列王紀上 5章1節 到 5章18節   背景資料  上一筆  下一筆
Tùi chit章開始,直到第九章9節,chit段經文lóng是teh講述所羅門建造耶路撒冷聖殿,以及王宮ê情景。單單tùi伊用七年時間建造聖殿,用十三年時間建造王宮,就ē-tàng想像會tio̍h花費非常龐大,mā因為án-ne埋落來後來國力衰退ê主要因素。

第五章主要是teh記載以後所羅門建造聖殿kah宮殿所需要ê建材,特別是非常貴ê木材是tùi黎巴嫩進口ê香柏樹,因為有泰爾王希蘭ê協助而完成建築ê工程。

    第1節,「泰爾」,這是腓尼基ê主要港口,tī西頓ê南邊約四十公里處。「希蘭」王執政ê時期大約是tī主前979到945年代。伊kah大衛ê關係親密,知影所羅門繼承大衛作以色列ê王,就真禮貌地差派特使去見所羅門。

	第2到6節,chit段經文是所羅門請求泰爾王希蘭協助伊建造聖殿ê工程。伊表示chit-má ê以色列國已經國勢堅強,m̄驚有外國á是伊族人侵犯,kah老父大衛時代無仝款,需要不時出征。因為án-ne,伊決定建造一座聖殿敬拜上帝。伊請求希蘭王協助去黎巴嫩剉香柏樹,好做建造聖殿ê主要材料,而伊kā支付希蘭王所訂定ê工資。

    第7節,希蘭王聽tio̍h所羅門án-ne講,表示「非常歡喜」,認為所羅門確實是一個真有智慧ê王。

    第8到9節,tùi chit兩節thang看出泰爾王希蘭是真有經驗ê領袖,伊知影怎樣做ē-tàng符合所羅門ê需要,mā知影該怎樣kā所羅門需要ê黎巴嫩建材剉了後,用海路運送到耶路撒冷ê方式。M̄-koh伊mā清楚知影,家己ê國家所需要ê就是「食物」。

    第10到12節,這幾節經文真清楚說明希蘭王是一個聰明ê君王,伊知影chit款tāi-chì情一定tio̍h有正式ê協約chiah thang。希蘭王因為án-ne tùi所羅門掌理下ê以色列國得tio̍h大量民生物資,包括有「兩千公噸麥á kah四十萬公升純橄欖油做伊宮廷ê食物」。雙方簽訂了「協約」,tùi án-ne「和平相處」。

	第10節chia講「希蘭照所羅門ê要求供給香柏木kah松木」,這是因為希蘭王控制tio̍h黎巴嫩大部分ê土地。Á伊ê人民因為黎巴嫩多山,而且盛產這珍貴ê林木,因為án-ne真gâu伐木、製造木器以及建築ê工程。

第13到18節,chit段經文講出所羅門為tio̍h beh建造聖殿所用ê勞力,差不多就是全國總動員,單單是tùi以色列徵召ê工人就高達十八萬gōa,若koh加上泰爾ê工人,ná實在是非常大ê人力費用。以色列付出龐大ê工資,為tio̍h beh建造súi ê聖殿,全國承擔了重大ê稅賦,mā為以後南北分裂埋落來了遠因。

第17節chia ê「照所羅門王ê命令開鑿貴重ê大石,做聖殿基石」,chit句話mā thang參考馬可福音第十三章1節,門徒teh讚嘆聖殿是「jōa大ê石頭,多雄偉ê建築」,雖然這已經m̄是所羅門當年所建造ê聖殿,卻是主後538年,in tùi巴比倫tńg去故鄉重建起來ê聖殿,m̄-koh基石kah聖殿是完全照第一pái所羅門建造ê樣式重建起來ê。


重新查詢 專卷研經 列王紀上系列
錯誤回報,請聯繫