撒母耳記上 2章27節 到 2章36節   背景資料  上一筆  下一筆
有bē少聖經學者指出chit段經文是後來編者附加上去ê,為續接後來撒督傳承祭司ê工作預留伏筆。列王記上第二章27節就án-ne記載講:「所羅門就kā 亞比亞他趕出去,m̄ 准伊做上主ê 祭司。Án-ne 就應驗上主tī 示羅所講關係以利ê 家ê 話。(全民版)」若是án-ne,tùi chit段經文thang看tio̍h上帝差派奴僕去向祭司以利傳話,主要tī預言以利ê厝會tú-tio̍h到上帝嚴厲ê懲罰,並且mā同時為撒督負擔祭司工作先預留了一個伏筆。Á chit段預言以利ê家族會tú-tio̍h上帝嚴厲ê懲罰,帶hō͘年老ê以利極大ê打擊。

第27到28節,上帝差派一個奴僕來向祭司以利傳達信息。講述上帝會揀選亞倫當祭司,是一件非常榮耀ê事,上帝看顧賜福祭司,hō͘ in tī生活上並無欠缺。

第29到30節,m̄-koh因為以利ê兩個kiáⁿ當起祭司,卻無嚴格遵守祭司ê本份,反tńg是貪婪成性,而且褻瀆了祭壇ê神聖,因為án-ne,上帝決定beh廢除以利家族繼續當祭司ê榮譽,因為伊ê kiáⁿ藐視上帝,上帝beh改選會尊敬上帝ê人出來當祭司服事祭祀ê禮儀。Tī chia,上帝非常受氣ê一件事,就是祭司以利明明知影伊ê kiáⁿ án-ne,伊kan-taⁿ用勸勉ê方式,並無真嚴厲ê阻止伊kiáⁿ bē-tàng teh獻祭禮儀ê事頂面褻瀆上帝,這就是上帝講祭司以利看重kiáⁿ贏過看上帝ê重要性ê原因。

第31到34節,上帝beh嚴懲以利ê家族,m̄-nā伊ê兩個kiáⁿ會仝一工死去,而且伊ê家族中無年老ê人。Mā tùi chit段話中thang看出當上帝出手懲罰ê時,he是嚴厲ê。

第35到36節,上帝beh廢除以利ê家族,重新改選會忠實tī上帝ê祭司家族。


重新查詢 專卷研經 撒母耳記上系列
錯誤回報,請聯繫