撒母耳記上 16章1節 到 16章13節   背景資料  上一筆  下一筆
Tùi chit章開始是紹介以色列出現一個新ê王—大衛。這mā teh說明上帝已經確定beh廢除掃羅,另立一位新ê王來代替伊ê政權。M̄-koh掃羅並m̄是隨時hō͘ 上帝廢掉,卻是後來teh kā非利士人ê戰役中,掃羅被敵人ê弓箭手射中,受了重傷,最後,伊拔出家己ê刀,「伏tī刀上自刺來死」(參考三十一:3—4)。因為án-ne,tùi chit章開始,撒母耳記上ê作者用真大ê篇幅teh紹介chit位新ê王大衛,並且特別說明當掃羅知影大衛beh替接伊ê王權ê時,便想出所有ê辦法beh阻止chit-ê tāi-chì ê發生。既然這是出tī上帝ê旨意,人就算hō͘盡所有ê氣力,mā無法度阻止。

Chit章mā是續接第十五章ê觀點,記載對君王制度ê設立,表示反對ê意見。作者一再強調一個基本觀念:只有上帝chiah是以色列人民真正君王。因為án-ne,上帝有權膏立掃羅,mā就有權廢除掃羅ê王權。仝款ê,上帝決定膏立大衛來替接掃羅ê時,mā是teh表明真正領導以色列人民ê是上帝。

Chit段經文主要teh說明先知撒母耳得tio̍h上帝ê啟示,去伯利恆為膏立耶西ê kiáⁿ大衛為王。M̄-koh chit pái膏立大衛ê行動,ná親像頂pái撒母耳膏立掃羅王仝款,並m̄是tī以色列全體代表面前膏立ê,卻是tī伯利恆舉行,只有伯利恆ê長老kah耶西厝內人出席而已。

上帝揀選掃羅ê時,伊是便雅憫支派ê人,伊ê家族tī便雅憫支派中算是弱小ê(參考九:21)。仝款ê,chit pái上帝揀選大衛,伊是耶西厝裡siōng細漢ê一個gín-á。這說明揀選ê意義,並m̄是在tī人ê條件,卻是在tī上帝ê旨意。上帝beh看ê m̄是人ê外表,祂所看重ê是人ê心內。

第1到3節,tī第十五章11節有記載先知撒母耳知影上帝beh廢除掃羅了後,真oh過,一再為掃羅向上帝祈求。M̄-koh並無得tio̍h上帝ê同意。chit-má上帝ài先知撒母耳去伯利恆耶西ê厝,上帝已經tī耶西家chhōe-tio̍h一位新ê王。上帝ài先知撒母耳借用獻祭ê方式,聽從上帝ê旨意做tāi-chì。

第4到5節,撒母耳遵照上帝ê話做。伊到伯利恆mā邀請當地ê長老kah耶西ê眾kiáⁿ出席伊ê獻祭禮儀。

第6到7節,先知撒母耳看見耶西ê大kiáⁿ「以利押」(參考十七:13),認為伊就是上帝所beh揀選ê對象。M̄-koh,上帝ê回答卻m̄是án-ne,因為上帝m̄是看外表,卻是看人ê心內。Chit種信仰觀念後來mā成做以色列人ê一句格言,不時被用來勸勉子女(參考歷代志上廿八:9,詩篇廿六:2,箴言廿四:12、三十一:30,耶利米書十一:20,路加福音十六:15,帖撒羅尼迦前書二:4)。

第8到10節,chit三節經文描述耶西連續kā伊ê七個kiáⁿ lóng叫來見先知撒母耳,卻無一個是上帝所揀選ê對象。

第11到13節,因為án-ne,先知耶利米問耶西iáu有甚麼人?伊講iáu有一個siōng小ê kiáⁿ是大衛,m̄-koh伊tī外面顧羊。先知撒母耳ài耶西kā大衛chhōa來。結果上帝kā先知撒母耳講,大衛就是伊所beh揀選ê對象,就án-ne,先知撒母耳tī長老kah耶西kah全家ê面前膏立了大衛。作者特別強調講「上主ê靈馬上支配大衛」,而且tùi先知撒母耳油膏大衛ê hit工起,就「kah伊同在」,這lóng tī說明上帝受揀選抹油ê人,必定有上帝同在,就親像上帝kah先知撒母耳同在仝款。Tī先知運動中,上帝揀選出來ê先知,mā lóng會用chit句「kah伊同在」來表明上帝一定會kah祂所揀選ê奴僕做伙(參考出埃及記三:12,申命記三十一:23,約書亞記一:5、9,撒母耳記下七:7—9,以賽亞書四十一:8—10,耶利米書一:8、18,但以理書五:14,路加福音一:28)。

重新查詢 專卷研經 撒母耳記上系列
錯誤回報,請聯繫