列王紀上 9章1節 到 9章9節   背景資料  上一筆  下一筆
Chit章thang分做三個部分來看,第一部分是第1到9節,上帝回應所羅門建造聖殿ê用心,第二部分是第10到14節,提起有關所羅門因為大興土木工程興建聖殿kah王宮,m̄-koh卻mā因為án-ne負債真chē,結果因為付bē出工資,只好割hō͘二十座城。第三部分是第15到28節,chit段經文講述所羅門怎樣使用國內ê奴工進行chiah-ê大工程ê工作,並且成立一支海軍。Á頂面所講chiah-ê段落ê經文記事,mā lóng分別記載tī歷代志經冊中。

Chit段經文是上帝回應所羅門完成聖殿建築ê祈禱kah奉獻,mā記載tī歷代志下第七章11到12節。Tī chit段經文中,thang清楚看tio̍h真正重要ê m̄是tī富麗堂皇聖殿ê建築,koh khah m̄是奉獻ê chē少,siōng重要ê是「誠心誠意地事奉上帝,並且遵行祂ê旨意」,án-ne chiah是siōng基本ê。

第1到2節,這是上帝第二pái向所羅門顯現,時間是tī伊建造聖殿kah王宮了後。因為tī聖殿完成ê時,所羅門有舉行奉獻典禮,並且祈求上帝賜福。因為án-ne,chit pái上帝ê顯現,是kah伊tī奉獻ê時ê祈禱有密切關係。

第3到5節,上帝真清楚kā所羅門講,祂已經聽tio̍h所羅門ê祈禱,並且接納聖殿做敬拜ê場所,因為án-ne,會庇護chit間聖殿。M̄-koh有條件:所羅門一定tio̍h像伊ê老父大衛仝款,「誠心誠意地事奉」上帝,並且「遵守」上帝ê律法誡命,上帝就會繼續照顧伊kah伊ê後代。

第6到9節,chit段經文ê內容是相對tī上段經文所提起ê事。上帝先表示祂一定會遵守對所羅門ê老父大衛下ê諾言,就是伊ê後裔會繼續統治以色列。M̄-koh若是所羅門kah伊ê後代不順從上帝,m̄遵守上帝ê律法誡命,去拜別ê神明,m̄-thang講想beh保護聖殿kah王宮,連in所khiā起ê土地,lóng會被外族人hō͘佔領,in會hō͘人驅逐出去,in會hō͘人譏笑、嘲諷。

其實,chit段經文有bē少聖經學者認為是tī亡國了後,in tī巴比倫做奴隸ê時所做ê信仰反省有ê結語。In就是因為棄sak上帝,結果是國家被滅亡,人民hông掠去做奴隸,hō͘人嘲諷譏笑講,in ê上帝無koh疼in,mā不庇護inà。

重新查詢 專卷研經 列王紀上系列
錯誤回報,請聯繫