撒母耳記上 14章1節 到 14章15節   背景資料  上一筆  下一筆
Chit章經文主要teh說明以色列人民tī掃羅父子ê帶領之下,抵擋了非利士人龐大軍隊ê壓陣,原因是掃羅ê kiáⁿ約拿單確實是一個智勇雙全ê領導者,甚至比掃羅koh khah有領導能力。M̄-koh作者beh說明真正hō͘以色列軍隊phah贏ê,並m̄是靠人ê氣力,卻是因為有上帝帶領,是上帝決定beh kā非利士人交hō͘以色列人民,chiah hō͘以色列軍隊ē-tàng以寡敵眾。作者努力透過chit段故事來說明一個中心主題:若是掃羅知影ē-tàng聽從上帝ê話,約拿單應該是非常適合續接掃羅當以色列ê王。可惜,因為掃羅無遵行先知撒母耳ê話,hō͘上帝決定beh更換以色列人ê統治者。另外一方面,mā thang tùi chit章經文中看出掃羅並無親像過去第十一章hit種精明有智慧,相對ê,chit-má ê掃羅m̄-nā是優柔寡斷,甚至是顯得有kóa懍neh,chit種人已經無適合當領導者。

Chit段經文講述掃羅ê kiáⁿ約拿單確實是一個智勇雙全ê領導者,伊帶領身邊ê侍衛進入敵營非利士人ê陣中去突擊,結果攪亂非利士人,hō͘ in喪膽逃逸。

第1到3節,chia提起掃羅ê kiáⁿ約拿單是一個真有勇氣ê將軍,伊ài身邊ê侍衛kah伊潛入敵營。Á chit件突擊ê計畫保密到非常完美,無人知影約拿單離開了營地。

第4到7節,約拿單對伊ê侍衛說明突擊ê計畫,koh khah重要ê,伊深信上帝一定會幫助以色列ê軍隊得tio̍h勝仗。

第8到10節,約拿單對侍衛說明伊ê計畫,就是故意hō͘非利士人看見in兩人,若是非利士看見而且邀請in過去,就是上帝會hō͘ in phah贏chit pái戰役ê記號。

第11到12節,果然非利士人用鄙視(siùⁿ)ê語句kah態度,ài約拿單kah侍衛兩人過去in ê陣營,約拿單真清楚這是上帝kā非利士人交hō͘以色列軍隊,chit pái一定會phah贏。

第13到15節,約拿單kah伊ê侍衛,兩人就tī短短時間內,刣死約二十名非利士人ê士兵,這hō͘非利士人ê陣營大大大tio̍h驚kah恐慌。
重新查詢 專卷研經 撒母耳記上系列
錯誤回報,請聯繫