列王紀上 12章1節 到 12章24節   背景資料  上一筆  下一筆
Tùi chit章開始直到列王記下第十七章,chit段經文lóng是記載以色列分裂做南北二國ê經過,以及chit兩個兄弟國家各自發展ê情形。

第十二章主要teh說明北部十支派會脫離分裂伊去ê原因,以及羅波安原本準備大軍beh去攻打脫離ê北部十支派,m̄-koh因為上帝派先知示瑪雅去kā猶大kah便雅憫講,m̄-thang去攻打北部十支族,in聽從了先知傳達上帝ê話而撤兵,續落來就是耶羅波安當第一位北國以色列ê王。

Tī第十一章提供三個對所羅門政權有威脅ê人ê記事ê時,就已經teh暗示晚期ê所羅門時代,是一個不安定、紛亂ê時代。像利遜就是專門以phah游擊ê方式teh製造社會紛亂,作者用「伊加增以色列ê禍患」來形容所羅門為tio̍h chit-ê tāi-chì而煩惱不安。

Chit段經文主要teh說明北部十支派會脫離ê主要原因,是因為所羅門過奢華ê生活,雖然收入真chē,mā是入不敷出,因為án-ne一定tio̍h óa靠重稅來增加收入,致使北部ê民眾生活koh khah困苦。因為án-ne請求羅波安減輕稅賦,m̄-koh被拒絕後,決定脫離分裂伊去。

第1到4節,羅波安算是有意走chhōe北部十支派ê支持,á是好感。因為án-ne,伊繼任為王後,就去北部ê宗教中心示劍kah十支派ê代表聚集會面。Á chit時,耶羅波安因為聽tio̍h羅波安做王(所羅門王往生),mā tùi流亡ê埃及地趕tńg來。就án-ne北部支派ê人mā派人去請伊代表出席,同齊去見羅波安,並向伊提出一個重要ê議題:若是減輕稅賦,in就順服羅波安ê領導。

第5到8節,羅波安回應北部代表,hō͘伊「三工」時間考慮。伊先去請問幾個元老,lóng bat是所羅門王ê顧問,in建議羅波安用服務人民ê精神,好款待人民,必定會得tio̍h人民ê支持。

第9到11節,羅波安顯然聽不進chiah-ê元老ê建言,伊koh去詢問tio̍h kah伊同齊長大ê少年人ê意見,chiah-ê人lóng是伊聘請進入王宮當顧問ê官員,結果in hō͘羅波安ê建議,m̄-nā不減輕稅賦,反tńg iáu koh khah加重稅賦。其實,羅波安teh回答ê時,已經吐露了in父親所羅門ê時,hō͘ in以色列人民ê稅賦就真重了,chia用「鞭子」來形容所羅門ê稅賦政策,ná親像the̍h鞭子phah人民仝款ê沉重kah疼痛。

第12到15節,結果羅波安不採取元老ê意見,而採取少年顧問ê意見,講beh加重稅賦,「m̄-chhap人民ê要求」。

第16到17節,北國十支派ê以色列人民就án-ne決定脫離伊去,羅波安就只有統治猶大kah便雅憫。

第18到19節,羅波安為tio̍h beh挽回北部支派ê分離,特別派「勞工總管亞多蘭到以色列人hia去」,有意想beh kah in洽商。Chit位亞多蘭應該就是第四章6節所講ê「亞多尼蘭」,伊bat管理三萬名勞工參與建造耶路撒冷聖殿ê工程。原本認為伊去,可能有安撫作用。M̄-koh無想tio̍h亞多蘭去了後,就被北部憤怒ê以色列人民hō͘用石頭phah死,羅波安因為án-ne慌亂了,伊趕緊逃tńg來耶路撒冷,就án-ne,北部正式脫離了耶路撒冷做中心ê大衛王朝之統治。

第20節,北部十支派ê代表共同聚集,in邀請耶羅波安出席大會,並且立伊做北部十支族成立ê以色列國為王。Á南部ê只chhun猶大kah便雅憫,m̄-koh因為便雅憫非常弱小。因為án-ne,就用猶大國來稱呼南部兩支派ê國家。

第21到24節,羅波安想用武力懲罰北部十支派,因為án-ne號召了猶大kah便雅憫支族派出siōng精銳ê兵丁共計十八萬人,beh去攻打北國以色列。M̄-koh上帝差遣祂ê奴僕先知示瑪雅去阻止in,hō͘ in知影這有上帝ê旨意在其中,ài in tńg去。In聽從了先知示瑪雅ê苦勸,免除了一場兄弟殘殺ê悲劇。

重新查詢 專卷研經 列王紀上系列
錯誤回報,請聯繫