撒母耳記上 12章13節 到 12章25節   背景資料  上一筆  下一筆
先知撒母耳一面控訴以色列人民背叛上帝,m̄-koh伊iáu-koh苦口婆心地勸勉in,tī新選出來ê國王帶領之下,一定tio̍h會記得遵守上帝ê誡命,只有tāi-chì奉、敬畏上帝,án-ne chiah ē-tàng hō͘ in安心生活。若無,就算是設立了君王mā是仝款會腐敗、滅亡。Kui個來看,問題並m̄是在tī君王制度是m̄是比較好á是比較pháiⁿ,關鍵要點是對上帝有否忠實。

第13到14節,先知撒母耳提醒以色列人民,in對上帝ê祈求,上帝已經有應允in,hō͘ in一位新ê王帶領in。In若是敬畏上帝,專心事奉、聽從上帝,包括chit位新ê王在內,大家lóng án-ne遵從上帝ê話語,一定ē-tàng安居生活,平安無事。

第15到17節,相對ê,若是in悖逆上帝ê旨意,m̄遵守祂ê誡命,上帝就會成做in ê對敵者。先知撒母耳為tio̍h beh證明伊所講ê警語,伊tio̍h以色列人民注意看一個異象:tī炕旱(khòng-ōaⁿ)ê季節內,伊會祈求上帝hō͘天tân雷公落雨,用這當做警告ê景象。

第18到19節,上帝垂聽先知撒母耳ê祈禱,果然出現天tân雷公下大雨,以色列人民lóng因為án-ne而驚惶上帝發怒。

第20到25節,先知撒母耳真嚴肅提醒以色列人民,一定會專心事奉上帝,絕對bē-tàng去拜假神,án-ne,上帝就會永遠是in ê幫助者、守護者。Á先知撒母耳mā應允會繼續教導in。Tī chia,撒母耳講上帝beh伊繼續替以色列人民祈禱,幫助以色列人民「行善道行正路」。

重新查詢 專卷研經 撒母耳記上系列
錯誤回報,請聯繫