列王紀上 22章41節 到 22章53節   背景資料  上一筆
Chit段經文主要是teh紹介猶大王約沙法。伊thang算是一位bē-bái ê王,因為至少伊kā耶路撒冷聖殿hō͘ in潔淨à,這是非常難得ê事。歷代志下第二十章31節到第廿一章1節有詳細紹介伊án怎帶領人民敬拜上帝,óa靠上帝ê帶領。

第41到44節,chia真簡略地紹介猶大王約沙法,伊三十五歲做王,統治耶路撒冷廿五年,án-ne共計活了六十年。Tī伊當猶大王期間,做上帝看做歡喜ê事,真可惜ê是,伊並無kā以色列人民拜偶像神明ê行為hō͘斬草除根。不過tī伊做王期間,保持kah北國以色列之間ê和諧,chit點可能kah伊kah以色列王亞哈結為姻親有關。

第45到46節,chit兩節經文thang參考列王記下第十七到十九章,有詳細紹介伊治理之下ê猶大國。列王記作者tī chia特別強調約沙法努力剷除偶像神明廟中有男娼ê出現。

第47節,chit節說明以東當時是隸屬tī猶大統治,這是tùi所羅門時代就已經是附屬tī猶大治理之下(參考列王記上十一:14—25)。

第48到49節,照歷代志ê記載,是因為約沙法kah北國以色列ê王亞哈謝聯盟,這m̄是上帝所歡喜ê事,因為án-ne,in雖然造遠洋商船,m̄-koh,上帝並無祝福(參考歷代志下二十:35—37),結果chit項遠洋貿易ê計畫就無成功。

第50節,頭前已經有提起過,約沙法是三十五歲ê時作猶大ê王,統治耶路撒冷廿五年,án-ne,伊死ê時是六十歲。伊ê kiáⁿ約蘭繼承伊ê王位。

第51到53節,chit段經文簡略地紹介亞哈ê kiáⁿ亞哈謝繼承王位後,mā是kah伊ê老父亞哈學習pháiⁿ樣式,帶領以色列人民拜巴力這迦南人ê偶像神明,hō͘人民棄sak上帝,這是上帝siōng-kài憤怒ê事。

重新查詢 專卷研經 列王紀上系列
錯誤回報,請聯繫