列王紀上 22章1節 到 22章9節   背景資料  上一筆  下一筆
Chit章主要是紹介先知米該雅ê事蹟;另外,chit章mā teh描述北國以色列kah敘利亞之間ê戰爭。作者利用chiah-ni̍h長ê篇幅,teh說明北國以色列王亞哈,伊是jōa-ni̍h-á m̄遵守上帝ê旨意,甚至tī王宮內家己養了真chē聽伊ê話ê先知,就是為tio̍h beh抵銷上帝ê話,結果伊ê chiah-ê假先知m̄-nā無hō͘伊帶來幫助,iáu因為án-ne hō͘伊遇tio̍h性命ê危險,最後終到死亡。

Chit章經文記事mā同時記載tī歷代志下第十八章。

Chit段經文記載以色列亞哈王想beh出兵去攻打敘利亞,好kā祖先時代被敘利亞王佔去ê城市—基列ê拉末—奪tńg來。Chit時tú好猶大王約沙法正到北國以色列訪問,伊不得不表示mā願意參與chit項出兵ê重大做tāi-chì。M̄-koh,伊建議chit種軍事行動siōng好事先聽聽上帝ê旨意。亞哈想用家己所養ê先知來證明家己所做決定是正確,m̄-koh猶大約沙法王卻無án-ne認為,卻是主張應該聽聽上帝ê先知ê話chiah正確。亞哈王只好派人去帶上帝ê先知米該雅來,請伊問問上帝ê旨意。 

第1到3節,若是照第二十章34節ê記載來看,顯然地敘利亞王答應kā伊所侵佔以色列ê土地,iáu有kóa無歸iáu。雖然敘利亞已經kah以色列之間簽訂了兩國和平條約,m̄-koh經過兩年ê和平了後,以色列亞哈王利用tú好到北國訪問ê猶大約沙法ê時,要求兩國聯盟出兵去攻打敘利亞,理由是希望ē-tàng奪tńg來基列ê拉末城。約沙法會去訪問北國以色列,照歷代志下第十八章1節ê記載,是因為兩人結為親家ê緣故。

基列ê拉末,這是設tī約旦河東岸,遠tī摩西時代就屬tī以色列人所有(列王記上四:13、申命記四:43),由迦得支族管轄。M̄-koh當時已經淪陷tī敘利亞人ê手中。

第4到6節,約沙法隨時表示同意兩國同盟出兵,m̄-koh要求一定tio̍h先問問上帝ê先知,thang知影上帝ê旨意。歷代志作者講,約沙法是一個敬畏上帝ê君王(參考歷代志下十七:1—9)。亞哈王隨時tùi王宮內召來「四百名先知」詢問in ê意見,結果這四百名lóng順tio̍h亞哈王ê意思,講上帝一定會hō͘伊得tio̍h勝利凱旋tńg來。其實,這四百名先知lóng是亞哈ê御用先知,多會講亞哈王歡喜聽ê話而已,因為án-ne,mā thang稱做假先知。因為真實ê先知,只有講上帝beh伊講ê話。

第7到9節,猶大王約沙法感覺無對tâng,伊要求應該聽「上主ê先知」。Á亞哈講chit位上主ê先知是「音拉ê kiáⁿ米該雅」,顯然地,亞哈王清楚知影伊家己所養ê先知,kah上帝ê先知無相仝。因為米該雅bē聽從伊,講伊歡喜聽ê話。亞哈王向約沙法表示,講上帝ê先知米該雅常向伊講「凶險ê話」,就是不吉利ê話,hō͘伊感覺討厭。M̄-koh約沙法iáu是認為beh聽上帝先知ê話,亞哈王不得已,只好同意,就派人去chhōe先知米該雅。

重新查詢 專卷研經 列王紀上系列
錯誤回報,請聯繫