列王紀上 21章1節 到 21章16節   背景資料  上一筆  下一筆
Chit章是有關亞哈王想beh佔有拿伯葡萄園ê事件。Chit章mā是舊約聖經中非常有名ê一篇故事,說明國王kah人民之間仝款lóng是上帝ê子民,國王無法度因為家己有權力,就想beh佔有á是貪圖人民ê土地、財產,反tńg koh khah beh知影保護人民ê財產chiah-tio̍h。何況,為tio̍h佔有人民ê土地,iáu做出用假見證謀害人民性命ê惡質ê行為,上帝絕對bē允准chit種事發生。

Chit段經文描述亞哈王看見拿伯ê葡萄園靠近王宮,真想beh得tio̍h該園。伊想beh用換地ê方式,á是用購買ê方法得tio̍h拿伯ê葡萄園,m̄-koh lóng被拒絕,結果hō͘伊真oh過。伊ê bó͘耶洗碧認為既然身為國王,ài the̍h人民ê土地有甚麼bē-tàng。就án-ne就設法用假見證陷害拿伯,講伊褻瀆上帝,而hō͘拿伯活活被phah死,然後kā伊ê葡萄園侵佔起來。這ê事件說明王后耶洗碧用殘酷ê手段奪取人民ê財產。這是上帝所無法度容忍ê事。

第1到3節,亞哈王希望拿伯kā伊靠近王宮附近ê葡萄園賣hō͘伊,á是用其它ê土地kah拿伯交換hit-ê葡萄園,m̄-koh拿伯拒絕亞哈王講:「上主不准我kā祖產讓hō͘你。」拿伯án-ne回答是根據摩西律法ê規定:「地m̄-thang 永遠賣斷,因為地是我ê;lín tī 我ê 面前是出外人,是寄腳ê (全民版)」(利未記廿五:23)這mā teh表示亞哈王已經bē記得上帝透過摩西設定律法ê命令à。

第4到6節,身為國王ê亞哈,因為無法度如心所願ê得tio̍h人民土地,chit件事hō͘伊「悶悶不樂」,甚至不食飯。伊ê bó͘耶洗碧因為án-ne問伊tāi-chì ê緣由,伊kā chit件事講hō͘ bó͘聽。

第7到10節,chit段經文講王后耶洗碧決定替丈夫亞哈王得tio̍h拿伯ê葡萄園。王后耶洗碧用假見證,m̄-nā買通了城裡ê「顯貴kah民間長老」,然後koh用「禁食」chit種有含認罪、哀傷意義ê宗教禮儀方式,koh進一步ài chiah-ê顯貴kah長老去「叫兩個流氓當面控告」拿伯,「講伊辱罵了上帝kah王」。因為照摩西律法,辱罵上帝beh用石頭phah死(參考利未記廿四:16)。這等於講,耶斯列城裡ê chiah-ê達官顯若是聽從王后耶洗碧ê話,卻m̄是遵行上帝ê命令。Koh tī謀害人民ê性命ê tāi-chì上,竟然thang án-ne做。

Tī第9節、12節lóng有提起耶洗碧ài眾長老宣告全國「禁食」,這是kan-taⁿ有tī國家tú-tio̍h危機,á是tú-tio̍h大災難ê時chūn chiah會通告全國人民遵行ê事。而且「禁食」通常是kah「祈禱懺悔」連結做伙,懇求上帝ê憐憫。M̄-koh耶洗碧án-ne做,卻是因為想beh圖謀得tio̍h拿伯ê葡萄園。Chit種圖謀私利ê事,卻掛tio̍h神聖ê宗教名義,就是亂使用上帝ê名(第三誡)仝款。因為án-ne,上帝無法度容忍chit種事發生。

第11到14節,果然,chiah-ê達官顯要並m̄是遵從上帝ê話,卻是聽從王后耶洗碧ê話。Kā用來懺悔、痛苦ê禁食the̍h來當做欺騙ê方式,包括用假見證誣告無辜ê人,án-ne chiah是真正褻瀆上帝ê名。In陷害拒絕出hō͘葡萄園ê拿伯,活活kā伊「用石頭phah死」,然後派人去kā chit件事報告hō͘亞哈王知影。

第15到16節,亞哈王m̄-nā無阻止王后耶洗碧做chit件絕對bē-tàng做ê事,反tńg是放手hō͘伊去做,koh tī伊做完後,iáu聽從伊ê話去「霸佔」拿伯ê葡萄園,身為國王ê亞哈竟然犯下án-ne謀財害命ê罪行!

重新查詢 專卷研經 列王紀上系列
錯誤回報,請聯繫