列王紀上 7章13節 到 7章51節   背景資料  上一筆  下一筆
Chit段經文描述為tio̍h建造完城ê王宮之內部裝飾,所羅門iáu特別派人到泰爾去chhōe名匠來幫忙,mā thang看出所羅門對這王宮ê重視。

	第13到14節,chia紹介所羅門派人去泰爾chhōe-tio̍h一位有名ê工匠名叫「戶蘭」,伊是一個專門鑄造銅器ê名匠。Tùi歷代志下第二章11到14節知影伊ê母親是以色列人,老父是泰爾人。戶蘭是一個「非常聰明koh有經驗ê名匠」。所羅門特別聘請伊「監督所有ê銅器工程」。

    第15到22節,chit段經文是關係戶蘭鑄造兩條銅柱,並且kā它「立tī聖殿ê進口」處,其中一支稱做「雅斤」,意思是上帝建立ê。另外一支稱做「波阿斯」,一是teh指「tī上帝內面就是力量」。

    第23到26節,chit段經文是關係製造銅海ê情景。所謂「銅海」,意思是teh指用來裝水ê容器。Tī歷代志下第四章6節有說明,這是提供給祭司洗滌in ê手、腳,甚至是衫褲。Chit-ê容器真大,ē-tàng裝「四萬公升」ê水。有十二隻銅牛環繞tio̍h chit-ê銅器。

	第27到39節,chit段經文是戶蘭做十個thang移動ê銅盆座,chia特別強調座腳、鑲板、座身、輪軸等lóng是用kui塊ê銅鑄成ê。這表示銅座是非常堅固,無可能折斷。會鑄造chit種銅座,主要目的是thang移動。Chit-ê thang khǹg tī銅座上ê銅盆,thang容納八百公升ê水。M̄-koh tùi khǹg ê位置來看,卻是固定排,並m̄是為tio̍h beh移動之需。

	第40到47節,chit段經文記載戶蘭為聖殿所鑄造ê一切物件,作者kā它列出一份清單,tú好說明戶蘭確實是一位真有學問而且手藝高超ê工匠。因為數量確實siuⁿ chē,所以無kā戶蘭鑄造出來ê chiah-ê銅器hō͘ in秤重。

	第48到51節,所羅門koh另外請人為聖殿製造金器,包括有金壇、供餅ê桌á、十個燈臺、碟á、盛火炭ê盆子、至聖所門上ê門鈕,kah聖殿ê外門等,lóng是用金子製造ê。然後,所羅門kā大衛獻hō͘上帝ê金銀kah其他器物lóng khǹg tī聖殿ê庫房裡,chiah-ê物件絕大多數lóng是戰利品(參考撒母耳記下八:7—12)。


重新查詢 專卷研經 列王紀上系列
錯誤回報,請聯繫