個重要主題,就是人看做強壯、有力ê,tī上帝眼中並無一定án-ne。仝款ê,人看做軟弱ê,只要有上帝伸手扶持,就會比強壯者koh khah強壯,比富足ê人koh khah富有。因為tī人看起來已經無可能ê事,tī上帝手中lóng是非常容易ê,因為上帝是全能者,是萬物ê創造者。

第9到10節,因為上帝是創造者,mā是審判者,因為án-ne,祂會對所創造ê宇宙萬物進行公正ê審判,hō͘對敵上帝ê氣力消失。

第11節,chit節若是續接tī第一章28節就koh khah清楚。Chit節koh一pái強調哈娜確實還了家己所下ê願,伊照約束kā撒母耳留tī示羅ê大祭司以利hia。哈娜kah以利加拿辦理好獻祭禮儀了後,夫妻兩人就tńg來拉瑪去,只有留落來撒母耳tī以利身邊學習成做祭司。

重新查詢 專卷研經 撒母耳記上系列
錯誤回報,請聯繫